Read idoma UJÓBU 20 Bible Online

UJÓBU 20 - idoma bible

UJÓBU 20

¹Anɔ́ɔ Usófa, ɔ̄cɛ Unáamā ā tóohi kahíníī,

²“Ɔtū yɔ̄ ī tū um cacaca, cɛ́ɛ́ ká n̄ lɛ ohi tá uwɔ ohígbū ɛlā nɛ̄ a ka ā.

³Ɛlā éyi nɛ̄ a ka ā, wɛ ɛcá ga um. Amáŋ abɔ̄ n jé odée ā, n jé ohi nū, nɛ̄ n gēe tá uwɔ.

⁴Á tɛtɛ húmáyī jé ŋ́ ka ŋmífī nɛ̄ Ɔwɔicó yá ɔlɛɛcɛ tū ipú ɛcɛ nyā ā,

⁵ka abahi mɛ́mla éeyē kú ācobɔ̄bíipú ā ɔ́ɔ yɔ̄ eko kpíí ōfōōfūnū ŋ́?

⁶Ɔ́dāŋ nōó kóō jɛ̄ jāā gaá kwu ɔkpáncō nááná, nɛ̄ ɛyí kú nū gaá kwu ojuja,

⁷ó géē bí tāajɛ dúúdú piyóó bɛ̄ɛka úmúlá áncā ā. Ācɛ nēe tɛtɛ jé ɔ̄ ā, í gaá jé ɛga nōó nyɔ̄ ā ŋ́.

⁸Ó géē mɛ ŋmá ajɛ bɛ̄ɛka ɔ̄na nɛ̄ ɔ̄cɛ gē nā eko nōó gē gbiyɔ̄lā ā, mɛ́mla ɔdā nɛ̄ ɔ̄cɛ gē má ipú ɔ̄na ā.

⁹Ācɛ nēe ī tɛtɛ má ɔ̄ ā mɛ́mla aíkonó kú ɔlɛ́ nū, í klla gáā má ɔ̄ɔ̄ igbɔhá gbóōgbóō gɛ ŋ́.

¹⁰Ayí nū géē gbo ɛfiyɛ kú ɔdā kú aógbɛhá nōó kpó uwī ā.

¹¹Nááná nōó lɛ ɔfú iyē nɛ̄hi kú ɔyípōklóbīya kpɔ́ ɛ́ɛ́ mā, ó géē kwú, é kē í je ɔ̄ nyi.

¹²Ɔdōōbɔ̄bí ō yá ī lɔnyɛ tū ɔ̄ bɛ̄ɛka ɛ́gɛ́nɛ̄ ɛnwú ī lɔnyɛ ipú okónu kú nū ā. Ó kē lɛ ɔ́ tá ɛháajɛ ígblɛ́nyī kú nū.

¹³Ó gē bī ɔ̄ okónu gbojī, í tíne ō mā ɔ̄ tá ŋ́, cɛ́ɛ́ ka ɔnyɛ kú nū kóō gbojī ipú okónu kú nū.

¹⁴Amáŋ eko nɛ̄ ɔnyɛ ā le tá ipú kú nū, ó géē je hɛ́ɛnɔ tū ɔ̄ ipú.

¹⁵Ó géē gbā agbénú nōó lɛ bū ɔwɛ ují ā kwúcē bɛ̄ɛka ɛ́gɛ́nɛ̄ ɔ̄cɛ gē gba ɔdōlé nōó le lé ā wā ɛcɛ ā. Ɔwɔicō géē mīyɛ ɔ̄ odúúdú nū kwúcē.

¹⁶Ɔdā nōó gē pi gwá ā wɛ ɛ́fa kú ogwiji. Ɛ́fa ā kē ī je ɔ̄ ŋmó.

¹⁷Ó gáā yēeyī nōó ī jɔ́ɔnyɛ igbɔhá nōo ī nwuné bɛ̄ɛka anɔ̄ ólīifu nōo í pɛ́ bɛ̄ɛka ísu ā ŋ́. Ó kē gáā má abahi nōo lɛbɛ̄ɛka enyāmɛ̄ɛna mɛ́mla ɛnwú nōo ī pɛ́ bɛ̄ɛka ɔkpá ā ŋ́.

¹⁸Odúúdú agbénú nōó móōwē nū ā géē hɛ́ ɔ̄ abɔ̄, gbɔbū ɛ́ɛ́ kóō le yá ɔdā dóódu lɛ īyī nū. Ó gáā jɔ́ɔnyɛ kú ile nōo lɛ ŋmá óbé nōó yá ā ŋ́.

¹⁹Ó lɛ ā ohígbū ka ɔ̄cobɔ̄bíipú ā le aólɛhá pīyatū, í klla lɛ ɛlá wu uwá ŋ́. Ó klla mīyɛ inu nōo wɛ ákú ɔ̄cɛ ɔhá tū ɔkwu áncā.

²⁰Ɔdā dúúmā nōó lɛ í gē jɛ̄ ɔ̄ ŋ́. Ohígbū ɔ́ɔmā, ó gáā kpó ɔdā dúúmā nōo he ɔ́ ɔtū tayínū glá ŋ́.

²¹Abɔ̄ unwū ɔdā kú nū le nwuné nɛ̄hi ā, ɔdā dúúmā í gē hile eko nōó le lé kwɛyí ŋ́. Ohígbū ɔ́ɔmā, abahi kú nū í gáā gbojī ō mɛ ŋ́.

²²Eko nōó le ɔdā dóódu lé cabá nááná, ó gáā lɛ omlɛ́nyɔ́ ŋ́. Ó géē móōwē nɛ̄hi.

²³Ó lɔfú yɔ̄ ī lé, lɛ ipú nū kwu ɔkɔ cii. Ɔwɔicó géē cɔ̄nū mɛ́mla anú í yá ɔ̄ɔ̄ italā. Ícɔ̄nū kú Ɔwɔicō ā géē yā klá ɔ̄ bɛ̄ɛka ɔdōlé nōó gē lé ā.

²⁴Ɔ́dāŋ koó le kwu nɛ̄ iyɛ́fú kú oje ɔlamu í ŋmó ɔ̄ ŋ́, é géē tá ɔyī nɛ̄ ɔkɔ́ kú nū wɛ oje udɔ gwū ɔ̄.

²⁵Ɔyī ā géē gwū ɔ̄ ŋmá iyɔ̄bū bɛ̄cɛ igbīhi kú nū. Ɔkɔ́ kú ɔyī nōo ī ceyī ā kē í bū ɔ̄ anyī bēhé. Cɛ́ɛ́ ufi nɛ̄hi kē lɛ ɔ́ kwú.

²⁶Odúúdú agbénú nōó lɛ ā géē kpó yíífi. Ɔlá nɛ̄ ɔlɛɛcɛ í tū ŋ́ mā géē je ɔ́ yi tāajɛ mɛ́mla odúúdú ācɛ nōo lā ɔlɛ́ nū ā.

²⁷Ɔkpáncō géē cījáalí tū ɔ̄ kóō lɛ ucē ɔ́bíipú yá. Ɛcɛ kē í cījáalí tū ɔ̄ lɛ ā dúú.

²⁸Éŋkpɔ̄ nɛ̄hi géē kpó ɔlɛ́ nū dúúdú, eko nɛ̄ Ɔwɔicó í cɔ̄nū géē kɛpɔ̄ tū ācobɔ̄bíipú ā.

²⁹Ɔwɛ nyā nɛ̄ Ɔwɔicō gē kɛpɔ̄ tū ācobɔ̄bíipú ā. Ífi nyā nōó miya kéē ŋmɛ́yí ipú nū ā.”