Read idoma UJÓBU 23 Bible Online

UJÓBU 23 - idoma bible

UJÓBU 23

¹Anɔ́ɔ Ujóbu tá ɔ̄ ohi kahíníī,

²“Nááná n yɔ̄ ī ka ífulá lɔfú lɔfú lɛyíkwu Ɔwɔicō kpɔ́, ohígbū ka Ɔwɔicō yɔ̄ ī yá um italā kpɔ́ nááná nɛ̄ n yɔ̄ ī tíifu ā.

³Eyī yá um ká n̄ lɛ ɛga nɛ̄ n gēe má Ɔwɔicō ā jé. Cɛ́ɛ́ ń yɛ í le tá ɛga nōo ī kɛpɔ̄ ā.

⁴N géē yɛ í lɛ ɔkɔ kú um ka lɛ ɔ́, klla lɛ ɛpɔ̄ dóódu nɛ̄ n lɛ ō ka ā ka lɛ ɔ́ dúúdú.

⁵N gēe yɛ í lɛ ohi nōó lɛ ō tá um ā pó mɛ́mla ɛ́gɛ́nɛ̄ ó géē tá ohi lɛ ā.

⁶Ó géē bī ɔfú nɛ̄hi le yá ikpɛ́lā tú um nɛɛ? Ŋ́ŋ, ó géē jāhɔ̄ gā um, í pó ɛlā nɛ̄ n géē ka ā.

⁷Eko nɛ̄ n lɛ Ɔwɔicō má ɔ́ɔmā, ó géē pó ɔkɔ nɛ̄ n géē ka ā, ohígbū ka ń yá ɔdōbɔ̄bí dúúmā ŋ́. Cɛ́ɛ́ Ɔwɔicō nōo ī kɛpɔ̄ tū um ā géē hɛ́ um tá piyóó ka amíyɔ í yá ɔdōbɔ̄bí dúúmā ŋ́.

⁸Amáŋ n dɔ̄ɔ̄kā nū ɛnɔ̄ɔ̄cī, ó kē yɔ̄ abɔ́ɔ ŋ́. Ń klla má ɔ̄ ɛnɔ̄ɔ̄nɛ̄ eko nɛ̄ n dɔɔ̄kā nū abɔ́ɔ ā ŋ́ dúú.

⁹Eko nōó yɔ̄ í yúklɔ́ ɛhíícō ā, ń kē má ɔ̄ ŋ́. Eko nōó klla le pīyeyī le tá ɛháajɛ ā, ń kē má ɔ̄ glá ŋ́ kpɔ́.

¹⁰Amáŋ ó jé ɔwɛ dóódu nɛ̄ n gē yɛ ā. Eko nōó lɛ um jámá kwɛyí, n géē le yēŋēē bɛ̄ɛka ugóolu ā.

¹¹N gē yɛce ɔ̄ ɔwɛ ɛga nōó gē yɛ ā. N gē yɛce ɔwɛ kú nū nōó mafú gā um ā kpaakpa, í kē nyā ŋmá anú ŋ́.

¹²Ń nyɛ̄ ŋmá íne nōó je ga um ā ō yá ŋ́, amáŋ n lɛ ɔdā nōó da um ka amíyɔ yá ā tá ɔtū, ō yá ɔ̄ kpaakpa.

¹³Amáŋ ɔ́dāŋ kóō le ŋmó tá ipú ɔtū kú nū ka anúɔ ī yá ɔdā dóódu, ó géē yá ɔ̄ ga ajaajɛ. Ɔ̄cɛ dóódu í kē pīya ɔtū abɔ̄ glá ŋ́. Ɔdā dúúmā nōo he ɔ́ ɔtū ā, nōó gē yá á.

¹⁴Ó géē yá ɔdā nōó miya lɛyíkwu um ā jīla. Ó kē lɛ ojuju alɛwa lɛyíkwu um kpɔ́.

¹⁵Anú yá ɛ́ɛ́ nɛ̄ n yɔ̄ í yúufi nū á. Eko nɛ̄ n lɛ ɛlá gbo kwu Ɔwɔicō, ufi kóō jīla mɛ́mla anú gē yá um.

¹⁶Ɔwɔicó cɛ̄ lɛ ɔtū yɔ̄ í hɛ́ um ko. Ɔwɔicó nōo lɔfú fíyɛ́ dúú ā, yɔ̄ ī tū um ufi á,

¹⁷ó wɛ obū ŋ́. Ń mā ō dɛ̄ tɛ́ɛcɛ ŋ́ nááná nɛ̄ obū nɛ̄hi klá um eyī, í cɛ̄ ga um mɛ́ɛbɛ ŋ́ mā.