Read idoma UJÓBU 1 Bible Online

UJÓBU 1 - idoma bible

UJÓBU 1

¹Eko éyi, ɔ̄cɛ éyi yɔ̄ nɛ̄ iyē nū lé ka Ujóbu. Ó lā ipú ajɛ nēé hī Úusi[1] Ó wɛ ɔ̄cɛ nōo í yá ucē kpaakpa, mɛ́mla ucē ɔkwɛ̄yi. Ó gē le ojīlīmā ce Ɔwɔicō, ī gbā ɔ̄ ɛ̄gbā, í klla gē yá ɔdōbɔ̄bí dóódu ŋ́.

²Ó ma ayínɔ̄nyīlɔ ahāapa, mɛ́mla ayínɔ̄nyā ɛtá.

³Ó lɛ aálá mɛ́mla aɛ́wu úlā igwáahāapa cofigwó, mɛ́mla aínyankwūlūmī úlā ahāapa cofigwó, mɛ́mla aɛ́na úlā ɛpa cofigwó mɛ́mla aíjakī úlā éyi cofɛhɔ̄. Ó klla lɛ ācocɛ̄hɔ̄ alɛwa. Anú wɛ ɔ̄cɛ nɛ̄hi, nōo lɛ agbénú fíyɛ́ dúú ipú odúúdú ācɛ kú ajɛ kú ɛnɔ̄ɔ̄cī á.

⁴Ayí nū nɔ̄nyīlɔ gē yá ucɛ ɔlɛ́ ɔnyɔɔnyɛ kú uwá ɔgbɔɔgba. É kē ī hī ayínɛ́ uwá nɔ̄nyā ɛtá ā gaá lé ucɛ nyā mɛ́mla uwá dúú.

⁵Eko nɛ̄ aɛ́cī kú ucɛ kú uwá ā le yá í yɛ nɛɛ, Ujóbu gē hī uwā igwú gaá gwu uwá iyē kéē le yá yēŋēē. Ɔ̄cɔ̄ɔ̄cī blibli ā, Ujóbu gēe cāŋjɛ klla í gwɛ́ɛya ooyi ɔlá éyééye kú ɔnyɔɔnyɛ kú uwā. Ohígbū kóō gē gbɛlá ka, ekōōhī ayí anúɔ ɛ́ɛ lɔfú lɛ íne bīya ŋmá lɛ ɛcá ō cá Ɔwɔicō ipú ɔtū kú uwá ɛɛ́. Ujóbu kwú ɛnyā ú pīya ucē kú nū nōó gē yá ohígbū ayí nū eko dóódu.

⁶Eko éyi, eko nɛ̄ aálelékwu-ōtɛ̄hɔ̄ kú Ɔwɔicō ā ī kpó īyī uwá wā í jīla iyɔ̄bū Ɔwɔicō ā, anɔ́ɔ ebilíi tá ipú uwá, wā iyɔ̄bú Ɔwɔicō dúú á.

⁷Anɔ́ɔ Óndú ā da ebilíi ɔ̄kā kahíníī, “Iní nɛ̄ a ŋmá?” Ebilíi tá Ɔwɔicō ohi kahíníī, “N wā ŋmá ō yɔ̄ í yɛ ga ajɛ gicō ipú ɛcɛ.”

⁸Anɔ́ɔ Óndú da ebilíi ɔ̄kā kahíníī, “Abɔ̄ a gē yɛ ā, a má ɔ̄cocɛ̄hɔ̄ kú um, Ujóbu? Ɔ̄cɛ dúúmā í yá ucē okpaakpa mɛ́mla ɔkwɛ̄yi lɛbɛ̄ɛka anú ā ipú ɛcɛ ŋ́. Ó gē gbā um ɛ̄gbā kpaakpa, í klla gē yá ɔdōbɔ̄bí dóódu ŋ́.”

⁹Ebilíi tóohi da Ɔwɔicō ɔ̄kā kahíníī, “Ujóbu gē le ojīlīmā ce uwɔ áncā nɛɛ?

¹⁰A gē gbō ɔ̄ mɛ́mla ɔlɛ́ nū mɛ́mla ɔdā dóódu nōó lɛ ā bɛ̄ɛka ɛ́gɛ́nɛ̄ igá gē yɛ jīla ɔlɛ́ tá biílí ā. A klla gē hɔ́ɔhá ce odúúdú úklábɔ̄ kú nū, klla lɛ aɔ́dāajɛ kú nū nyīla klá ɛga dóódu kú ajɛ ā.

¹¹Lɛ abɔ̄ nāŋ́daa kwú ɔdā dóódu nōó lɛ ā yíífi ka á má ɔ̄. Ó géē ka atufú ga uwɔ ipéyī uwɔ cāā.”

¹²Anɔ́ɔ Ɔwɔicō da ebilíi kahíníī, “Olɔhi, ɔdā dúúmā nɛ̄ Ujóbu lɛ ā yɔ̄ ipú abɔ̄ kú uwɔ, amáŋ ā híī lɛ abɔ̄ kwu Ujóbu abɔ̄yī nū nóó ŋ́.” Anɔ́ɔ ebilíi nyɛ̄ɛ̄ ŋmá ɛgiyí Ɔwɔicō á.

¹³Ɛ̄cī éyi igbīhāajɛ, ayí kú Ujóbu bá yɔ̄ ī lé ucɛ klla bā í gwó ejé ɔlɛ́ ɔ́kplá kú uwā ā.

¹⁴Anɔ́ɔ ɔ̄cocɛ̄hɔ̄ éyi lɛ inya kwu wā ɛgiyí Ujóbu gaá da ɔ́ kahíníī, “Alɔ bī aɛ́na kú uwɔ ā bā í hɛ́hɔ̄, aíjakī ā kē bā í lé ácí kwu uwá ajaajɛ.

¹⁵Anɔ́ɔ ācɛ Usabéya wā í tū alɔ iyē, bī ɔkpacāŋ́gelī kwú ācocɛ̄hɔ̄ kú uwɔ í kpó ŋmó, klla kwú aɛ́bɛ́ ā í kpó uwī á. Ami ōfōōfū um kwu wā í da uwɔ yɔ̄ á.”

¹⁶Abɔ̄ ɔ́ɔmā bī ɛlā okónu yɔ̄ ī ka kpɔ́ ɛ́ɛ́ mā, ɔ̄cocɛ̄hɔ̄ ɔhá klla ga, gaá da Ujóbu kahíníī, “Akpáabana ŋmá ɔkpáncō wā ajɛ í lɛ odúúdú aálá mɛ́mla aɛ́wu, mɛ́mla ācogbāálá kú uwɔ ā kpó yi ŋmá ajɛ. Ami ōfōōfū um kwu wā í da uwɔ yɔ̄ á.”

¹⁷Abɔ̄ ɔ́ɔmā klla bī ɛlā okónu yɔ̄ ī ka kpɔ̄ ɛ́ɛ́ mā, ɔ̄cocɛ̄hɔ̄ ɔhá klla gā kpɔ́ gaá da Ujóbu kahíníī, “Ācɛ ohéjulúgwu kú Ucaldíya lɛ īyī uwā kɔ̄ ígwu ɛtá, wā í tū alɔ iyē. É kwú aínyankwūlūmī ā í kpó uwī, klla bī ɔkpacāŋ́gelī lɛ ācocɛ̄hɔ̄ kú uwɔ ā kpó ŋmó. Ami ōfōōfū um kwu wā gaá da uwɔ yɔ̄ á.”

¹⁸Abɔ̄ ɔ̄cɛ ɔ́ɔmā klla bī ɛlā okónu í ka kpɔ́ ɛ́ɛ́ mā, ɔ̄cocɛ̄hɔ̄ ɔhá gā klla gaá da ɔ́ kahíníī, “Ayínɔ̄nyīlɔ kú uwɔ mɛ́mla ayínɛ́ uwá nɔ̄nyā ā bā í lé ucɛ klla bá ī gwá ejé ɔlɛ́ ɔ́kplá kú uwā.

¹⁹Anɔ́ɔ owu nɛ̄hi ŋmá ipú ígbíli wā ī fíyɛ́ ɔ́kíkā ɛnɛ kú inu, nēé bá ipú nū bā í lé ucɛ nyā, kwu inu ā ú wúla klla uwá bá ajɛ gbuduum á. Odúúdú uwā le pɛ́ gekwú. Ami ōfōōfū um kwu wā gaá da uwɔ yɔ̄ á.”

²⁰Eko nɛ̄ Ujóbu lɛ ɔ́ɔmā pó ā, ó cāŋjɛ, le īlī kú nū híla, klla lɛ ɛyí kú nū plla, kóō mafú ɔtūnōbí kú nū. Ó má gblugudu klá ajɛ lɛ ɛ̄gbā gbā Ɔwɔicō.

²¹Anɔ́ɔ ó kahíníī, “N tá abɔ̄ áncā wɛ̄ɛcɛ ŋmá ipú kú ɛ́nɛ́ um, abɔ̄ áncā ɔ́ɔmā nɛ̄ n kē í tá eko nɛ̄ um kwú ŋmá ɛcɛ á. Óndú, awɔ je ɔdā dóódu gā um á, a kē mīyɛ ɔdā dóódu ŋmá ɛgiyí um ɛɛ́. Ɔwɔicō, n cɛ̄tra awɔ.”

²²Ipú odúúdú ɔdā nēe yá ɔ̄ nyā, Ujóbu í bīya íne ŋmá lɛ ō da Ɔwɔicō ka ɔ́ɔ lɛ ɔdōbɔ̄bí yá ŋ́.