Read idoma UJÓBU 24 Bible Online

UJÓBU 24 - idoma bible

UJÓBU 24

¹Ɔdí yá nɛ̄ Ɔwɔicō nōo lɔfú fíyɛ́ dúú ā í tū ɛ̄cī nōó í kɛpɔ̄ tū ācobɔ̄bíipú ŋ́ mā? Ɔdí yá nɛ̄ ācɛ nēe gē gbā ɔ̄ ɛ̄gbā ā, í gē má ɔ̄ yɔ̄ ī kɛpɔ̄ tū ācobīyíne ŋ́ mā?

²Ācɛ gē cē ajɛ kú ɔ́mpā uwā tū ákú uwā. Ācɛ nēe bá piíí ā bá ī kpó aɔ́dāajɛ kú ācɛ ɔhá uwī, ī bī uwā jɛ̄ mɛ́mla ákú uwā ā.

³É gē kpó aíjakī kú ayókwū ā uwī. É klla gē mīyɛ ɛna kú ɔnyōkwū kwɛyí ɔdā nēé le kplá ɔ̄ ā, gē bī ɔ̄ jāā gbéeko nōó le gbā.

⁴É cɛ̄ lɛ aógbɛhá yá ɔdā nēé lɛ íkwu ō yá ā ŋ́. É klla cɛ̄ lɛ ódúudú aógbɛhá kú ipú ajɛ ā le pɛ́ kwu nyɔ̄ í tayínū.

⁵Cɛ́ɛ́ aógbɛhá ā lā ipú ígbíli bá ī yɛ bá ī tíne ɔdōlé ipú ígbíli lɛbɛ̄ɛka aíjakī ipácí ā. Ɔwɛ nyā ōfōōfūnū nēé gē má ɔdōlé je lɛ ayí uwā lé ā.

⁶Abɔ̄ é má ɔdā dúúmā ɔhá ō yá gɛ ŋ́ mā, aógbɛhá nyā bá ī ce ɔdɛ̄hɔ̄ nɛ̄ ācɛ ce hile ā ŋmá ipú ɛhɔ̄ kú ācɛ ɔhá. É klla bá ī ce ɔdɛ̄hɔ̄ ohile kú ācobɔ̄bíipú ɔ́ɔmā.

⁷Abɔ̄ uwá ī lɛ īlī ŋ́ mā, é gē tóohɛ́ɛwa gbiyɔ̄lā otú gbɔ́ɔ̄cī ipú ofu.

⁸Ɔwɔ ohīlaŋdɔ́ nōo gē yā klá ɛyí ɛfu ā gē jɛ̄ uwā. É gē kwu gaá lɛ iyē bá ápátɛ́cɔ̄ kú iyē kóō kwɔ́lá lɛ uwá ohígbū ka uwá í lɛ ɔlɛ́ dúúmā ŋ́.

⁹Ācobɔ̄bíipú ā gē mīyɛ ayípɛ̄ kú aógbɛhá kwɛyí ulé nēé bī uwā, nēé gbā glá ŋ́ mā. É klla ī fu ayókwū obene okónu ŋmá amɛ kéē kpó uwá pīya aɔ́fiyɛ kwɛyí ulé nɛ̄ okwūmā ádā uwā bī uwā ā.

¹⁰Abɔ̄ aógbɛhá ā í má īlī le wiiyē ŋ́ mā, é tóohɛ́ɛwa bā ī yɛ, bī ɛmiyɛ ipú bá ī ce ɔdɛ̄hɔ̄ lɛ ācɛ ɔhá.

¹¹É bā í yá anɔ̄ ŋmá ikpɔ̄cí kú ólīifu kwu aɔ́cí kú olīifu kú ācobɔ̄bíipú ā ajaajɛ. Abɔ̄ é bá ī yá ejé ŋmá īkpɔ̄cí ufáyin ā, ijēenyi gē ŋmó uwā, amáŋ é lɔtū gwá ŋ́.

¹²Ācɛ nēé le yá agbe, nēe bá ī kwú ā bá ī tíifi, klla bá ī jikwū hī Ɔwɔicō kóō tá uwā abɔ̄ ipú igelī ā. Amáŋ Ɔwɔicō í lɛ ɛlá wu ɔdōbɔ̄bí nɛ̄ ācɛ nɛ̄hi ā bá ī yá aógbɛhá ā ŋ́.

¹³Ācobɔ̄bíipú ā wɛ ācɛ nēe gē wɔ́tū eyōonyā á. É tá ō yɛ ɔwɛ nōo ɔlá gē fíyajɛ anú ā. É kē gebí ŋmá ɔwɛ ɔ́ɔmā ɛɛ́.

¹⁴Eko nɛ̄ ajɛ le dobū kpɔ́ ɛ́ɛ́ mā, ɔ̄coŋmɔ́ɔcɛ ā gē cāŋjɛ, kóō nyɔ̄ gaá ŋmó olɛhá, nōo lɛ ɔdā dóódu ŋ́ mā. Eko nɛ̄ otú le bī, ó kē nyɔ̄ gaá gbɔɔ́ ō wūwī.

¹⁵Ɔ̄cɛ nōo ī cikpó ɔnyā ɔhá gē leyīkwu ɛcɛ gē gbeyī ka ajɛ kóō gbɔɔ́ ō dobū. Ó kwú īlī ú klá īyī nū eyī, cɛ́ɛ́ ó gbɛlá ka ɔ̄cɛ dúúmā ɔ́ɔ gaá má anúɔ glá ŋ́.

¹⁶Otú ā, ācɛ gē ca inu kú ācɛ, nyɔ̄ ī wūwī. Amáŋ é gē kwu tayínū ɔlɛ́ɛnɔ, ohígbū ka ɔlɛ́ɛnɔ í je uwā iyē ŋ́.

¹⁷Eyōonyā gē tū uwā ufi, amáŋ ɔdā otūufi kú otú ā le jé uwā iyē.

¹⁸Usófa, a ka ɔ̄cobɔ̄bíipú ā lɛbɛ̄ɛka ūwū nōo ce eyī enyi yɔ̄ ī nyɔ̄ ā. Ka Ɔwɔicō ɔ́ɔ le okónu tá lɛ ajɛ nōo wɛ ákú nū ā. Ohígbū ɔ́ɔmā ɔ̄cɛ dúúmā í klla ga ipú ɛhɔ̄ kú nū ā gaá yúklɔ́ ɛ́ɛ́ gɛ ŋ́.

¹⁹Ɛ́gɛ́nɛ̄ ébú gē mɛ tāajɛ eko nɛ̄ ɛnɔ le bɛ̄cɛ ā, ɛ́gɔ́ɔmā nɛ̄ ɔ̄cobīyíne ā gē bí tāajɛ ga ɔlékwū á.

²⁰Ɛ́nɛ́ nōo ma ɔ̄ ā í blakwu ɔ̄ ŋ́. Ɛkɔ̄ géē je okwū kú nū lé, é klla ī je yíífi lɛbɛ̄ɛka ɔcí nēé le hɛ́ wāajɛ ā.

²¹Ɔ̄cɛ ɛ́gɔ́ɔmā gē cɛ̄ lɛ anyōkwū nōó mɔ̄yí glá ŋ́ mā móōwē, í klla ī gbonɛnɛ lɛ ɔ́ ŋ́.

²²Amáŋ Ɔwɔicō lɔfú ō je ɔ̄cɛ olɔfú ā pi nyɔ̄. Eko nɛ̄ Ɔwɔicō cāŋ́jɛ, oyēeyī kú ɔ̄cobɔ̄bíipú ā mɛ.

²³Ɔwɔicō lɔfú cɛ̄ lɛ ɔ́ lā ipú ɛbɔ́ eko kpiíí ā glá, amáŋ eyī kú nū kwu ɔ̄ɔ́ mɛ́mla ɔdā dóódu nōó gē yá ā gɛɛ eko dóódu.

²⁴Ɔ̄cobɔ̄bíipú gē je pīya ɔ̄cɛ nɛ̄hi eko kpiíí ā, cɛ́ɛ́ ó klla gebí tāajɛ. Ó kwú tú dɔɔlɔ klla kwú cá lɛbɛ̄ɛka ododó nōo kwú ŋmɔ́lá ā.

²⁵Ɔ́dāŋ ka ɛlā nɛ̄ n ka ā ī wɛ ɔkwɛ̄yi ŋ́, ɔ̄cɛ éyi kóō le mafú gā um ka amíyɔ wɛ ɔ̄cokɛ̄mgbɛ̄. Kóō le mafú ka ɛlā nɛ̄ n ka ā wɛ ɛ̄kɛ̄mgbɛ̄.”