Read idoma UJÓBU 21 Bible Online

UJÓBU 21 - idoma bible

UJÓBU 21

¹Anɔ́ɔ Ujóbu tá ɔ̄ ohi kahíníī,

²“Jāhɔ̄ lɔɔlɔhi lɛ ɛlā nɛ̄ um lɛ ō ka ā. Ɔwɛ ɔ́ɔmā ōfōōfūnū nɛ̄ aá tá um ɔtū lé glá á.

³Aá lɛ ɔtū lé ga um, ká n̄ lɛ ɛlā ka. Eko nɛ̄ n le ka kwɛyí, cɛ́ɛ́ aá lɔfú yá um okónu gɔbū.

⁴Ń yá ikpɛ́lā tū ɔlɛɛcɛ ŋ́ mā, ohígbū ɔ́ɔmā, n gáā gbeyī cíí ŋ́.

⁵Aá lɛ eyī yɛ ɔdā nōo yɔ̄ ī yá um ā cɛ́ɛ́ okónu í gáā hɛ́ aá ŋ́. Ɔ́ɔmā kóō cɛ̄ lɛ aá lɛ okónu klá cííí.

⁶Eko dúúmā nɛ̄ n gbɛlá lɛyíkwu unwalu kú um, ó géē tū um ufi nɛ̄hi. Cɛ́ɛ́ iyē kú um dúúdú gbɔɔ́ ō fīyégbúlú.

⁷Ɔdí yá nɛ̄ Ɔwɔicō gē cɛ̄ lɛ ācobɔ̄bíipú í yēeyī gbojī ɛɛ́, nēé géē hīla klla í gbagbénú ā?

⁸É gē yēeyī ī má ayí uwā le jɛ̄, le ɔlɛ́ abɔ̄yī uwā lɛ. É klla ī má ayí kú ayí uwā bá ī jɛ̄ ipéyī uwá.

⁹É lā ɔlɛ́ uwā ɛbɔ́, é klla yúufi ɔdā dúúmā ŋ́. Ɔwɔicō í klla ī yá uwā italā ŋ́.

¹⁰Aɛ́na kú uwā gē yīpú eko dóódu nɛ̄ ɔbá ɛna lɛ uwá ce. É gē ma ɔyí, í klla ī plla ɔyí ŋ́.

¹¹Ayí ācobɔ̄bíipú nēe bá ā gē bá ī hijā kwinya yɛ bɛ̄ɛka ayí álá ā. Ayípɛ̄ ā gē jījē,

¹²klla bá ī gwíjē mla éeyē abɔ̄ ācɛ bá ī gwō uba mɛ́mla ɛ̄ngwū mɛ́mla ɛ́mula ā.

¹³Ācobɔ̄bíipú ɔ́ɔmā gē lɛ agbénú odúúdú oyēeyī kú uwā. É klla ī kwú ɛbɔ́.

¹⁴Amáŋ é gē da Ɔwɔicó ka ɔ́ɔ, mā aá tá cíí, ka aá ɔ́ɔ tíne ō jé ɔdā nōó tíne ka aá ɔ́ɔ yá ā ŋ́.

¹⁵É gē dɔ̄ɔ̄kā ka ɔnyɛ nɛ̄ Ɔwɔicō nōo lɔfú fíyɛ́ dúú ā ɔ́ɔ wɛ ɛ́ɛ́ nɛ̄ aá ɔ́ɔ géē gbā ɔ̄ ɛ̄gbā ā. Ka itene nyá nɛ̄ aá ɔ́ɔ géē le ŋmá lɛ ɔkɔ ō gbā lɛ ɔ̄ ā?

¹⁶Ācobɔ̄bíipú nēe bá ā gbɛlá ka aá ɔ́ɔ̄ gē bī abɔ̄ kú aá le yá abahi nɛ̄ aá ɔ̄ gē má ā á. Amáŋ ń cɛ̄ɛ̄lā kú uwá ŋ́.

¹⁷Ācɛ ɛ́gɔ́ɔmā í gē kwú ikwū agbaagbɔ ŋ́. Amíyā í gē híkpó du uwá ŋ́. Ɔwɔicō í gē cɔ̄nū da uwá ī cɛ̄ lɛ uwá móōwē gbóōgbóō ŋ́.

¹⁸Owu í gē kpó uwā bónū bɛ̄ɛka ácí ā ŋ́. Ofulúutu í wā wɛɛlɛ gaá je uwá ŋmá ajɛ nyɔ̄ bɛ̄ɛka igbóngbō ā ŋ́.

¹⁹Aá ka Ɔwɔicō gē je ulé kú ɔdōbɔ̄bí nɛ̄ ācobɔ̄bíipú nēe bá ā ɔ́ɔ yá ā tū gbēyī ayí uwā. Ɔwɔicō cíkā ō lɛ ulé cílá ācobɔ̄bíipú ā abɔ̄yī uwā, cɛ́ɛ́ keé lɛ ɛlā klɔ́ɔcɛ́ ŋmá anú.

²⁰Uwá abɔ̄yī uwā cíkā ō mīyɛ italā kú īyī uwā á. Ɔwɔicō nōo lɔfú fíyɛ́ dúú ā kóō le cɔ̄nū lɛ italā yá uwā lɔɔlɔhi.

²¹Ɔ̄cɛ nōo gekwū ɛɛ́ mā í gē lɛ ɛlá wū ɔdā nōo gē yá ācɛ ipíinu kú nū, eko nōó gekwú hɛ̄ uwá tá ŋ́.

²²Ɔ̄cɛ dúúmā í nwū Ɔwɔicō íjééyī glá ŋ́. Ohígbū ka anú gē hɛ́pɔ̄ kú aálelékwū nēe ī cɛ̄ ɔ̄ ɛhɔ̄ ɔkpáncō ā á.

²³Ācɛ ɛpa éyi lɔfú yɔ̄. Éyi kú uwā gekwú eko nōó lɔhi iyē lɔɔlɔhi. Ó yɔ̄ ɛbɔ́ í kē yúufi ɔdā dúúmā ŋ́.

²⁴Iyē kú nū kē le jɔ̄kwū lɔɔlɔhi ohígbū ɔdōlé olɔhi nōó lé ā. Ikpokwú kú nū kē le sɔɔɔ bɛ̄ɛka eko nōó wɛ ɔyípōklóbīya ā.

²⁵Amáŋ ɔ̄cɛ ɔhá ā í má abahi dóódu jéjéē ɛ́ɛ́ ŋ́. Ó lā oyēeyī klla kwú ipú ɔtūnōbí nɛ̄hi.

²⁶Amáŋ uwá ɛplɛ́ɛpa géē kwú, é géē nyi uwá, aɛ́kɔ̄ kē í je uwá ɛplɛ́ɛpa kpó lé.

²⁷N jé ɛlá obɔ̄bí nɛ̄ aá ī gbo lɛyíkwu um ā, mɛ́mla ojuju nɛ̄ aá gē yá ka aá yá um ɔdōbɔ̄bí ā.

²⁸Aá ī dɔ̄ɔ̄kā kahíníī, “Iní nɛ̄ ɔlɛ́ ɔ̄cɛ nɛ̄hi nōo gē bɔ̄bíipú ā yɔ̄ gɛ?”

²⁹Aá da ācɛ nēe gē ga iyāwu ā ɔ̄kā jéejéē ɛɛ́ ŋ́ nɛɛ? Aá jé ɔdā nēé gē ka ā ŋ́ nɛɛ?

³⁰É ka ɔdā dúúmā í gē yá ācobɔ̄bíipú ā eko nɛ̄ Ɔwɔicō le cɔ̄nū yɔ̄ ī yá ācɛ ɔhá italā ā ŋ́. É klla ī hɛ́ uwá tá eko nɛ̄ Ɔwɔicō ī cɔ̄nū ā.

³¹Ɔ̄cɛ dóódu í lɔtū da ɔ̄cobɔ̄bíipú ipéyī nū ka ucē nōó ī yá ā ɔ́ɔ lɔhi ŋ́. Ɔ̄cɛ dóódu í kē lɔtū cíla anú ulé kú ɔdōbɔ̄bí nō ī yá ā ŋ́.

³²Eko nēe bī ɔ̄ gaá nyɔ̄ í nyi ā, ācɛ alɛwa ī yɛce ɔ̄, iyɔ̄bū mɛ́mla igbīhi. Ācɛ gē gbō únóji kú nū. Ajɛ kú ipú únóji ā nááná gē gbo ɔ̄ iyē nɛɛ.

³⁴Ó lɛ ā, ɔdí yá nɛ̄ aá gbɛlá ka aá ī tá um ɔtū lé mɛ́mla ɛlā ɔdāhá kú aá ā? Odúúdú ohi nɛ̄ aá húmáyī í tá um ā wɛ ɛ̄kɛ̄mgbɛ̄ kpɛ́mm.”