Read idoma UJÓBU 29 Bible Online

UJÓBU 29 - idoma bible

UJÓBU 29

¹Anɔ́ɔ Ujóbu gbɔɔ́ ō kɛlā gɔbú kpɔ́ á. Ó kahíníī,

²“Eyī yá um ká n̄ kwúcē ga ipú ahɔ̄ nɛ̄ n tɛtɛ yɔ̄ ɛpléeko nōo gaá yɛ, nɛ̄ Ɔwɔicō ī leyīkwu um lɔɔlɔhi ā.

³Eko ɔ́ɔmā, ó gē cɛ̄ lɛ agege kú nū fíyajɛ ɔwɛ nɛ̄ n gē yɛ ā. Ó kē ī bī ofíyajɛ kú nū le bī um jé ɔwɛ bū ipú obū.

⁴Eko nɛ̄ n wɛ ɔyípōklóbīya ā, Ɔwɔicō wɛ oklóbīya um. Ó kē ī lɛlákwu um.

⁵Eko ɔ́ɔmā Ɔwɔicō nōo lɔfú fíyɛ́ dúú ā tɛtɛ yɔ̄ pi um, odúúdú ayí um kē yɛ um jīla tá.

⁶Eko ɔ́ɔmā, enyi amɛ pɛ́ ga um cabácabá ɔwɛ dóódu, anɔ̄ kú olīifu kē kpɔ ga um.

⁷Eko nɛ̄ anyākwɔ́cɛ le jīla ɔɔ́pu kéē gbɛ́lākwu, nɛ̄ n gaá cīce,

⁸ayípōklóbīya ā gē má um, gē je ɛga gā um. Anyākwɔ́cɛ klla ī cāŋjɛ háyi icō jāā gbéeko nɛ̄ n gaá cīce, kéē le ojīlīmā ce um.

⁹Aótrɛ̄yí ā ī má ɛlā ō ka ŋ́ klla ī kpó okónu kú uwā klá.

¹⁰Ācɛ nɛ̄hi kú igelī ā nááná gē klá okónu dúú.

¹¹Ɔ̄cɛ dúúmā nōo lɛ ɔkɔ kú um pó lɛ ɛlā ka gē cɛ̄tra um, ɔ̄cɛ dúúmā nōo kē lɛ um má, kē ī ka olɔhi lɛyíkwu um.

¹²Aógbɛhá dóódu nōo gē jikwū gaá tū um kú otábɔ̄ ā, n gē tá uwá abɔ̄, ī hɛ́ uwá tá. N klla ī tá ayókwū nēé lɛ ɔ̄cɛ nōo ī tá uwá abɔ̄ ŋ́ mā abɔ̄.

¹³Ācɛ nēe bá ipú unwalu nōo lɛ uwá ŋmó igbō ā, ī cā okónu ga um klla ī lɛ ahɛ mīyɛ um abɔ̄. Otábɔ̄ nɛ̄ n yá anyōkwū ā gē cɛ̄ lɛ ɔtū kóō he uwá.

¹⁴N gē yá ucē okpaakpa bɛ̄ɛka ɛ́gɛ́nɛ̄ a gē lɛ awulú wiiyē, ī lɛ īlī gbō ɛyí ā.

¹⁵N gē bī aópeyī jé ɔwɛ, klla ī bī aócīkpó ā yɛ.

¹⁶N lɛ ɛlá kwu aógbɛhá ā bɛ̄ɛka ádā uwā ā. N klla ī cɛ̄pɔ̄ aúgbɔga eko nēé lɛ ɛpɔ̄ ō ka.

¹⁷N gē cē ācɛ nēe ī yá ɔdōbɔ̄bí ā abɔ̄, klla ī mīyɛ ācɛ nēé kwú ā ŋmá uwā abɔ̄.

¹⁸N da īyī um ka n géē yēeyī gboji géē gbo ókplícī, klla í kwú ɔlɛ́ um ɛbɔ́.

¹⁹N lɛbɛ̄ɛka ɔcí nōo kwu éŋkpɔ̄ ajaajɛ, nɛ̄ ébú gē cē klá abɔ̄ kú nū otú gbɔ́ɔcī ā.

²⁰Ācɛ ā bá ī cɛ̄tra um eko dóódu, n kē yɔ̄ ī lɔfú iyē eko dóódu.

²¹Eko dúú nɛ̄ n gē nwū ācɛ ɛlā, é gē jāhɔ̄ cíí gē gbēyī ɛlā nɛ̄ n gē ka ā.

²²Eko dúú nɛ̄ n kwú ɛlā ú ka ɛɛ́, é klla lɛ ɛlā ɔhá ō ka kwu ɔ́ gɛ ŋ́. Ɛlā kú um gē pɛ́ tū uwá iyē bɛ̄ɛka ɛ́gɛ́nɛ̄ éŋkpɔ̄ ɔwɔ gē ga ajɛ nōo le ŋmó ā.

²³É gē gbēyī um bɛ̄ɛka ɛ́gɛ́nɛ̄ é gē gbēyī ɔwɔ ā. É klla gē gbēyī um bɛ̄ɛka aɔ́glɛ̄ɛ̄jí nēe ī gbēyī ɔwɔ amōōmɛ ā.

²⁴Ɔ́dāŋ nɛ̄ n kpó ɛhɛ mɛɛ mla uwá, ó gē yá uwā eyījii, ohígbū kéē kpéyīce ŋ́. Ɛ́gɛ́nɛ̄ eyī kú um ŋmá lɛ ā gē tú uwā ɔtū kwu ɔtū.

²⁵Ami gē kpó uwā trɛ̄yí, klla ī da uwā ɔdā nēé ī yá ā á. N lá ipú uwā bɛ̄ɛka ɔcɛ́ ipú aícɔ́ɔja kú nū ā. N gē tū uwā ɔtū lé bɛ̄ɛka ɔ̄cɛ nōo ī tū ācɛ nēe bá eyíkwū ɔtū lé ā.