Read idoma UJÓBU 22 Bible Online

UJÓBU 22 - idoma bible

UJÓBU 22

¹Anɔ́ɔ Ɛlífāasi, ɔ̄cɛ Utémān ā tá Ujóbu ohi kahíníī,

²“Ɔ̄cɛ lɛ ile dúúmā lɛ Ɔwɔicō glá ā? Kwu ɔ̄cɛ nōo jéeyī nɛ̄hi nááná í tīile dúúmā lɛ ɔ̄ ŋ́?

³Ɔ́dāŋ nɛ̄ a kōō wɛ ɔ̄cɛ nōo ī yá ucē okpaakpa nááná, ile nyā nɛ̄ ɔ́ɔmā géē tū lɛ Ɔwɔicō nōo fíyɛ́ dúú āa? Ɔdí nōó ī lɛ ŋmá anú ɔ́dāŋ nɛ̄ á lɛ ɛcá dúúmā ŋ́.

⁴A híī gbɛlá ka Ɔwɔicō ɔ́ɔ yɔ̄ ī kɛpɔ̄ tū anúɔ klla yɔ̄ ī yá anúɔ italā ohígbū ka anúɔ ɔ́ɔ gē gbā ɔ̄ kpaakpa ŋ́.

⁵Ó yɔ̄ ī yá uwɔ italā ohígbū ka ucē ɔ́bíipú nɛ̄ a yá ā lɛwa nɛ̄hi. Ɔdōōbɔ̄bí nɛ̄ a yá ā kē bɔ̄bí nɛ̄ɛ̄nɛ̄hi.

⁶A le ɔdōbɔ̄bí yá ohígbū ka a mīyɛ ayínɛ́ uwɔ odée kwɛyí ije nɛ̄ a le kplá uwá, nēé gbā glá ŋ́ mā. A klla lɛ uwá īlī plla, mā abɔ̄ uwā tá tóohɛ́ɛwa.

⁷A tá ō je éŋkpɔ̄ lɛ ācɛ nɛ̄ ijēēnyi gē ŋmó uwá ā. Á klla je ɔdōlé lɛ ācɛ nɛ̄ ɛmiyɛ gē ŋmó uwá, lé ŋ́.

⁸A cɛ̄ lɛ ācɛ nēe lɔfú ā mīyɛ ajɛ kú ācɛ nēe lɔfú ŋ́ mā. Anɔ́ɔ aóklóbīya uwɔ kē lā ajɛ ɔ́ɔmā á.

⁹Eko nɛ̄ anyōkwu dɔ̄ɔ̄kā otábɔ̄ ŋmá ɛgiyí uwɔ, a gē lɛ uwá tá abɔ̄ áncā ŋmá ɛgiyí uwɔ. A kōō ī pīya ayókwū tū dúú.

¹⁰Ɔdā ɔ́ɔmā yá ɛ́ɛ́ nɛ̄ unwalu yɛ uwɔ jīla tá, ɛ́ɛ́ nɛ̄ ufi gē mu uwɔ ipú hile acígilí ā á.

¹¹Ajɛ kwú dobú tū uwɔ nɛ̄ á klla mɛ́ɛbɛ glá ɛɛ́ gɛ ŋ́. Éŋkpɔ̄ nɛ̄hi klla le cēenyi kwú uwɔ mulɛ.

¹²Abɔ̄ Ɔwɔicō yɔ̄ icīīcō ɔkpáncō ā, nɛ̄ a má ɛ́gɛ́nɛ̄ aínyílɔ́ɔwɔ bá icīīcō lɛ ā,

¹³anɔ́ɔ a gē kahíníī, “Ɔwɔicō í jé ɔdā nōo ī yá ā glá ŋ́.” “Ɔwɔicō í kɛpɔ̄ tū ɔ̄cɛ dúúmā glá ŋ́ ohígbū ka ojuja odobū lɛ ɔ́ hɛ́ ŋmá ɛcɛ”

¹⁴A gbɛlá ka ojuja odobū ɔ́ɔ gáā cɛ̄ lɛ ɔ́ má ɔdā dúúmā ŋ́, eko nōó gē yāwu ɛga nɛ̄ ɔkpáncō mɛ́mla ɛcɛ jīla ā.

¹⁵A lɛ ɔtū kú uwɔ ŋmó tá ō yá ucē nɛ̄ ācobɔ̄bíipú gē yá ā nɛɛ?

¹⁶Ɛ́gɛ́nɛ̄ éŋkpɔ̄ nɛ̄hi gē kpó ɔlɛ́ ā, ɛ́gɔ́ɔmā nɛ̄ uwá gē kwú ikwū agbaagbɔ gbɔbū lɛ eko kú uwā á.

¹⁷Ācɛ ɛ́gɔ́ɔmā wɛ ācɛ nēe gē da Ɔwɔicō ka ɔ́ɔ mā aá tá cíí. Ka anú nōo lɔfú fíyɛ́ dúú ā ɔ́ɔ yá aá ɔdā dóódu glá ŋ́ má.

¹⁸Nááná, Ɔwɔicō ɔ́ɔmā piií ā kē kpó agbénú nɛ̄hi nēé lɛ ā lɛ uwá á. Amáŋ ń jɛ́yí ɛ́gɛ́nɛ̄ ācobɔ̄bíipú lɛ ā ŋ́.

¹⁹Ācɛ okpaakpa ā géē gwéeyē eko nēé má ka Ɔwɔicō ɔ́ɔ lɛ ācobɔ̄bíipú yá italā. É géē yɛhɛ klla í yá uwā okónu.

²⁰Ɔdā dúúmā nɛ̄ ācobɔ̄bíipú ā lɛ ā le kpó yíífi ɛɛ́, ɔlá kē kwú ɔdā dóódu nēé gwū ɔ̄ tá ā ú kpó yi ɛɛ́.

²¹Lɛ ɛbɔ́ yá mla Ɔwɔicō ká ā le pīya oklóbīya nū. Cɛ́ɛ́ Ɔwɔicō géē gbɔɔ́ ō je ɔdōōlɔhi gā uwɔ.

²²Mīyɛ ɛlā nɛ̄ Ɔwɔicō abɔ̄yī nū gē nwū uwɔ ā, ká ā kwú ɛlā kú nū ú tayínū ipú ɔtū kú uwɔ.

²³Ɔ́dāŋ ka a le pīyabɔ̄ kwú ɔtū ú cē Ɔwɔicō, ó géē je uwɔ pīya ɛdɔ ɔ̄cɛ nɛ̄ a tɛtɛ wɛ ā igbɔhá kpɔ́. Ā cɛ̄ kéē yá ucē obɔ̄bí ɔlɛ́ uwɔ ŋ́.

²⁴Je ugóolu nōo lɔhi fíyɛ́ dúú ā bɛ̄ɛka ajɛ áncā, ámāŋ ka aɛ́cɔ̄ kú ipú ísu ā.

²⁵Cɛ̄ ka Ɔwɔicō nōo lɔfú fíyɛ́ dúú ā kóō he uwɔ ɔtū lɛbɛ̄ɛka ugóolu ā ga uwɔ. Kóō klla jɛ̄ uwɔ eyī lɛbɛ̄ɛka oje nɛ̄hɛ́ nēé le tikwū bá ā.

²⁶Ó le lɛ ā, cɛ́ɛ́ Ɔwɔicó nōo lɔfú fíyɛ́ dúú ā, géē gbɔɔ́ ō yá káā gwéeyē nɛ̄hi. A klla géē je eyī kú uwɔ gicō má Ɔwɔicō mla ɔtū péee glá.

²⁷Eko nɛ̄ a lɛ ɔkɔ gbā lɛ ɔ́, ó géē tá uwɔ ohi kú ɔkɔ nɛ̄ a gbā ā, cɛ́ɛ́ a le okónu nɛ̄ a ce ā yá jīla lɛ ɔ́ dúú.

²⁸Ɔdā dúúmā nɛ̄ a tíne ō yá ā, géē yá lɔhi ɛ́gɛ́nɛ̄ a tíne lɛ ā ā. ɛga dúúmā nɛ̄ a nyɔ̄, ɔlá géē fíyajɛ ɔwɛ nɛ̄ a ī yɛ ā.

²⁹Eko dúúmā nɛ̄ Ɔwɔicō lɛ ācɛ tú wāajɛ, a gē ka ɔ́ɔ yá ɔ́ɔmā ohígbū ɔbɔ́ɔ̄cɛ kú uwā. Amáŋ ɔwɛ ɔ́ɔmā nōó gē bī le hɛ́ uwā tá á.

³⁰Abɔ̄ Ɔwɔicō gē hɛ́ ɔ̄cɛ nōo yá ɔdōbɔ̄bí dúúmā ŋ́ mā tá lɛ ā á, ó kē í nyā uwɔ tá ɔ́dāŋ ka á yá ɔdōbɔ̄bí dúúmā ŋ́.