Read idoma UJÓBU 30 Bible Online

UJÓBU 30 - idoma bible

UJÓBU 30

¹Amáŋ abālɔbányā, ācɛ nēe bá ī yá um ɛbɛ́ ā wɛ ɛnɛ̄ńcɛ́ kú um. Ācɛ nɛ̄ aádā uwā wɛ ɛflɛ́ɛfu, nɛ̄ n gáā cɛ̄ lɛ uwá tá aéwō kú um abɔ̄ gbō aálá[4] gā um ŋ́ mā.

²É tīile dúúmā gā um ŋ́. Ohígbū ka uwá ī lɔfú abɔ̄ dúúmā gɛ ŋ́.

³Ācɛ nēe bá ā kwu ɛhá nɛ̄ɛnɛ̄hi nɛ̄ ɛmiyɛ gē ŋmó uwā otú ipú ígbíli, nēé kē ī lé ɛgba kú ɔcí nōo le ŋmó ā.

⁴É bá ī fu ɔcí mɛ́mla ácí kú ígbíli ŋmá ajɛ, gē lé. É kōō ī lé ɛgba kú ɔcī kú ufiye dúú.

⁵Ācɛ lɛ uwá nū ŋmá ipú uwā, klla bá ī cíla okwúlu tū uwā bɛ̄ɛka aúwī ā.

⁶É bá ī tíne ō lā áklō kú ɔ́glɔ́ kú ɔkpá, mɛ́mla ipú ɔ̄gɔ̄ ipú ajɛ mɛ́mla ɔ̄gɛ̄cɔ̄.

⁷É bá ī yúuya ipácí yáwúyáwú bɛ̄ɛka aɛ́bɛ́ ipácí ā, klla bá ī kwu bá īyī uwā kú ofū kóō ŋmó uwā ŋ́.

⁸É wɛ ígwu kú aólíla, nɛ̄ ɔ̄cɛ dúúmā í jé uwā ŋ́. Ācɛ kē lɛ ogbló kpó lɛ uwá nū bēhé ɔlɛ́.

⁹Amáŋ abālɔbányā ayí uwā bá ī yá um okónu. N klla kwú pīya ɔdā ō yá ɛbɛ́ kú uwā.

¹⁰É bá ī yá ihilɛ um, klla lɛ ɔkwu tū ɔ́nɔ́ɔ́nú. É kōō ī wā í tá ahɛ klá um eyī dúú.

¹¹Abɔ̄ Ɔwɔicō lɛ um ɔtā cē bá um ɔtū, nɛ̄ ń yá ɔdā dúúmā glá gɛ ŋ́ mā, eko dúú nēé lɛ um má, é yá um ɔdā dóódu nōo he uwá ɔtū.

¹²Ɛwa kú uwā ā bá ī tū um iyē ŋmá abɔ̄lɔ́ná, cɛ̄ gā um gbɔɔ́ ō kwinya. É bá ī fīyɛ̄ um odée gē tíne ō ŋmó um.

¹³É lɛ ɔwɛ ŋmó tū um kú n kwu ŋ́, kéē lɛ um bī wāajɛ dúúdú. É kē cɛgbá ɔ̄cɛ dúúmā ō tá uwā abɔ̄ ŋ́.

¹⁴É pɛ́ wā í nuunu tú um bɛ̄ɛka ɛ́gɛ́nɛ̄ aícɔ́ɔja gē ca ɔdɔ kú igá kú igelī, gaá kpɛ́fú tú ācɛ igelī ā. Abɔ̄ ɔdɔ ā yɔ̄ ī ca wāajɛ ā, é bá ī pɛ́ wā kwuu.

¹⁵Ufi nɛ̄hi le um kwú. Ojīlīmā nɛ̄ ācɛ ī le ce um ā mɛ bɛ̄ɛka owu nɛ̄ ɔ̄cɛ mu ā. Eyī nɛ̄ n yɔ̄ ī ce ka n gē yálé ā mɛ bɛ̄ɛka ojuja nōo ī je kpó owu ā.

¹⁶Abālɔbányā, n yɔ̄ ī kwú ɛmɛɛma ɛɛ́. Ōwē nɛ̄hi bī um kli ɛ̄cī dóódu.

¹⁷Otú odúúdú aíkpokwú kú um gē lɔnɔ tū um. Ɔnɔ nōo ī cɛ̄ gā um móōwē, í kē ī mɛ ŋ́ otú gbɔɔ̄cī.

¹⁸Ɔwɔicō kpákli bī um ɔfɔ́ɔ́fú, lɛ um kwú, klla lɛ um ɔkpíyē nya nukwunukwu. Ɔkpíyē kú um bá um iyē bɛ̄ɛka ɔkɔ kú úwé kú um ā.

¹⁹Ó lɛ um fīyɛ̄ ajɛ ipú ɔ́tɔ̄ kwɔ. Ɔwɔicō lɛ um tú wāajɛ ɛɛ́.

²⁰Ɔwɔicō, n jikwū klá awɔ, amáŋ á tá um ohi ŋ́. N gbɔ̄ɔkɔ̄ gā uwɔ, amáŋ á jāhɔ̄ ga um ŋ́.

²¹A yɔ̄ ī lɔnɔɔtū nɛ̄hi gā um. A klla bī odúúdú ofú kú uwɔ yɔ̄ ī yá um ōwē.

²²A cɛ̄ lɛ owu lɛ um hɛ́ kpá, klla kwú um ú ce ɛyí nū yɔ̄ ī nyɔ̄. A cɛ̄ lɛ owu nɛ̄hi yɔ̄ ī tá um gicō gajɛ.

²³N jé ka a yɔ̄ ī bī um lɛyíkwu ɔlékwū, ɛga nɛ̄ odúúdú ācɛ gē jīla piíí ā.

²⁴Ń yá ɔ̄cɛ dúúmā nōo yɔ̄ ī móōwē, nōo kē hī um igwú kú otábɔ̄ ā ɔdōbɔ̄bí jéjéē ɛ́ ŋ́.

²⁵N jikwū igbalɛwa ohígbū ācɛ nēe bā ipú unwalu ā. Ɔtū kē bīya ga um ohígbū aólɛhá.

²⁶Amáŋ eko nɛ̄ n leyīce abahi ā, ákanya nɛ̄hi wā ā. Eko nɛ̄ n gbēyī ofíyajɛ ā, obú wā á.

²⁷Ɔtū kú um le wu klá icō. Ɛ̄cī dóódu n yɔ̄ ī móōwē gbóōgbóō.

²⁸Ɔtū le gbenyi gā um, ɛnɔ í kē cɛ̄ kóō tū um ɔtū lé ŋ́. N cāŋjɛ ipú ójīla yɔ̄ ī jikwū kú otábɔ̄.

²⁹Ŋmá ikwū nɛ̄ n gē je ā n kwú pīya ɔyínɛ́ nɛ̄ncɛ́ kú aógbo, mɛ́mla oklóbīya kú aókokoŋ́kofí.

³⁰Ɔkpíyē kú um kwú tóóbí fiyuu yɔ̄ ī fō bónū, iyē kú um klla le kwɔ́lá gbáyíí ā.

³¹Ijē nɛ̄ n bī ɛ̄ngwū mɛ́mla ɛ́mla kú um gwō glá ōfōōfūnū ā wɛ ákú ācɛ nēe ī jikwū klla bá ekwu ā.