Read idoma UJÓBU 27 Bible Online

UJÓBU 27 - idoma bible

UJÓBU 27

¹Ujóbu klla gbɔɔ́ ō kɛlā nyɔ̄ ɔbū kpɔ́.

²“N gbo Ɔwɔicō, nōo yēeyī ā, anú nōó cɛ̄ lɛ ɔdā okpaakpa nōo cíkā gā um ā yá um ŋ́ mā. Anú klla cɛ̄ gā um yɔ̄ ī jé ɔnɔ ipú oyēeyī kú um ā.

³Abɔ̄ Ɔwɔicō cɛ̄ gā um yɔ̄ ī fu owu, nɛ̄ n le oyēeyī kpɔ́ ɛ́ɛ́ mā,

⁴okónu kú um í gāa kɛlā ɛ̄kɛ̄mgbɛ̄ dúúmā ŋ́, ɛɛ́ nɛ̄ n gē plla ɔ̄cɛ dúúmā ŋ́.

⁵Ń gáā cɛ̄ ka aá bā ī kɛlā okpaakpa gbóógbóō ŋ́. Jāā gbéeko nɛ̄ ikwū ŋmó um, ń gáā cɛ̄ gbóōgbóō ka n yá ɔdōbɔ̄bí ŋ́.

⁶N jé ka n le kpaakpa, ń kē gáā cɔ̄nyā koó lɛ ā ŋ́ gbóōgbóō ŋ́. Jāā gbéeko nɛ̄ ajɛ klá um, ɔtū kú um í gáā ŋmó um ɛpɔ̄bí ŋ́.

⁷Ɔwɔicō kóō yá aólɛlā kú um nēe ī bɛ̄yíkwu um ā italā, lɛbɛ̄ɛka ɛ́gɛ́nɛ̄ ó gē yá ācobɔ̄bíipú nēe yá ɔdōbɔ̄bí ā.

⁸Eyīyōce nyá nɛ̄ ɔ̄cɛ nōó jé Ɔwɔicō ŋ́ lɛ eko nɛ̄ Ɔwɔicō lɛ ɔ́ ŋmó āa?

⁹Ɔwɔicō í gáā pó ɔkɔ kú nū eko nɛ̄ unwalu ga nōó gē jikwū kú otábɔ̄ ŋ́.

¹⁰Ɔwɔicō ō gbā í he ɔ́ ɔtū ŋ́. Ó gē gbɔ̄ɔkɔ lɛ Ɔwɔicō ŋ́.

¹¹N géē ma ɔfú kú Ɔwɔicō fú ga uwɔ. N géē nwū uwɔ ɔdā nōo wɛ ɔtū kú Ɔwɔicō, nōo lɔfú fíyɛ́ dúú ā.

¹²Odúúdú aá kē le ɔdā nēe bá ā má ɛɛ́, ɔdí yá nɛ̄ aá kē ī kɛlā nōó lɛ ɛyí ŋ́ mā?”

¹³“N géē da uwɔ ɛ́gɛ́nɛ̄ Ɔwɔicō í yá ācobɔ̄bíipú ā italā, mɛ́mla ulé nōó gē cílá ācɛ nēe ī lɔnɔɔtū ā.

¹⁴Ɔ́dāŋ koó lɛ ayí lɛ lɛwa, é géē kpó odúúdú uwā ŋmó ɔgbɛ́fú. Ayí nū í gáā má ɔdōlé lé jɛ̄ gbóógbóō ŋ́.

¹⁵Ōcē obɔ̄bí géē je odúúmā kú ayí ɔ̄cobɔ̄bíipú nēe hile ā kpó ŋmó, anyā uwā í kē gáā jikwū uwá ŋ́.

¹⁶Ɔ̄cobɔ̄bíipú ā lɔfú le ije nɛ̄hɛ́ tīkwū klá ajɛ gónóó bɛ̄ɛka ɔjɛ ā. Ó kóō lɔfú lɛ īlī alɛwa nɛ̄hi.

¹⁷Amáŋ ó gáā yēeyī lɛ uwá wiíyē ŋ́. Ɔ̄cɛ okpaakpa éyi gáā le wiíyē á. Ācɛ nēé ī yá ɔdōbɔ̄bí dúúmā ŋ́ mā, gáā je ije kú nū ā kpó kɔ̄ á.

¹⁸Ɔlɛ́ nɛ̄ ɔ̄cobɔ̄bíipú ā gwó ā le pɛkɛpɛkɛ lɛbɛ̄ɛka ɔlɛ́ ɔlákápá ā. Ó klla lɛbɛ̄ɛka áklɔ̄kpɛ nɛ̄ ɔ̄cɛ gē klá anú ī gbo ɛhɔ̄ ā.

¹⁹Igbo amōōmɛ, ó gaá gwutá ɔ̄cɛ olɛ agbénú, eko nōó kwú heyī ā, ó klla lɛ agbénú dúúmā gɛ ŋ́.

²⁰Ɔdā otūufi í wā í klla anú wuu bɛ̄ɛka éŋkpɔ̄ nōo ī kpó ɔlɛ́ ā. Ofulúutu nɛ̄hi géē wā í je ɔ́ nyɔ̄ otú.

²¹Owu nōo ŋmá ɛnɔ̄ɔ̄cī ā kwú ɔ̄ ú lɛ ɔ́ kpó nyɔ̄. Ó lɛ ɔ́ kpó ŋmá ɔlɛ́ nū.

²²Owu nyā ī tá klá anú mɛ́mla odúúdú ofú kú nū abɔ̄ ó yɔ̄ ī nya ō kwu ā.

²³Owu géē dɛ̄ tū ɔ̄, bɛ̄ɛka ɔ̄cɛ nōo yɔ̄ gē yá ɔ̄ okónu ā, klla yɔ̄ ī tá ɔjī tū ɔ̄ ɛbɛɛbɛ.