Read idoma UJÓBU 16 Bible Online

UJÓBU 16 - idoma bible

UJÓBU 16

¹Anɔ́ɔ Ujóbu tóohi kahíníī,

²“N tɛtɛ pó ɔdā alɛwa ɛ́gɔ́ɔmā gbɔbū ɛɛ́. Ikɔkɔ nɛ̄ aá gē tá um ɔtū lé ā, aá bá ī cɛ̄ ga um má ɔnɔ tōōtɔ̄ɔ̄.

³Aá géē bá ī ka ɛlā ɛflɛ́ɛfu ga um gbóógbóō nɛ? Ɔdí yá nɛ̄ aá gē tóohi piíí ā?

⁴Ɔ́dāŋ ka a yɔ̄ āhɔ̄ kú um ā nɛɛ, ń géē yɛ í lɔfú kɛlā lɛ ā lɛyíkwu uwɔ dúú nɛ. Ń géē yɛ í lɔfú jíla ɛyí iyē lɛyíkwu uwɔ, klla kɛlā láyíí klá uwɔ ɛyí dúú nɛ.

⁵N géē lɔfú kɛlā alɛwa ga uwɔ nēe ī tá uwɔ ɔtū lé. Ɛlā nɛ̄ n gē ka ga uwɔ ā gē gbo uwɔ ɔtū nɛɛ, klla ī tá uwɔ ɔtú kwu ɔtú.

⁶Amáŋ ɔ́dāŋ ka n lɛ ɛlā ka nááná, ɔnɔ nɛ̄ um yɔ̄ ī jé ā í mɛ ŋ́ kpɔ́. Ɔ́dāŋ ka n lɛ okónu klá nááná, n kē yɔ̄ ī jé ɔnɔ ā kpɔ́.

⁷Ɔwɔicō, a le yá ka ɔfú iyē kú um kóō mɛ ɛɛ́. A klla kwú ācɛ ipíinu ɔlɛ́ um kpó ŋmó dúúdú ɛɛ́.

⁸Ɔwɔicō, a kwú pīya olɛlā kú um, lɛ um gbō, nɛ̄ n kwú nyinyi hile ikpokwú mɛ́mla ɔkpá ōfōōfūnū ɛɛ́. Ācɛ bī ɔ́ɔmā í cījáalí tū um ka amīyɔ yá ɔdōbɔ̄bí. Ka amíyɔ lé ɛpɔ̄bí kú ōwē nɛ̄ n yɔ̄ í má ā á.

⁹Ɔwɔicō le cɔ̄nū lɛ um yá lɛbɛ̄ɛka ɛ́gɛ́nɛ̄ ɛbɛ́ obɔ̄bí kú ipácí gē fa ɔ̄cɛ ā. Ó lɛ aīnu kwú akpokónu lɛyíkwu um bɛ̄ɛka ɔdā nōó gē wɔ́tū um, klla lɛ eyī kú ícɔ̄nū gbā kwu um gɛɛ.

¹⁰Ācɛ bā í cōkónu ga um gbɛdɛɛ. É le pīya tɔ̄ɔhá lɛyíkwu um klla bá ī tū um ɛ̄bɛ̄ kéē yá um ɛbɛ́.

¹¹Ɔwɔicō kwú um ú tá ipú abɔ̄ kú ācobɔ̄bíipú ɛɛ́. Ó kwú um ú lɛ uwá ɛɛ́.

¹²Ó tɛtɛ lɔhi gā um, amáŋ acígilí Óndú ā lɛ um oyēeyī fíyákátā. Ó lɛ abɔ̄ wu um ɔkɔ ká, le um fīyāajɛ lɛ um ca bɛ̄ɛka aklɛ ā.

¹³Ó le um yá lɛbɛ̄ɛka ɔdā nōó ī tá ɔyī cē ɔ̄ɔ̄ eko nōó ī nwū ɔ́tá ā. Ó le ɔyī tá cē um ŋmá ɛga dóódu. Ó klla le ɔyī tá cē um íkplí, lɛ um ɔhɛ ca bónū. Nááná ó ményinyi um ŋ́.

¹⁴Ó ī tū um iyē klla ī yá um ágbe alɛwa, lɛbɛ̄ɛka ícɔ́ɔja nōo gē nuunu tá olɛlā kú nū ā.

¹⁵N lɛ īlī ekwu gɔ̄ wiiyē. Ɔwɔicō klla le um yálé dúúdú ɛɛ́.

¹⁶Eyī kú um le kpá gɔɔ ohígbū ikwū nɛ̄ n je ā, klla le kpó mi nɛ̄ ń mɛ́ɛbɛ lɔhi gɛ ŋ́.

¹⁷Amáŋ ā, n kē yá ɔdōbɔ̄bí dúúmā ŋ́. N kē gē lɛ ojīlīmā ce Ɔwɔicō ipú ɔkɔ nɛ̄ um gē gbā lɛ ɔ́ ā.

¹⁸É lɛ um ŋmó ɛɛ́. Ɔdānyā kóō híī tayínū ŋ́. Ɔ̄cɛ dóódu kóō ci um ikwū nɛ̄ n yɔ̄ ī je kú Ɔwɔicō kóō lɛ ɛpɔ̄ okpaakpa hɛ́ ga um ā ŋ́.

¹⁹Ɔ̄cɛ éyi yɔ̄ ɔkpáncō nōo géē cɛ̄ɛpɔ̄ um. Īī, ó wɛ ɔkwɛ̄yi ka ɔ̄cɛ éyi yɔ̄ icō abɔ́ɔ nōo ī ka ka amíyɔ le kpaakpa á.

²⁰Aóklóbīya um bá ī yá um okónu. N gē pɛ́ agīje abɔ̄ n gē gbɔ̄ɔkɔ ka Ɔwɔicō kóō tá um abɔ̄ ā.

²¹Ɔ̄cɛ nōo ī cɛ̄ɛpɔ̄ um ā kóō gbɔ̄ɔkɔ lɛ Ɔwɔicō ohígbū um, ɛ́gɛ́nɛ̄ ɔ̄cɛ gē gbɔ̄ɔkɔ ohígbū aóklóbīya nū ā.

²²Eko kpií ā, n géē kwú, í ga ɔlékwū, nɛ̄ n kē gáā yēeyī gbóógbóō ɛ́ɛ́ gɛ ŋ́.