Read idoma UJÓBU 11 Bible Online

UJÓBU 11 - idoma bible

UJÓBU 11

¹Eko nɛ̄ Ujóbu mā ō kɛlā ā, Usófa, nōo wɛ ɔ̄cɛ Unámāati ā, gbɔɔ́ ō kɛlā. Ó kahíníī,

²Ɔ̄cɛ dúúmā nōo ī kɛlā nwuné lɛ ā, ó cíkā nɛ̄ ɔ̄cɛ gē tá ɔ̄ ohi. Ɛlā alɛwa ō ka í gē hɛ́pɔ̄hi lɛ ɔ̄cɛ ŋ́.

³Ujóbu, a gbɛlá ka ɛlā nɛ̄ a í ka nɛ̄hi ā í gáā cɛ̄ lɛ alɔ tá anúɔ ohi ŋ́ nɛɛ? Kɛ̄ɛ ka a gbɛlá ka anúɔ í yá ɔ̄cɛ ɛbɛ́, nɛ̄ alɔ í gáā dɛ̄gba tū uwɔ ŋ́ nɛɛ?

⁴A yɔ̄ ī ka ka ɛlā nɛ̄ anúɔ cɛ̄ klla ī kaā ɔ́ɔ wɛ ɔkwɛ̄yi á. A klla ī ka ka Ɔwɔicō ɔ́ɔ má anúɔ ka anúɔ ɔ́ɔ yá ɔdōbɔ̄bí dúúmā ŋ́.

⁵Eyī yá um ka Ɔwɔicō kóō lɛ ohi tá uwɔ lɛyíkwu ɛlā nɛ̄ a ka nyā.

⁶Kóō lɛ ɔdōtayínū kú ɔwɛ nōó ī yá odée ā da uwɔ. Ó lɛ ɔwɛ alɛwa nɛ̄ ɔ̄cɛ gē bī le má íjéeyī kú Ɔwɔicō. Le jé ka italā nɛ̄ Ɔwɔicō yɔ̄ ī yá uwɔ ā le nyɛ́ lɛ ɛ́gɛ́nɛ̄ ō cíkā lɛ lɛ íne nɛ̄ a bīya ā.

⁷A bɔ̄kwu ká ā jé aɔ́dā lɛyíkwu Ɔwɔicō nɛ̄ ó tōō jé ŋ́ mā glá ā? Á bɔ̄kwu ká ā jé ɔkwɛ̄yi kú Ɔwɔicō nōo lɔfú fíyɛ́ dúú ā nɛ̄ ó tōō jɛ́yí nū ŋ́ mā glá ŋ́.

⁸Íjéeyī kú Ɔwɔicō nwuné fíyɛ́ ɔkpáncō mɛ́mla ɔlékwū á. Á lɔfú nɛ̄ a ī jɛ́yí nū glá ŋ́.

⁹Íjéeyī kú Ɔwɔicō nwuné fíyɛ́ ɛ́gɛ́nɛ̄ ɛcɛ gbɛ ā, klla nwúné fíyɛ́ ɛ́gɛ́nɛ̄ ísu nɛ̄hi lɔwá ā á. Á kē jɛ́yí nū glá ŋ́.

¹⁰Ɔ́dāŋ ka Ɔwɔicō gaá lɛ uwɔ kwú, kwú uwɔ ú tá agbá, klla lɛ uwɔ bī wā ɔnɛ̄pɔ̄, ɔnyɛ̄ yá abɔ́ɔ, géē ci ɔ́ anú glá āa?

¹¹Ɔwɔicō jé ācɛ ɛflɛ́ɛfu gbóó. Eko nēé lɛ ucē ɔ́bíipú yá, Ɔwɔicō kē jé. Ó kē ī je mlanyī ɔdā nēé yá ɔ́ɔmā ŋ́.

¹²Amáŋ, ɔ́dāŋ ka ijakī géē mɔyí ɔ̄cɛ glá, ayíkā olíla géē jééyī glá.

¹³Le ɔtū kú uwɔ pīyabɔ̄ ká ā gbɔ̄ɔkɔ tíne eyōolɔhi kú Ɔwɔicō.

¹⁴Mā ɔ́bíipú nɛ̄ a ī yá ā tá, ká ā yá kú ācɛ nēe bá ɔlɛ́ uwɔ ā kéē gbɔɔ́ ō yá ucē kpaakpa.

¹⁵Cɛ́ɛ́ a géē lɔfú lɛ ɔtū yá ékpónū, nɛ̄ uwēyī í gáā yá uwɔ ŋ́. Ufi dúúmā í klla gáā yá uwɔ ŋ́.

¹⁶A géē je mlanyī unwalu kú uwɔ ā, bɛ̄ɛka énkpɔ̄ ɔkpá, nōo le pɛ́ wā í yɛ ɛ́ɛ́ mā.

¹⁷Ɛnɔ̄ géē fíyajɛ klá uwɔ fíyɛ́ ɛ́gɛ́nɛ̄ ó ī cɛ̄ eko nōó yɔ̄ ɛyí ā. Unwalu nōo yɔ̄ oyēeyī kú uwɔ klla ī je pīyabɔ̄ bɛ̄ɛka ɛ́gɛ́nɛ̄ obū gē je pīyabɔ̄ tá ofíyajɛ kú ɛnɔ̄ kú ɔ̄cɔ̄ɔ̄cī ā.

¹⁸Á gáā yúufi gɛ ŋ́, ohígbū ka a lɛ eyīyōce. Ɔwɔicō klla géē gbō uwɔ, nɛ̄ a klla í yɔ̄ ɛbɔ́.

¹⁹Ā géē yɔ̄ ɛbɔ́, nɛ̄ ɔ̄cɛ dúúmā í gáā tū uwɔ ufi ŋ́. Ācɛ alɛwa klla í bá í ka olɔhi kú uwɔ, kéē lɛ odée lɛ ŋmá abɔ̄ uwɔ.

²⁰Amáŋ ācobɔ̄bíipú ā í gáā jé ɔdā nōo yɔ̄ ī yá uwā ŋ́. É gáā má ɔwɛ dúúmā ō kwu ŋ́. Ikwū ōfōōfūnū wɛ eyīyōce kú ācɛ ɛ́gɔ́ɔmā ā”