Read idoma OŌYƐBƐ̄CƐ 8 Bible Online

OŌYƐBƐ̄CƐ 8 - idoma bible

OŌYƐBƐ̄CƐ 8

¹Anɔ́ɔ Óndú ā da Umósīsi kahíníī, “Nyɔ̄ ɛgiyí Uféro ká ā da ɔ́ ka Óndú ā kahíníī, ‘Mā ācɛ ɔlɛ́ um tá kéē nyɔ̄ gaá lɛ ɛ̄gbā gbā um.

²Amáŋ, ɔ́dāŋ ka á cɛ̄ lɛ uwá nyɔ̄ ŋ́, n géē yá ācɛ ɔlɛ́ uwɔ italā bū ɔwɛ kú aábaná ō tū klɛ́ɛcɛ ɛga dóódu kú ajɛ ɔlɛ́ uwɔ.

³Ísu kú Unáyilu ā géē cē aábaná klá ɛcɛ nēe géē pɛ́ ga ipú agblɔ̄cɛ́ kú ɔlɛ́ uwɔ, ipú inu ogbiyɔ̄lā kú uwɔ, ipú ɔlɛ́ kú aígabɔ̄ mɛ́mla ɔlɛ́ kú ācɛ ɔlɛ́ uwɔ. É kōō í pɛ́ ga ipú ocíbú ō yá igbō kú uwɔ dúú.

⁴É géē tómbili pla uwɔ mɛ́mla ācɛ ɔlɛ́ uwɔ mɛ́mla odúúdú aígabɔ̄ kú ɔlɛ́ uwɔ.’”

⁵Anɔ́ɔ Óndú ā da Umósīsi kahíníī, “Da Árɔ̄ni kóō kwú okwutɛ kú nū ā ú nāndaa ce eyī ísu, áyɔ́kpá nɛ̄ŋcɛ́, njɔlɔ mɛ́mla obugā, kéē tū abaná klɛ́ɛcɛ, cɛ́ɛ́ kéē klá ajɛ kú Íjīpiti.”

⁶Anɔ́ɔ Árɔ̄ni lɛ okwutɛ kú nū nā pīya cíla éŋkpɔ̄ dóódu kú Íjīpiti á. Anɔ́ɔ aábaná le tū klɛ́ɛcɛ wā í klá odúúdú ajɛ ā.

⁷Amáŋ, ācɛ ō yá imabɔ̄ kú Íjīpiti ā, le abaná tū wā í klá ajɛ kú Íjīpiti dúúdú fíyɛ́ ɛ́gɛ́nɛ̄ Árɔ̄ni yá ā.

⁸Uféro lɛ Umósīsi mɛ́mla Árɔ̄ni kpó hīgwú, anɔ́ɔ ó kahíníī, “Aá lɛ ɔkɔ gbā lɛ Ɔwɔicō kóō kwú aábaná ā ú kpó ŋmá ɛgiyí um mɛ́mla ācɛ ɔlɛ́ um. N géē cɛ̄ ká ācɛ kú Ísrɛ̄lu kéē nyɔ̄ í lɛ ɛya gwó lɛ Óndú ā, Ɔwɔicō kú uwā.”

⁹Umósīsi tá ɔ̄ ohi kahíníī, “Ó géē he um ɔtū nɛ̄hi ká n̄ lɛ ɔkɔ gbā ohígbú uwɔ. Amáŋ kwú eko nɛ̄ n géē gbɔ̄kɔ lɛ Óndú ā ohígbū uwɔ, aígabɔ̄ mɛ́mla ācɛ ɔlɛ́ uwɔ. Cɛ́ɛ́ aábaná í mɛ ŋmá ajɛ nɛ̄ odóódu í gáā hile gɛ ŋ́ ayíka ipú ísu kú Unáyilu ōfōōfūnū.”

¹⁰Uféro tá ɔ̄ ohi kahíníī, “Le ɔkɔ gbā lɛ Óndú ā ohígbū um óócí” Umósīsi kahíníī, “N géē gbɔ̄kɔ ohígbū uwɔ óócí ɛ́gɛ́nɛ̄ a ka ā, cɛ́ɛ́ kú ā lɛ jé ka Ɔwɔicō ɔhá dúúmā í gla Óndú ā, Ɔwɔicō kú alɔ ā ɛ́ɛ́ gɛ ŋ́.

¹¹Aábaná ā géē pɛ́ nyɛ̄ɛ̄ ŋmá ɛgiyí uwɔ. É géē hile ipú ísu kú Unáyilu ā ōfōōfūnū.”

¹²Anɔ́ɔ Umósīsi mɛ́mla Árɔ̄ni nyɛ̄ɛ̄ ŋmá ɛgiyí Uféro á. Anɔ́ɔ Umósīsi le ɔkɔ gbā lɛ Ɔwɔicō, ohígbū aábaná nɛ̄ ó tū klá Uféro, ɔcɛ́ ā.

¹³Óndú ā le yá ɛ́gɛ́nɛ̄ Umósīsi gbɔ̄kɔ lɛ̄ ā. Aábaná ā lɛ pɛ́ gekwú ŋmá agblɔ̄cɛ́ kú Uféro mɛ́mla ipú ɔlɛ́ kú aígabɔ̄ mɛ́mla ɔlɛ́ kú ācɛ kú Íjīpiti ā.

¹⁴Anɔ́ɔ ācɛ kú Íjīpiti ā lɛ uwá tīkwū klá ɔhá gídígbóó á.

¹⁵Eko nɛ̄ Uféro má ka aábaná ā le pɛ́ gekwú ɛɛ́ mā, ó lɛ ɔtū kú nū yá lɔfú kpɔ́. Anɔ́ɔ ó jāhɔ̄ lɛ ɛlā kú Umósīsi mɛ́mla Árɔ̄ni ŋ́ kpɔ́ á, ɛ́gɛ́nɛ̄ Óndú ā tɛtɛ ka ā.

¹⁶Anɔ́ɔ Óndú ā da Umósīsi kahíníī, “Lɛ da Árɔ̄ni kóō lɛ okwutɛ kú nū fíyajɛ. Cɛ́ɛ́ ka úmúlá kú odúúdú ajɛ kú Íjīpiti ā kóō kwú pīya ɛlá.”

¹⁷Anɔ́ɔ Árɔ̄ni le okwutɛ kú nū ā fīyajɛ á. Anɔ́ɔ odúúdú úmúlá kú ajɛ kú Íjīpiti ā kwú pīya ɛlɛ́ɛ́lá. Ɛlá ā kē le tū klá odúúdú ācɛ mɛ́mla aɛ́bɛ́ á.

¹⁸Ācɛ ō yíimabɔ̄ kú Íjīpiti ā, cēyītīkwū kéē lɛ ɛlá kú uwā tū klá ɛcɛ, amáŋ é yá ɔ̄ glá ŋ́. Anɔ́ɔ ācɛ mɛ́mla aɛ́bɛ́ ā kwú pīya ɛlɛ́ɛ́lá.

¹⁹Anɔ́ɔ ācɛ o yíimabɔ̄ ā lɛ tá ɛgiyí Uféro gáā da ɔ́ kahíníī, “Ɔwɔicō abɔ̄yī nū yá ɛ̄nyā á.” Amáŋ ɔtū kú Uféro le lɔfu kpɔ́. Ó jāhɔ̄ lɛ Umósīsi mɛ́mla Árɔ̄ni ŋ́ kpɔ́, ɛ́gɛ́nɛ̄ Óndú ā tɛtɛ ka lɛ ā.

²⁰Óndú ā da Umósīsi kahíníī, “Cāŋjɛ ɔ̄cɔ̄ɔ̄cī ká ā gaá gbēyī Uféro ɛga nɛ̄ ó wā ī yɛ ga ɔkpá ā, kú ō da ɔ́ kahíníī, ‘Ɛ́gɛ́nɛ̄ Óndú ā ka lɛ ā yɔ̄ á, mā ācɛ ɔlɛ́ um tá kéē nyɔ̄ gáā lɛ ɛ̄gbā gbā um ipú ígbíli.

²¹N pi uwɔ ahɔ̄ ka, ɔ́dāŋ́ ka á cɛ̄ lɛ uwá nyɔ̄ ŋ́, n géē yá uwɔ italā o ŋmá lɛ ō tū ɔ́wá kú iju klá awɔ, aígabɔ̄ kú ɔlɛ́ uwɔ mɛ́mla ācɛ ɔlɛ́ uwɔ. Aíju géē tū ɔlɛ́ kú ācɛ kú Íjīpiti mu. É klla í klá ɛga dóódu kú ajɛ ā.

²²Amáŋ, n géē lɛ ajɛ kú Ugóssɛn, ɛga nɛ̄ ācɛ ɔlɛ́ um lā ā cētá. Ɔ́wá kú aíju dúúmā í gáā ga abɔ́ɔ ŋ́. N géē yá lɛ ā cɛ́ɛ́ ká ā jé ka ami nōo wɛ Óndú ā yɔ̄ ī yúklɔ́ ipú ajɛ nyā á.

²³Ɔwɛ ɛ́gɛ́nyā nɛ̄ n géē kɔ̄ ācɛ ɔlɛ́ um ŋmá ācɛ ɔlɛ́ uwɔ á. [4] Úklɔ́ ō hídáagó nyā í yá óócí.’”

²⁴Anɔ́ɔ Óndú ā le yá lɛ aá. Ó le ɔ́wá kú aíju tū klá inu kú ɔlɛ́ ɔcɛ́, Uféro mɛ́mla inu kú aígabɔ̄ kú ɔlɛ́ nū, mɛ́mla odúúdú ajɛ kú Íjīpiti. Aíju ā le ífi bī wā odúúdú ajɛ kú Íjīpiti.

²⁵Anɔ́ɔ Uféro le Umósīsi mɛ́mla Árɔ̄ni hīgwú. Ó da uwá kahíníī, “Aá nyɔ̄, kú aá gaá lɛ ɛya gwó lɛ Ɔwɔicō kú aá ipú ajɛ kú Íjīpiti ā.

²⁶Amáŋ, Umósīsi tá ɔ̄ ohi kahíníī, “Ó lɔhi ō yá lɛ ā ŋ́. Ohígbū ka ɔdā nɛ̄ alɔ gáā bī gwɛ́ɛya lɛ Óndú ā, Ɔwɔicō kú alɔ ā, wɛ ɔdēēlihɔ kú ācɛ kú Íjīpiti. Ɔ́dāŋ́ ka alɔ gbɔɔ́ ō bī ɔdēlihɔ kú ācɛ kú Íjīpiti ā gwɛ́ɛya ipéyī uwā, é í tá ɛcɔ̄ klá alɔ.

²⁷Alɔ géē ga iyāwu kú ɛ̄cī ɛtá ga ipú ígbíli ā piíí, cɛ́ɛ́ kú ālɔ̄ gáā lɛ ɛya gwó lɛ Óndú ā, Ɔwɔicō kú alɔ, ɛ́gɛ́nɛ̄ ó da alɔ lɛ ā.”

²⁸Uféro tá uwā ohi kahíníī, “N géē cɛ̄ lɛ aá nyɔ̄ gáā gwɛ́ɛya ā lɛ Óndú ā, Ɔwɔicō kú aá, ipú ígbíli. Amáŋ aá gáā nyɔ̄ ligbó ŋ́. Aá lɛ ɔkɔ gbā lɛ Ɔwɔicō ohígbū um mɛ́ɛnɛ.”

²⁹Anɔ́ɔ Umósīsi da ɔ́ ka, “Ɔkwɔɔkwu nɛ̄ n nyɛ̄ɛ̄ ŋmá ɛgiyí uwɔ, n géē gbɔ̄kɔ lɛ Óndú ā, cɛ́ɛ́ óócí, aíju ā í n hī uwɔ, aígabɔ̄ kú ɔlɛ́ uwɔ mɛ́mla ācɛ ɔlɛ́ uwɔ tá. Amáŋ ā híī plla alɔ igbɛ́ɛ̄nyā kú ā lɛ ācɛ ā oōnyɔ̄ gaá gwɛ́ɛya lɛ Óndú ā ci gɛ nóó.”

³⁰Umósīsi nyɛ̄ɛ̄ ŋmá ɛgiyí Uféro, le ɔkɔ gbā lɛ Óndú ā a.

³¹Óndú ā le yá ɛ́gɛ́nɛ̄ Umósīsi gbɔ̄kɔ lɛ ā. Ó kwú ɔ́wá kú aíju ā ú kpó ŋmá ɛgiyí Uféro, aígabɔ̄ mɛ́mla ācɛ ɔlɛ́ nū. Iju ékpónú í hile ŋ́.

³²Amáŋ, Uféro le ɔtū kú nū yá lɔfú kpɔ́. Ó cɛ̄ lɛ ācɛ kú Ísrɛ̄lu ā nyɔ̄ ŋ́.