Read idoma UJÓBU 28 Bible Online

UJÓBU 28 - idoma bible

UJÓBU 28

¹Ó wɛ ɔkwɛ̄yi ka aɔ́gɔ̄ bá nēé ī bū oje nɛ̄hɛ́ ŋmá uwá. Ɛga nēé kē ī ja ugóolu klla ī na ɔ̄ péee ā yɔ̄ dúú.

²É gē bū oje ɔlamu ŋmá ajɛ, é kē ī na oje upu ŋmá ɛcɔ̄.

³Ācɛ gē bī agege ga ipú ɔ̄gɔ̄ odobū ā. É gē tíne oje jāā ga ɛga nēé bu nyɔ̄ glá ā, klla bā ī tíne aɛ́cɔ̄ ā ipú obū ā.

⁴É gē bu aɔ́gɔ̄ kú oje ā ɛga nōo ligbó ŋmá ɛga nɛ̄ ācɛ lā ā. Ācɛ nēe ī ga iyāwu ā í kōō jé ɔwɛ abɔ́ɔ ŋ́. É gē lɛ ɔ́ŋgbá tū uwā ohí ɛ́ɛ́ nēé gē ga ipú ɔ̄gɔ̄ ā nyɔ̄ í bū oje ā á.

⁵Ɛyí ajɛ nɛ̄ ɔdɛ̄hɔ̄ gē jɛ̄ á, amáŋ ɛháajɛ kú nū lɛbɛ̄ɛka ɔlá lɛ ɔdā dóódu wu klá icō ā.

⁶Ācɛ gē pīyɛ ɔtángbédē ŋmá aɛ́cɔ̄ kú ipú ajɛ, é kē ī pīyɛ ugóolu ŋmá ipú úmlá kú nū.

⁷Ígbáanɔ nēe ī wu icō ā dúúmā í jé ɔwɛ kú ɔ̄gɔ̄ nēé ī bū oje ŋmá anú ā ŋ́. ēpū dúúmā ī kē má ɔ̄ jéjéē ɛ́ɛ́ ŋ́.

⁸Ɛbɛ́ ipácí dúúmā í gē yɛ ɔwɛ ɔ́ɔmā ŋ́. Ágábá nááná í kōō ī bū ɔ̄ ŋ́.

⁹Ācɛ nēe ī bū ɔ̄gɔ̄ ī tíne oje ā gē bu ɔ̄gɔ̄ tū ɛcɔ̄ nōo lɔfú nɛ̄hi ā, klla ī je ɛgba kú aɛ́fu bū tɛ́ɛcɛ péee á.

¹⁰Abɔ̄ é gē bu ɔ̄gɔ̄ tū ipú ɛcɔ̄ ā, é ī leyī tá ɛcɔ̄ dóódu kē ī pīyɛ ɔdā agbénú dúúmā.

¹¹É gē tū ɔka tū ɛga nɛ̄ aísu hútu ŋmá ā, klla ī bī ɔdā nōo tayínū ā wɛ̄ɛcɛ péee kéē má ɔ̄.

¹²Amáŋ iní nɛ̄ ɔ̄cɛ géē pīyɛ̄ íjééyī ŋmá? Iní nɛ̄ ɔ̄cɛ géē jé ɛyí odée ŋmá?

¹³Ɔ̄cɛ í má íjéeyī ipú ɛcɛ nyā glá ŋ́. Ɔ̄cɛ dúúmā í jé ɛ́gɛ́nɛ̄ ó tīile lɛ ā ŋ́.

¹⁴Á gáā pīyɛ íjéeyī ŋmá ɛga nōo lipú fíyɛ́ dúú kú itekwú ā ŋ́.

¹⁵Á lá ɔ̄ glá ŋ́, ɔ́dāŋ nɛ̄ a kōō bī ugóolu mɛ́mla ije nɛ̄hɛ́ nááná.

¹⁶Ɔ̄cɛ ī bī ugóolu nōo lɔhi fíyɛ́ dúú ā, ámāŋ ɛcɔ̄ nōo gbɔɔ́lá fíyɛ́ dúú ā le kwū ɔ́lá nū glá ŋ́.

¹⁷Íjéeyī tīile fíyɛ́ ugóolu mɛ́mla ogigo nōo lɔhi ā á. Anú klla tīile fíyɛ́ aɔ́ká nēe gbɔɔ́lá nɛ̄hi ā á.

¹⁸Aɔ́tángbédē nēe lɔhi fíyɛ́ dúú ā í tīile bá lɛ íjéeyī ŋ́.

¹⁹Ɛco ogbɔɔ́lá nēé hī ka Utɔ́pāsi nēé bī ŋmá Itiyópīya ā, mɛ́mla ugóolu nōo lɔhi fíyɛ́ dúú ā í tōō bī le gbla anú ŋ́.

²⁰Ó lɛ ā, iní nɛ̄ ɔ̄cɛ kē ī lɛ íjéeyī ŋmá ā? Iní nɛ̄ ɔ̄cɛ kē ī jɛ́yí odée ŋmá āa?

²¹Íjéeyī tayínū ŋmá īkpēyī kú odúúdú aɔ́dā nēe lɛ oyēeyī ipú ɛcɛ ā. Aígbáanɔ nēe gē wu icō nááná í kōō má ɔ̄ glá ŋ́.

²²Ofu nū ōfōōfūnū nɛ̄ ācɛ nēe bá ɔlékwū ā pó ā.

²³Ɔwɔicó ōfōōfūnū jé ɔwɛ nɛ̄ ɔ̄cɛ gē le jééyī ā á. Anú ōfōōfūnū jé ɛ́gɛ́nɛ̄ ɔ̄cɛ ī le lɛ íjééyī á.

²⁴Ohígbū ka Ɔwɔicō í mɛ́ɛbɛ jāā ga aɛ́ga nɛ̄ ɛcɛ ŋmɛ́yí ā, klla ī má ɔdā dóódu nōo yɔ̄ ɛháajɛ ɔkpáncō ā.

²⁵Eko nɛ̄ Ɔwɔicō ī ka ɛ́gɛ́nɛ̄ owu lɔfú lɛ ā, klla ī miya éŋkpɔ̄ nōo yɔ̄ ipú ojuja ā,

²⁶eko nōó ī tīíne lɛ ɔwɔ ká ɛ́gɛ́nɛ̄ ó géē yā ā, mɛ́mla eko nōó ī tá ɔwɛ lɛ akpáabana nōó gē yɛ ā,

²⁷eko ɔ́ɔmā, ó lɛ ɛlā ā jila, ó má ɛ́gɛ́nɛ̄ íjééyī tīile lɛ ā, anɔ́ɔ ó cɛ̄ mɛ́mla anú á.

²⁸Ɔwɔicō da alɛɛcɛ kahíníī, “Ojīlīmā ō le ce Ɔwɔicō wɛ íjéeyī á. Ucē obɔ̄bí ō mā ɔ̄ tá ō yá kē wɛ ɛyí odée ō jé á.”