Read idoma UJÓBU 12 Bible Online

UJÓBU 12 - idoma bible

UJÓBU 12

¹Anɔ́ɔ Ujóbu tóohi kahíníī,

²“Ɔkwɛ̄yi nɛ, aá wɛ ɔkɛ̄lā kú odúúdú ācɛ ā nɛ. Aá gekwú, íjéeyī géē kwú mɛ́mla aá dúú, ohígbū ka aá ōfōōfū aá lɛ íjéeyī āá.

³Amáŋ n jɛ́yí odée nwuné bɛ̄ɛka ɛ́gɛ́nɛ̄ aá jé ā dúú. Ń nyɛ́ fíyɛ́ aá ɔwɛ dóódu ŋ́. Ɔ̄cɛ dóódu jé ɔdā nɛ̄ aá ka nyā kpɛ́mm.

⁴Aóklóbīya um bá ī yɛhɛ tū um klla bá ī yá um okónu, nááná nɛ̄ n gē yá ucē kpaakpa, í klla yá ɔdōbɔ̄bí dúúmā ŋ́ mā. Amáŋ gbɔbū ɛ́ ka ɔdā nyā kóō yá ā, ó lɛ eko nɛ̄ Ɔwɔicō ī tū m ohi eko nɛ̄ um lɛ ɔkɔ gbā lɛ ɔ́.

⁵Ācɛ nēé lɛ unwalu dúúmā ŋ́ mā gē yá ācɛ nēe bá ipú unwalu ā okónu. Aá bá ī je unwalu lɛ ɔ̄cɛ nōo yɔ̄ ī móōwē tɛtɛ ɛɛ́ mā.

⁶Amáŋ aúwi lā ɔlɛ́ uwā ɛbɔ́, ɔ̄cɛ dúúmā í kē je unwalu lɛ ɛbɔ́ kú ācɛ nēe ī yá Ɔwɔicō cɔ̄nū ā ŋ́. Ɔfú kú abɔ̄yī uwā wɛ ɔwɔ nēé ī gbā á.

⁷Amáŋ, da aɛ́bɛ́ mɛ́mla aígbáanɔ nēe ī wu icō ā, kéē nwū uwɔ lɛyíkwu Ɔwɔicō.

⁸Aɛ́bɛ́ ajɛ géē nwū uwɔ dúú. Aɛ́béenyi kú ísu klla í ka gā uwɔ.

⁹Ɔ̄nyɛ ipú ódúudú ɛcɛ í jé ka Ɔwɔicō ɔ́ɔ bī abɔ̄ kú nū yá odúúdú ɔdā nyā ŋ́ mā ā?

¹⁰Oyēeyī kú ɔdā dóódu yɔ̄ ipú abɔ̄ kú Ɔwɔicō, owu nōo ī cɛ̄ lɛ ācɛ yēeyī ā, yɔ̄ ipú abɔ̄ kú nū dúú.

¹¹Eko nɛ̄ ahɔ̄ kú ɔ̄cɛ lɛ ɛlā pó, ó gē jīla anú kóō má ɔkwɛ̄yi amáŋ ka ɛ̄kɛ̄mgbɛ̄ kú ɛlā ā, bɛ̄ɛka ɛ́gɛ́nɛ̄ okónu gē jé ohɔ́ɔnɔ amáŋ ka olɔnyɛ kú ɔdōlé ā.

¹²Anyākwɔ́cɛ jééyī á. Eko nēé lɛ ɛcɛ lé ligbó, é gē jɛ́yí odée.

¹³Amáŋ Ɔwɔicō jéeyī klla lɔfú nɛ̄hi. Ó lɛ ohílīpú klla jé odée nɛ̄hi fíyɛ́ dúú.

¹⁴Ɔdā dúúmā nōó le catāajɛ, ɔ̄cɛ í tū ɔ̄ gwó glá ŋ́. Ɔ̄cɛ dúúmā nōó kwú tá agbá, ɔ̄cɛ dúúmā í klla hɛ́ ɔ̄ tá ŋmá agbá ɔ́ɔmā glá ŋ́.

¹⁵Ɔ́dāŋ koó cɛ̄ lɛ ɔwɔ yā ŋ́, ajɛ kwú ŋmókókó. Ɔ́dāŋ nōó kē cɛ̄ lɛ ɔwɔ nɛ̄hi le yā, éŋ́kpɔ̄ kē lɛ ajɛ kpó.

¹⁶Ó lɛ ɔfú klla gē yálé eko dóódu. kwu ācɛ nēe gē plla ācɛ, mɛ́mla ācɛ nēé gē plla ā, bá ipú abɔ̄ kú nū.

¹⁷Ó gē mīyɛ íjéeyī kú aótrɛ̄yí hɛ̄ uwá abɔ̄ tá. Ó klla ī je aɔ́cɛ́ jɛɛ́lɛ́.

¹⁸Ó gē fu aɔ́cɛ́ ɔfulā ɔcɛ́, ī je uwá tá ajɛ ŋmá ɔcɛ́, klla í je uwá pīya aɔ́fiyɛ.

¹⁹Ó gē tá ācogwɛ́ɛya wā ajɛ, klla ī mīyɛ ācɛ nēe le íkwu nɛ̄hi kú íkée ā ɔfú.

²⁰Ó gē cɛ̄ lɛ ācɛ nɛ̄ ācɛ lɔtūce ā kéē kɛlā glá ŋ́. Ó klla gē je ohílīpú ŋmá ɛgiyí anyākwɔ́cɛ ā.

²¹Ó gē je uwēyī lɛ ācɛ nēe lɛ íkwu ā. Ó klla ī mīyɛ ɔfú iyē kú ācɛ nēe lɛ ɔfú ā ŋmá ɛgiyí uwā.

²²Ó gē je obū kú ɔlékwū ā tɛ́ɛcɛ péee, klla ī bī ofíyajɛ wā ajɛ nōo dobū fíyɛ́ dúú ā.

²³Ó gē je aéwo ōhī pīya ɛnɛ̄hi, klla í je uwá piíí ɔ́ɔmā pīya ɛ̄nɛ̄ŋ́cɛ́. Ó gē je aéwo ōhī yá aéwo nɛ̄hi, ó klla kē ī je aéwo ɔ́ɔmā piíí ā catāajɛ.

²⁴Ó gē je aɔ́cɛ́ ā pīya olíla, klla cɛ̄ lɛ uwá í yɛ ipácí, í jé ɛga nɛ̄ uwá gē nyɔ̄ ā ŋ́ bɛ̄ɛka olíla ā.

²⁵É bá ī lɛ abɔ̄ ma ajɛ ipú obū, í má ɛbɛ ŋ́. Ó cɛ̄ lɛ uwá bá ī ga ɔwɛ ga ácí bɛ̄ɛka, ɔ̄cɛ nɛ̄ ejé lɛ ɔ́ kwú ā.”