Read idoma UJÓBU 10 Bible Online

UJÓBU 10 - idoma bible

UJÓBU 10

¹Ɛ̄jɛ̄ oyēeyī le jɛ̄ um ɛɛ́. Ohígbū ɔ́ɔmā, n géē kpó Ɔwɔicō ɛpɔ̄ tɛ́ɛcɛ péee. N géē kɛlā ŋmá lɛ ɛ́gɛ́nɛ̄ ɔtū yɔ̄ ī wú um lɛ ā ā.

²N géē da Ɔwɔicō ka ɔ́ɔ ŋmó um ɛpɔ̄bí ŋ́. Ka ɔ́ɔ lɛ ɔdā nōó bī lɛyíkwu um ā da um.

³N géē da ɔ́ ɔ̄kā ka ile nyá nɛ̄ ó lɛ ŋmá ōwē nōó yɔ̄ ī yá um ā, ŋmá ō tá ɔdā nōo bī abɔ̄ kú nū yá ā tónū ā. N klla í da ɔ́ ka ɔdí yá nɛ̄ ojuju ula kú ācobɔ̄bíipú ā gē he ɔ́ ɔtū ā.

⁴N géē da ɔ́ ɔ̄kā ka ‘A gē mɛ́ɛbɛ ɛ́gɛ́nɛ̄ ɔlɛɛcɛ gē má ā nɛɛ, kɛ̄ɛ ka a gē jɛ́yí odée bɛ̄ɛka ɛ́gɛ́nɛ̄ ɔ̄cɛ ɔlamu ī jé āa?

⁵Oyēeyī kú uwɔ le kpií lɛbɛ̄ɛka ákú ɔ̄cɛ ɔlamu ā nɛɛ?

⁶Ɔdí yá nɛ̄ a gē tíne ō piyɛ ɔ́bíipú nɛ̄ um yá ipú oyēeyī kú um, nɛ̄ a ī bɔkwu um ká ā piyɛ ɔdōbɔ̄bí nɛ̄ um yá ā tɛ́ɛcɛ āa?

⁷Nááná a jé ka amíyɔ í lɛpɔ̄bí dúúmā ŋ́ mā, ɔ̄cɛ ɔhá dúúmā í kē yɔ̄ nōo gē hɛ́ um tá ŋmá abɔ̄ kú uwɔ ŋ́.

⁸Awɔ bī abɔ̄ kú uwɔ le yɔ́ɔna, klla yá um ā, awɔ piíí ɔ́ɔma, klla ī je um yíífi á āa?

⁹Bla ka a yá um ŋmá ɔmɛ. A gáā je um gbā, ká n le pīya úmúlá nɛɛ?

¹⁰Awɔ pīya um bɛ̄ɛka enyi amɛ ā tū ipú ɔ̄gɔ̄ ɔma kú ɛ́nɛ́ um, klla yá ka iyē kú um kóō gbɔɔ́ ō jɛ̄ ipú abɔ́ɔ á.

¹¹Awɔ bī ikpokwú mɛ́mla ɛ́nɛ́bɛ́ le tá iyē kú um bɔ́ɔhá bɛ̄ɛka ɛ́gɛ́nɛ̄ é gē tá īlī ā, klla je ɔkpíyē klá anú á.

¹²Awɔ je oyēeyī ga um klla gē yíihɔtū tū um eko dóódu á. A kē lɛ ɛlá kwu um, klla le um tū lɔɔlɔhi.

¹³Amáŋ, ɔdā nɛ̄ um gáā ka nyā wɛ ɔdā nɛ̄ a le tayínū ipú ɔtū kú uwɔ á. N jé ka a kē yɔ̄ ī yá ojuju ō yá um ɔdā nēé bá nyā.

¹⁴A yɔ̄ í gbō um, ká n̄ lɛ íne bīya, cɛ́ɛ́ káā tá ō je íne nɛ̄ um bīya ɔ́ɔmā yá um ɛhi.

¹⁵Ɔ́dāŋ ka n jámá lɛ íne bīya, ayíka n le tá ipú unwalu ɛɛ́. Amáŋ ɔ́dāŋ ka n lɛ ucē okpaakpa yá nááná, n cɛ̄tra īyī um glá ŋ kpɔ́. Uwēyī le um kwú, n kē yɔ̄ ī móōwē nɛ̄ɛ̄nɛ̄hi.

¹⁶Ɔ́dāŋ ka n lɛ ɔdā dóódu yá nōo ī dē je um gicō lígíii nɛ̄ɛ, a kwú pīya bɛ̄ɛka ágábá gbɔɔ́ ō tɔ́tɛ́ um ō je um yíífi. Á kóō í yúklɔ́ idáagó, ka á yá um ɔdā olɔnɔ.

¹⁷Á gē bī unwalu ɛ̄yīpɛ̄ wā í tū um iyē eko dóódu. Ɔnū kú uwɔ lɛyíkwu um ā yɔ̄ í nwunē tōōtɔ̄ɔ̄ eko dóódu. Ā ī kpó unwalu wā gaá klá um bɛ̄ɛka aícɔ́ɔja nēe le mlɛ́nyɔ́ le tútū ō kpɛ́fú ā.

¹⁸Ɔdí yá nɛ̄ a bī um wɛ̄ɛcɛ ŋmá ipú kú ɛ́nɛ́ um ā? Ó géē yɛ í he um ɔtú ɔ́dāŋ ka ń yɛ í gekwú ɛ́ɛ́ ka ɔ̄cɛ dúúmā kóō má um.

¹⁹Ó géē yɛ í lɔhi, kéē lɛ um ma okwū ŋmá ipú kú ɛ́nɛ́ um gaá ga únóji bōōbū, fíyɛ́ ō yēeyī.

²⁰N lɛ eko kpií hile ō yēeyī mɛ́ɛnɛ. Mā um tá ká n̄ jɔ́ɔnyɛ īyī um lígíí,

²¹gbɔbū ɛ́ɛ́ ka ń géē ga ɛga nōo dobū nɛ̄hi, nɛ̄ ɔ̄cɛ gē nyɔ̄ í gē pīyɛyí wā gɛ ŋ́ mā.

²²Ajɛ ɔ́ɔmā wɛ ajɛ kú obū mɛ́mla ígbájí nɛ̄ ɔlá í gē fíyajɛ ŋ́, amáŋ ɛbɛɛbɛ le dobū kpímm ā.