Read idoma UJÓBU 13 Bible Online

UJÓBU 13 - idoma bible

UJÓBU 13

¹Īkpēyī kú um lɛ odúúdú aɔ́dā nēe bá nyā má ɛɛ́. Ahɔ̄ kú um klla lɛ odúúdú uwá pó ɛɛ́. N kē lɛ ɛyí odúúdú uwā kpó jé ɛɛ́.

²N jé ɔdā nɛ̄ aá jé ā dúú. Ń nyɛ́ fíyɛ́ aá ɔwɛ dúúmā ŋ́.

³Amáŋ n tíne ō kɛlā lɛ Ɔwɔicō, nōo lɔfú fíyɛ́ dúú ā. N tíne ō kɛpɔ̄ mla Ɔwɔicō cɛ́ɛ́ ká n le mafú lɛ ɔ́ ka ń yá ɔdōbɔ̄bí dúúmā ŋ́.

⁴Aá gē kɛ̄mgbɛ̄ cɛ́ɛ́ ka ācɛ kéē jé ka aá wɛ ogwuda ŋ́. Aá lɛbɛ̄ɛka olobócí, nōó nya ɔ̄cɛ dúúmā tá glá ŋ́ mā.

⁵Ɔ́dāŋ ka aá géē cɛ̄ ī lɛ okónu ká aá klá cíí, aá yɛ í le mafú ka aá jéeyī.

⁶Aá jāhɔ̄ lɛ ɔkɔ nɛ̄ n gē ka ā, kú aá pó ɛpɔ̄ nɛ̄ n gē ka ā.

⁷Aá gbɛlá ka aá ī tá Ɔwɔicō abɔ̄ klla ī gbā ɔ̄ ŋmá lɛ ɛ̄kɛ̄mgbɛ̄ nɛ̄ aá ī ka mɛ́mla ācɛ nɛ̄ aá ī plla ā nɛɛ?

⁸Aá gáā cɛ̄ɛpɔ̄ Ɔwɔicō, kú aá kɛpɔ̄ lɛ ɔ́ nɛɛ?

⁹Eko nɛ̄ Ɔwɔicō lɛ aá jila lɔɔlɔhi, aá géē le kpaakpa ā? Aá géē plla Ɔwɔicō ɛ́gɛ́nɛ̄ aá gē plla ācɛ ɔlamu ā glá nɛɛ?

¹⁰Ó géē yá aá italā ɔ́dāŋ ka aá tíne ō cɛ̄ɛpɔ̄ nū tayínū.

¹¹Ó géē bī ɔfú mɛ́mla ojīlīmā ɔcɛ́ kú nū le tū aá ufi. Ufi nū géē kwú aá.

¹²Aíta nɛ̄ aá ī kwu ā wɛ áncā lɛbɛ̄ɛka ewo ā. Ɔkɔ nɛ̄ aá ī ka ā í hɛ́pɔ̄hi lɛ aá glá ŋ́ bɛ̄ɛka ɛ́gɛ́nɛ̄ ɔkplɛ́fú kú ɔmɛ í gbō ɔ̄cɛ glá ŋ́ mā.

¹³Aá lɛ okónu kú aá klá cíí ká n̄ kɛlā kú um, cɛ́ɛ́ ɔdā nōo géē wā í yá um nɛɛ kóō wā í yá um.

¹⁴N le tútū ō lɛ ɛyí ce ikwū kú ɔdā nōo ī yá kóō yá.

¹⁵Abɔ̄ ń lɛ eyīyōce gɛ ŋ́ mā, ɔ́dāŋ ka Ɔwɔicō lɛ um ŋmó nááná, ó klla lɛ ɔdā ɔhá gɛ ŋ́ mā. Amáŋ n géē ka ɔkɔ kú um ipéyī nū, abɔ̄yī nū.

¹⁶N géē hayi iyɔ̄bū Ɔwɔicō, ó kē ī nya um tá, ohígbū ka ɔ̄cobɔ̄bíipú dóódu, í lɔfú hayi iyɔ̄bū nū glá ŋ́.

¹⁷Aá jāhɔ̄ lɔɔlɔhi, ka aá pó ɛyí ɛlā nɛ̄ n yɔ̄ í ka ā.

¹⁸N le tútū ɔkɔ kú um ō ka ɛɛ́, n kē jé ka Ɔwɔicō géē hɛ́pɔ̄hi gā um.

¹⁹Ɔnyɛ géē kpɛ́lāce um glá ā? Ɔ́dāŋ ka aá yá nɛ̄ ɛpɔ̄ lɛ um kwú glá, n géē klá okónu kú um, kú n̄ gekwú cíí.

²⁰Ɔwɔicō, ɔ́dāŋ nɛ̄ a í yā ɔdā ɛpa nyā gā um ōfōōfūnū, ń gáā je īyī um tayínū ŋmá ɛgiyí uwɔ ŋ́.

²¹Éyi kú nū, mā ō yá um italā. Ɔ́mpā kú nū, mā ō tū um ufi.

²²Ɔwɔicō, awɔ ā kóō kɛlā kú uwɔ aflɛ́yí, cɛ́ɛ́ ká n tá uwɔ ohi. Ámāŋ n̄ kɛlā kú um aflɛ́yí, cɛ́ɛ́ ka á tá um ohi.

²³Ɔdōōbɔ̄bí mɛ́mla ucē ɔ́bíipú ɛmulá nɛ̄ n yá ā? Lɛ ɔwɛ nɛ̄ ń lɛyítáajɛ ga uwɔ ŋ́ mā mɛ́mla ɔwɛ nɛ̄ n yá bɔ̄bí ā mafú gā um.

²⁴Ɔdí yá nɛ̄ a gē je eyī kú uwɔ tónū ŋmá ɛgiyí um klla í je um bɛ̄ɛka olɛlā kú uwɔ āa?

²⁵Ā yɔ̄ í tíne ō tū ami nōo lɛbɛ̄ɛka ēpū ā ufi nɛɛ? Kɛɛ ka a yɔ̄ í nū um inya bɛ̄ɛka ɛ́gɛ́nɛ̄ nɛ̄ owu gē kpó igbóngbō ā?

²⁶Ohígbū ka a yɔ̄ í tá ɔkpá kú ɛpɔ̄ ka amíyɔ lɛ ɔdōbɔ̄bí yá nɛ̄hi. Ɔwɛ ɔ́ɔmā nɛ̄ a gē bī le cíla um ulé kú ucē ɔ́bíipú nɛ̄ n yá eko ɔyípōklóbīya kú um ā.

²⁷A lɛ odó ce um ikpó, klla yɔ̄ í gbō ɔdā dóódu nɛ̄ um yá ā gɛɛ. A klla yɔ̄ ī lɛ eyī tá ína kú ɛga nɛ̄ n le ikpó da ajɛ ā.

²⁸Ohígbū ɔ́ɔmā ɔ̄cɛ yɔ̄ ī je gblífi, klla yɔ̄ í wā tā ajɛ bɛ̄ɛka ɔcí nōo gē wā tāajɛ ā. N yɔ̄ í je gblífi, bɛ̄ɛka īlī nɛ̄ ɛha ī je lé ŋmá ajɛ ā.