Read idoma UJÓBU 14 Bible Online

UJÓBU 14 - idoma bible

UJÓBU 14

¹Ɔ̄cɛ nɛ̄ ɛ́nɛ́ ma ā, í lɔfú iyē ŋ́. Oyēeyī kú nū wɛ unwalu unwalu. Ó kē ī gbojī ɛ́ɛ́ nōo gē kwú ŋ́.

²Ó gē jɛ̄ klla ī kwú bɛ̄ɛka ododó nōo ī nwūla ɔ̄cɔ̄ɔ̄cī ā, klla gē je ŋmɔ́lá tū ajɛ ɔlɛ́ɛnɔ ā. Ó géē bí tāajɛ lɛbɛ̄ɛka ojiji nōó gē yɔ̄ gbojī ŋ́ mā.

³A gēe pīyeyī má ɔ̄cɛ bɛ̄ɛka ami ā kɛ̄ɛɛ, Ɔwɔicō? A gē bī um ga ɔnɛ̄pɔ̄ gaá kɛpɔ̄ tū um kɛ̄ɛɛ?

⁴Ɔlɛɛcɛ nōó le yēŋēē ŋ́ mā í gáā ma ɔ̄cɛ nōo le yēŋēē glá ŋ́.

⁵A lɛ eko nɛ̄ ɔ̄cɛ gē yēeyī gaá kwu lɛ ā tū tāajɛ ɛɛ́. A lɛ aɔ́yā nōó ī lé ā tū lɛ ɔ́ nōó gáā glá anú nyɔ̄ ɔbū glá ŋ́.

⁶Ohígbū ɔ́ɔmā, kwú eyī kú uwɔ ú hɛ̄ ɔ̄ tá ka á mā ɔɔ̄ tá cíí mɛ́ɛnɛ. Cɛ́ɛ́ ó géē má abahi kpií gbéeko nōó le eko kú nū yá kwɛyí lɛbɛ̄ɛka ɔ̄coyúklɔ́ ɔgwū nōo ī yúklɔ́ ɛ̄cī kú nū mɛ ā.

⁷Eko dúúmā nēé lɛ ɔcí hɛ́ nɛ̄ ikpankini nū kwu ajɛ, eyīyōce yɔ̄ lɛ ɔ́ ka ɔ̄ɔ̄ gē gbɔɔ́ ō lu kpɔ́.

⁸Ɛ̄gbā kú nū lɔfú je gbo ɛnɛ̄ŋcɛ́ ipú ajɛ, nɛ̄ ikpankini kú nū gē kwú glá.

⁹Ńááná, éŋ́kpɔ̄ lígíí jɛ̄ ō yá nōó géē lū klla í jɛ̄ ɛ̄yīpɛ̄ kpɔ́ ɛɛ́ mā.

¹⁰Amáŋ, ɔ́dāŋ ka alɛɛcɛ gekwú, é klla lɔfú iyē dúúmā gɛ ŋ́. Eko nēé gekwú, iní nēé kē yɔ̄ ā?

¹¹Ísu gē ŋmó, ɔkpá klla ī je ŋmó ŋmá ajɛ dúúdú.

¹²Ɛ́gɔ́ɔmā nɛ̄ ɔ̄cɛ nōo gekwú, í klla gē héyī gɛ ŋ́ má. Jāā gbéeko nɛ̄ ɔkpáncō mɛ́mla ɛcɛ mɛ, ɔ̄cɛ nōo gekwú í gáā cāŋjɛ gɛ ŋ́, ɛ́ɛ́ nōó gē héyī ŋmá iyɔ̄lā kú nū ɔ́ɔmā ŋ́.

¹³Eyī yá um ka a kwú um ú tayínū, klla yɔ̄ ī gbō um ɔlékwū, jāā gbéeko nɛ̄ ɔtū kú uwɔ le gbo, nɛ̄ á cɔ̄nū gɛ ŋ́. Cɛ́ɛ́ a lɛ eko tū nɛ̄ a géē blakwu um.

¹⁴Ɔ́dāŋ ka ɔ̄cɛ gekwú, ó klla géē kwúcē wā oyēeyī igbɔhá glá kpɔ́ ɛ́ɛ? Odúúdú eko kú úklɔ́ kú oyēeyī kú um ā, n géē gbéyī eko olɔhi fíyɛ́, jāā gbéeko nɛ̄ unwalu kú um nyā géē mɛ ā.

¹⁵Cɛ́ɛ́ eko ɔ́ɔmā, a géē hī um igwú, n kē í tá uwɔ ohi. A géē yɔ̄ í tíne um, ami nɛ̄ a bī abɔ̄ kú uwɔ yá ā.

¹⁶Eko ɔ́ɔmā, a géē yɔ̄ í leyīkwu um ɔwɛ dóódu. Amáŋ á gáā yɔ̄ ī lɛ ɛlá kwu ucē ɔ́bíipú dúúmā nɛ̄ n yá ā ŋ́.

¹⁷A géē je íne nɛ̄ n bīya ā yá um ɛhi klla í kpó uwā tayínū bɛ̄ɛka ɛ́gɛ́nɛ̄ ɔ̄cɛ gē kpó odée tū ipú ɛkpa ī je tayínū ā. Ā gēe je odúúdú ucē ɔ́bíipú nɛ̄ n yá ā, cēklá dúúdú.

¹⁸Amáŋ ɛfu gē je fu klla í je wúlatāajɛ, nɛ̄ ápátɛ́cɔ̄ í je kpó míya bónū ŋmá ɛyí nū dúú.

¹⁹Éŋkpɔ̄ kú ísu gē pɛ́ klá ɛcɔ̄ ī je ɔ́ lé. Ɔwɔ nɛ̄hi gē kpó ajɛ nyɔ̄. Ɛ́gɔ́ɔmā nɛ̄ a gē yá nɛ̄ ɔ̄cɛ í gē leyīce ō yēeyī gɛ ŋ́ má.

²⁰A le fíyɛ́ ɔ̄ ɔfú cɛ́ɛ́ ó gekwú. Eyī kú nū kē le kwúflá eko nōó gekwú ā.

²¹Ɔ́dāŋ keé lɛ ojīlīmā je lɛ ayí nū nááná, anú ā í klla jé ɛ́ɛ́ gɛ ŋ́. Ɔ́dāŋ keé kōō lɛ ayí nū tū wā ajɛ, ó klla jé ɛ́ gɛ ŋ́ dúú.

²²Ó jé ɔdā dóódu hɛ̄ ɔnɔ kú ɔkpíyē kú nū mɛ́mla ɔtūnōbí kú īyī nū tá ŋ́.