Read idoma UJÓBU 15 Bible Online

UJÓBU 15 - idoma bible

UJÓBU 15

¹Anɔ́ɔ Ɛlífāasi, ɔ̄cɛ Utéman ā tá Ujóbu ohi kahíníī,

²Ɔ̄cɛ nōo jéeyī bɛ̄ɛka awɔ ā í gē bī ɛlā nɛ̄hi nōó lɛ ɛyí ŋ́ tóohi kú ɛlā ŋ́.

³Ujóbu, á cíkā ō bī ɛlā áncā, nōó lɛ ile dúúmā ŋ́ má le táafú ŋ́.

⁴Ó hɛ̄ abɔ̄ da awɔ ōfōōfū uwɔ nɛɛ, ɔ̄cɛ dúúmā í gáā lɛ ojīlīmā ce Ɔwɔicō, ɛ́ɛ́ nōó gē gbā Ɔwɔicō ɛ̄gbā ŋ́.

⁵Abɔ̄ a bɔ̄bíipú ā yá nɛ̄ a gē kɛlā nɛ̄ a yɔ̄ ī ka nyā á. A bī ɛlā okónu kú uwɔ yɔ̄ ī plla ɔ̄cɛ icííci.

⁶Okónu kú awɔ, abɔ̄yī uwɔ ī ŋmó uwɔ ɛpɔ̄bí á. Ó wɛ ami ŋmó uwɔ ɛpɔ̄bí ā ŋ́. Ɛlā nɛ̄ a gē ka ā gē cīijáalí tū uwɔ á.

⁷Awɔ wɛ ɔ̄cɛ aflɛ́yí nēé ma ipú ɛcɛ nyā á nɛɛ? É lɛ uwɔ ma gbɔbū ɛ́ɛ́ nɛ̄ Ɔwɔicō yá aɛ́fu á nɛɛ?

⁸A pó eko nɛ̄ Ɔwɔicō yɔ̄ ī yá ojuju mɛ́mla aálelékwū-ōtɛ̄hɔ̄ kú nū ɔkpáncō ā nɛɛ? Awɔ ōfōōfū uwɔ wɛ ɔlɛɛcɛ nōo jéeyī á nɛɛ?

⁹Ɔdí nɛ̄ a jé nɛ̄ alɔ í jé ɔ̄ ŋ́ mā? Ɛdɔ ohílīpú nyá nɛ̄ a lɛ, nɛ̄ alɔ í lɛ ŋ́ mā?

¹⁰Aókplícī nōo bū inyīlɛ̄yí nɛ̄hɛ́ nwū alɔ íjéeyī á. Ācɛ ɔ́ɔmā lé ɔnyākwɔ́cɛ lɛ ádā uwɔ á.

¹¹Ɔtū nɛ̄ Ɔwɔicō gē tū uwɔ anú lé ā í jɛ̄ uwɔ ɛ́ɛ́ ŋ́ nɛɛ? Alɔ kē kɛlā ga awɔ ɛmɛɛma kwɛyí nū.

¹²Ɔdí yá nɛ̄ a gē je ɔtū gicō ā, ɛ́ɛ́ nɛ̄ eyī kú uwɔ le pīya gɔɔ ā?

¹³Ɔdí yá nɛ̄ a gē cɔ̄nū da Ɔwɔicō nɛ̄ a gē lɔtū kɛlā ɛ́gɛ́nyā ŋmá okónu kú uwɔ lɛyíkwu ɔ́ ā?

¹⁴Ɔlɛɛcɛ í yá lɛbɛ̄ɛka ɔdā nōó le yēŋēē ā glá ŋ́. Ɔ̄cɛ dúúmā í kē le kpaakpa ɛgiyí Ɔwɔicō glá ŋ́.

¹⁵Ɔwɔicō í lɔtūce aálelékwū-ōtɛ̄hɔ̄ kú nū ā ŋ́. Ɔkpáncō nááná í kōō le yēŋēē tū Ɔwɔicō ŋ́.

¹⁶Ó lɛ ā, ɔdí wɛ ákú ɔ̄cɛ ɔlamu, nōo wɛ ɔdāhá klla le mu mla ɔdōbɔ̄bí ō yá ā. Ó tɔ́ɔtɛ́ lɛ ɔlɛɛcɛ ō yá ucē ɔ́bíipú bɛ̄ɛka éŋkpɔ̄ nōó gē gwá ā.

¹⁷Jāhɔ̄ ga um, ká n̄ ka ɛla ga uwɔ ka á pó. N géē da uwɔ ɛyí ɔdā nɛ̄ eyī kú um má ɛɛ́ mā.

¹⁸Ācɛ ojéeyī nwū um ɔdā nɛ̄ n jé ā ŋmá ɔdā nēé klɔ́ɔcɛ́ ŋmá ɛgiyí aádáádā uwá ā á.

¹⁹Aádáádā uwā ɔ́ɔmā nɛ̄ Ɔwɔicō je ajɛ ā lɛ uwá ā, ācɛ éwɔhá dúúmā í kē yá nɛ̄ uwá gē cīgbīhi kwu Ɔwɔicō ŋ́.

²⁰Ɔ̄cobɔ̄bíipú nōo ī pīya ācɛ ɔhá tū ā géē móōwē odúúdú oyēeyī kú nū, eko dóódu.

²¹Ó gē pó uya otūufi eko dóódu. Eko nōó gbɛlá ka anúɔ yɔ̄ ɛbɔ́ ā, ācɛ nēe ī héjulúgwu géē wā í tū ɔ̄ iyē.

²²Ó jé cāāā ka anúɔ í gáā kwu ŋmá ipú unwalu glá ŋ́. Amáŋ ó jé ka ɔ̄cɛ éyi ɔ́ɔ bī ɔkpacāŋ́gelī yɔ̄ í gbēyī nū kóō je ɔ́ ŋmó.

²³Epu kē í je okwu kú nū lé. Ó jé ka ɔ̄cɛ éyi ɔ́ɔ géē ŋmó anúɔ.

²⁴Unwalu mɛ́mla ákanya géē yá ɔ̄ ōwē bɛ̄ɛka ɛ́gɛ́nɛ̄ ɔcɛ́ éyi gē kpɛ́fú tú aólɛlā kú nū gē yá uwā ōwē ā.

²⁵Ohígbū koó lɛ abɔ̄ tū Ɔwɔicō ɔtū, klla lɛ abɔ̄ tū ɔtū lɛyíkwu Ɔwɔicō nōo lɔfú fíyɛ́ dúú ā.

²⁶Ɔ̄cobɔ̄bíipú ā ī yá īkpɛ̄yí olɔfú, ī bī ɔkplɛ́fú kú nū abɔ̄, ī kwinya gaá tū Ɔwɔicō iyē.

²⁷Ó le lé kwú jɔ̄kwū ŋmá lɛ agbénú nōó lɛ ā. Ó klla kwú pīya ɔdāhá, le jɔ̄kwū tū ipú nɛ̄hi ɛɛ́.

²⁸Ɔlɛ́ ɔ̄cɛ ɛ́gɔ́ɔmā nōo lɛ abɔ̄ tū ɔtū lɛyíkwu Ɔwɔicō ā géē je tá alácɛ̄, nōó géē nyɔ̄ í lā aígelī nɛ̄ ɔ̄cɛ dúúmā í lā ŋ́, nēe gáā wúlatāajɛ dúúdú ɛɛ́ mā.

²⁹Agbénú kú nū í gáā yɔ̄ gbojī ŋ́. Agbénú kú nū í klla gáā yɔ̄ piyóó ŋ́. Kwu anú mɛ́mla ojuju kú nū géē bī tāajɛ.

³⁰Ó géē kwú piíí. Ó géē lɛbɛ̄ɛka ɔcí nɛ̄ ɔlá kwú ābɔ̄ kú nū nōo yɔ̄ ī lu ā í yi ā. Owu nɛ̄ Ɔwɔicō géē fu klá anú ā kē í je ɔ́ kpó bónū.

³¹Ɔ̄cɛ ɔ́ɔmā ā kóō híī lɔtūce īyī nū kú anúɔ gbɛ nɛ̄hi ŋ́. Amāŋ ó yɔ̄ ī pla īyī nū.

³²Ó lɛbɛ̄ɛka ābɔ̄ kú ɔcí nōo gē ŋmó gbɔbū lɛ eko kú nū nōó klla ī pīya ɛ̄mɛ̄ɛ̄mɛ̄ ɔhá gɛ ŋ́ mā.

³³Ó géē lɛbɛ̄ɛka ɔcí ufáyin, nɛ̄ aíkpō nū gē gwō bónū gbɔbū ɛ́ɛ́ kéē pīya ā. Ó klla lɛbɛ̄ɛka ɔcí kú olīfu nɛ̄ ohéepu kú nū gē gwō bónū ā.

³⁴Ígwu kú ācɛ nēé kpɔ́tūce Ɔwɔicō ɛ́ɛ́ nēé gē jé Ɔwɔicō ŋ́ mā í gáā lɛ ayááyí ŋ́. Ɔlá klla í je ɔlɛ́ nēé gwó ŋmá omíci nēé mīyɛ lé ā kpó yi tāajɛ.

³⁵Ācɛ ɛ́gɔ́ɔmā gē gbo ohílīpú ō bī unwalu gē lɛ ācɛ, klla í yá ɔdōbɔ̄bí á. Ɔtū kú uwā kē le mu mɛ́mla ɔ̄cɛ ō plla.