Read idoma UJÓBU 18 Bible Online

UJÓBU 18 - idoma bible

UJÓBU 18

¹Anɔ́ɔ Ubíldāadi, ɔ̄cɛ Ussúwa ā tá ɔ̄ ohi kahíníī,

²“Ujóbu, eko nya nɛ̄ a géē mā ɛlā nɛ̄ a yɔ̄ ī ka ā tá ā? Ɔ́dāŋ ka a ī gbo ohílīpú lɔɔlɔhi, alɔ lɔfú kɛlā mɛ́mla uwɔ.

³Ɔdí yá nɛ̄ a je alɔ, nēe wɛ aóklóbīya uwɔ ā, ka alɔ ɔ́ɔ líla lɛbɛ̄ɛka aɛ́bɛ́, nēé kɛlā glá ŋ́ mā tū īyī uwɔ ā?

⁴A yɔ̄ ī hɛ́ īyī uwɔ lé ipú ícɔ̄nū kú uwɔ icííci. Ɔ́ɔmā í gáā cɛ̄ lɛ ɛjɛ̄ɛ̄jī ācɛ nyɛ̄ɛ̄ ŋmá ɛcɛ ohígbū uwɔ ŋ́. Ó kē gáā kpó aápátɛ́cɔ̄ fu ŋmá ɛga nēé kwu ā ŋ́.

⁵Ɔkwɛ̄yi wɛ kéē géē yá oyēeyī kú ɔ̄cobɔ̄bíipú ā bɛ̄ɛka ɔ̄cɛ nēé kwú agege kú nū í nyí, í cɔ̄lá gɛ ŋ́ má.

⁶Ɔlá kú ɔlɛ́ nū kwú pīya obū. Agege nōo hayi ablɛ̄yí kú nū ā ge mí ɛɛ́.

⁷Anú nōo tɛtɛ ī yɛ lɔtūce īyī nū ā ī yāwu cécécéé abālɔbányā cɛ́ɛ́ kóō híī gwōnū ŋ́. Ɛlā nōo ī nwū ācɛ ā cɛ̄ lɛ ɔ́ má gwōnū ipú ojuju nōó yá ā.

⁸Ɛ́gɛ́nɛ̄ ó ī lā oyēeyī kú nū ā cɛ̄ lɛ ɔ́ le tá ipú unwalu, bɛ̄ɛka ɛ́gɛ́nɛ̄ ɔ̄cɛ gē bī ikpó abɔ̄yī nū gaá gwōtū ukpa, nɛ̄ ukpa ā kē ī kwú ɔ̄ ā.

⁹Ukpa lɛ ɔ́ ikpó kwú, klla bī ɔ̄ kli.

¹⁰É lɛ unwalu miya tū lɛ ɔwɛ nōó ī lā oyēeyī kú nū ā, lɛbɛ̄ɛka ɛ́gɛ́nɛ̄ é ī jē ukpa tayínū ipú ajɛ gbēyī ɔ̄cɛ ā.

¹¹Aɔ́dā nōo ī tūufi bá ī yá jīla ɔ́ tá biílí. Aɔ́dā ɔ́ɔmā kē bá ī kwūce ɔ́ eko dóódu, bɛ̄ɛka ewō nōo yɔ̄ ī nū ɔ̄cɛ yɔ̄ ī kwú ɔ̄ aīnu ikpó ā.

¹²Ɛmiyɛ í cɛ̄ lɛ ɔ́ lɔfú iyē gɛ ŋ́. Ífi kē ī yá ɔ̄ eko dóódu bɛ̄ɛka ɛ́gɛ́nɛ̄ oklóbīya ɔ̄cɛ gē kwu ɔ́ ajaajɛ piyóó ā.

¹³Ōcē obɔ̄bí gē je ɔ́ ɔkpíyē lé, ōcē oŋmɔ́ɔ̄cɛ kē ī je ɔ́ ikpó mɛ́mla abɔ̄ kpó lé bónū.

¹⁴Ikwū gē je ɔ́ ŋmá ɔlɛ́ nū nōó lā ɛbɔ́ ā, klla ī bī ɔ̄ gē lɛ ɔcɛ́ kú ɔlékwū.

¹⁵Ɔ̄cɛ dúúmā lɔfú lā ɔlɛ́ nū nōó tɛtɛ lā ā, eko nēé lɛ ōwō mi klá ɔlɛ́ ā kéē lɛ ōcē ā ŋmó bónū.

¹⁶Ó géē je yá lɛbɛ̄ɛka ɔcí nɛ̄ aɛ́gba kú nū ī wā ŋmá ipú ajɛ, jāā nɛ̄ aábɔ̄ kú nū kē ī je ŋmókókó ā.

¹⁷Odúúdú ācɛ ipú ɛcɛ gē je mlanyī nū, ɔ̄cɛ dúúmā í klla blakwu ɔ̄cɛ nōó wɛ ā gɛ ŋ́.

¹⁸É lɛ ɔ́ nū ŋmá ipú ācɛ nēe yēeyī ipú ɛcɛ nyā, ga ipú ajɛ odobū kú ɔlékwū.

¹⁹Ó lɛ ayí dúúmā ɛ́ɛ́ gɛ ŋ́, ɔ̄cɛ dúúmā í kē hile ɔlɛ́ nū nōó tɛtɛ lā ā ŋ́.

²⁰Ācɛ kú eyī ɛnɔ̄ɔ̄nɛ̄ mɛ́mla ācɛ kú ɛnɔ̄ɔ̄cī ā géē hídáagó kú ɔdā nōo yá ɔ̄ ā, okónu í kē gáā hɛ́ uwā ŋ́.

²¹Opiií ā, ɛ́gɔ́ɔmā nɛ̄ ahɔ̄ kú ɔ̄cobɔ̄bíipú ā gē bɔ̄bí lɛ ā á. Ācɛ dúúmā nɛ̄ é kē le ojīlīmā ce Ɔwɔicō ŋ́ mā kē ī ŋmɛ́yí lɛ ā dúú.