Read idoma UJÓBU 19 Bible Online

UJÓBU 19 - idoma bible

UJÓBU 19

¹Anɔ́ɔ Ujóbu tá ohi kahíníī,

²“Eko nyá nɛ̄ aá géē bā í yá um ɔdā olɔnɔ, klla bá ī bī ɛlā okónu kú aá yá um agbe gaá kwu lɛ ā a?

³Aá ca um ɛcá igbo alɛwa ɛɛ́. Uwēyī dúúmā í gē yá aá kú ɛ́gɛ́nɛ̄ aá gē yá um ōwē ā ŋ́ nɛɛ?

⁴Ɔ́dāŋ ka n lɛ ɔdōbɔ̄bí yá nááná, ɔ́ɔmā wɛ ɛlā um ōfōōfū um nɛ. Ó cíkā ó wɛ ɛlā aá ŋ́.

⁵Aá gē gbɛlá ka aá ɔ́ɔ fíyɛ́ um á. Aá kē ī gbɛlá ka ōwē nɛ̄ n yɔ̄ ī má ā ɔ́ɔ mafú ka amíyɔ lɛ ɔdōbɔ̄bí yá.

⁶Amáŋ aá le jé ka Ɔwɔicō ɔ́ɔ yá nɛ̄ n yɔ̄ ī móōwē nyā á. Ɔwɔicō bī ukpa kú nū le um kwú ɛɛ́.

⁷Nááná nɛ̄ n yɔ̄ ī dɛ̄gba ka ɔ̄cɛ éyi kóō lɛ um nyatá ā, ń má ɔ̄cɛ dúúmā tá um ohi ŋ́. N hīīgwú kú ɔ̄cɛ éyi kóō tá um abɔ̄, amáŋ ń má ɔ̄cɛ dúúmā hɛ́pɔ̄ kpaakpa gā um ŋ́.

⁸Ɔwɔicō lɛ ɔwɛ ŋmó tū um, anɔ́ɔ ó cɛ̄ gā um gaá yɛ ŋ́ má. Ó cɛ̄ lɛ ɔwɛ nɛ̄ n gē yɛ ā le dobū tū um.

⁹Ó mīyɛ um agbénú nɛ̄ n lɛ ā, klla kwú iyē olɔfú kú um nōo cɛ̄ lɛ ācɛ ī lɛ ojīlīmā ce um ā ú.

¹⁰Ó gē ca um tū ajɛ āyā dóódu bɛ̄ɛka ɛ́gɛ́nɛ̄ ɔ̄cɛ gē ca ɔlɛ́ jāā gbéeko nōó mɛ tāajɛ ā. Ó lɛ ɔdā nɛ̄ um leyīce ā fu ŋmá ajɛ bɛ̄ɛka ɛ́gɛ́nɛ̄ ɔ̄cɛ gē fu ɔcí ŋmá ajɛ ā.

¹¹Ó yɔ̄ ī cɔ̄nū lɛyíkwu um bɛ̄ɛka ɛ́gɛ́nɛ̄ ɔlá gē cɛ̄ klá ɔ̄cɛ ā. Ó gē yá um bɛ̄ɛka ɔdā nɛ̄ n wɛ olɛlā kú nū fíyɛ́ dúú ā.

¹²Ɔwɔicō gē tū aícɔ́ɔja kú nū ɛhɔ̄ wā í kpɛ́fú tá um. É bá ī tútū ō wā í nuunu tú um ɛga nɛ̄ n yɔ̄ ā.

¹³Ó lɛ ayínɛ́ um hɛ́ ŋmá ɛgiyí um. Odúúdú ācɛ nɛ̄ n jé kpɛ́mm ā í klla jé um gɛ ŋ́.

¹⁴Aɔ́máapú um mɛ́mla aóklóbīya um le pɛ́ kwu hɛ̄ um tá.

¹⁵Ācɛ nēe tɛtɛ ī gbɔɔga ɔlɛ́ um ā kwú mlanyī ɛɛ́. Ācocɛ̄hɔ̄ nɔ̄nyā kú um í gē tɛ́yíwāajɛ lɛ ɔ́da kú um gɛ ŋ́. É gē má um bɛ̄ɛka ɔdā nɛ̄ um wɛ ɔ̄cɛ éwɔhá ā.

¹⁶N hī ɔ̄cocɛ̄hɔ̄ nɔ̄nyīlɔ kú um igwú, amáŋ ó tá um ohi ɛ́ɛ́ gɛ ŋ́, nááná nɛ̄ n kōō gbɔ̄ɔkɔ lɛ ɔ́ kóō tū um abɔ̄ ā.

¹⁷Ípī kú owu nōo gē pɛ́ ŋmá okónu kú um ā gē wú ɔnyā um ɔtū. Ayínɛ́ um í kóō cɛ̄ ō túblá um ŋ́.

¹⁸Kwu ayí obene nááná gē yá um okónu. Eko dúúmā nɛ̄ n cāŋ́jɛ gáā nyɔ̄ nɛɛ, é gē yá um okónu.

¹⁹Odúúdú aóklóbīya um, nɛ̄ n kpɔ́tūce fíyɛ́ dúú ā gē wɔ́tū um. Odúúdú ācɛ nēe he um ɔtū nɛ̄hi ā kwú pɛ́ kwu hɛ̄ um tá.

²⁰Ń kwú nyinyi gaá hile aɔ́kpá klá ikpokwú ōfōōfūnū. Ó hile ligíí ká n̄ gēkwú ɛ́ɛ́ nɛ̄ n yēeyī kpɔ́ á.

²¹Aá ményinyi um mɛ́ɛ̄, aá nēe wɛ aóklóbīya um ā, ohígbū ka Ɔwɔicō lɛ abɔ̄ gɔ́ um fīyɛ̄ ajɛ ɛɛ́.

²²Ɔdí yá nɛ̄ aá gē yá um ōwē ɛ́gɛ́nɛ̄ Ɔwɔicō gē yá um ā? Aá yá um ɔdā olɔnɔ jɛ̄ ɛ́ ŋ́?

²³Eyī yá um kéē lɛ ɔkɔ nɛ̄ n gē ka lɛyíkwu Ɔwɔicō ā tá tāajɛ nɛɛ! É géē yɛ í lɛ ɔ́ tá tū ɔkpá nōo ī lé ɛcɛ gbojī!

²⁴Ɔ̄cɛ éyi kóō bī oje lɛ ɛlā kú um ā tá tū ápátɛ́cɔ̄, nōó géē yɔ̄ abɔ́ɔ gbóōgbóō!

²⁵N jé abɔ̄yī um ka n lɛ ɔ̄cɛ nōo ī cɛ̄ɛpɔ̄ um gē hɛ́pɔ̄hi ga um nōo yēeyī. Anú kē gē hɛ́pɔ̄ ámōōmɛ ipú ɛcɛ nyā á.

²⁶Abɔ̄ n yēeyī ipú iyē kú um nyā ā, n géē má Ɔwɔicō piíí, nááná nɛ̄ ōcē kwú ɔkpíyē kú um lé dúúdú ā.

²⁷Ami abɔ̄yī um géē bī īkpēyī kú um má ɔ̄ á. Ó kē í wɛ ɔ̄cɛ nɛ̄ n jé bɛ̄ɛka oklóbīya um ā. Eyī kú eko ɔ́ɔmā yɔ̄ ī ce um nɛ̄hi.

²⁸N jé ka aá gē da īyī aá ɔ̄kā kahíníī, ‘Ɔwɛ nyá nɛ̄ alɔ géē yá ɔ̄ nōó géē móōwē fíyɛ́ dúú ā? Anú hɛ́ odúúdú unwalu nyā klá īyī nū á.’

²⁹Amáŋ aá abɔ̄yī aá, aá kóō yúufi ícɔ̄nū kú Ɔwɔicō, nōo gē kɛpɔ̄ tū ācɛ ā. Ohígbū ka ícɔ̄nū kú Ɔwɔicó gē cɛ̄ lɛ ɔ́ yá ācobɔ̄bíipú italā. Cɛ́ɛ́ ka aá le jé ka Ɔwɔicō ɔ́ɔ gē kɛpɔ̄ tū ācɛ nōo ī yá ɔdōbɔ̄bí.”