Read idoma UJÓBU 31 Bible Online

UJÓBU 31 - idoma bible

UJÓBU 31

¹N lɛ ɔkpá ce iyī um ka ń gáā hɔ́ɔkɔ ɔyípɔ̄nɔ̄nyā dúúmā ŋ́.

²Ɔwɔicō nōo lɔfú fíyɛ́ dúú, nōo yɔ̄ ɔkpáncō, ɛga olicō fíyɛ́ dúú ā, í gáā cíla um ulé olɔhi kú ɔ́ɔmā ŋ́.

³Ɔwɔicō gē cɛ̄ lɛ ífi yá ācobɔ̄bíipú ā.

⁴Ɔwɔicō jé ɔdā dóódu nɛ̄ n gē yá, ó kōō ī ka áluka ikpó nɛ̄ n gē fu ā.

⁵N jé ka ń yá ucē ɔbíipú dúúmā ŋ́. N kē ī plla ɔ̄cɛ ŋ́.

⁶Ɔwɔicō kóō lɛ ɛpɔ̄ kú um ka kpaakpa. Ó géē má ka ń lɛ́pɔ̄bí kú ɔdōbɔ̄bí dúúmā ō yá ŋ́.

⁷Ɔ́dāŋ ka n nyɛ̄ɛ̄ ŋmá ɔwɛ nɛ̄ Ɔwɔicō ka ó le kpaakpa ā, nɛ̄ ɔtū kú um kwú pīya kwu eyīfuúfuú kú ɔdōbɔ̄bí nɛ̄ eyī kú um má ā, ámāŋ nɛ̄ n jégēdē le ine bīya,

⁸ayíka ācɛ ɔhá kéē kwu ɔdɛ̄hɔ̄ nɛ̄ n nyi ā í lé, ámāŋ ká ɔdɛ̄hɔ̄ nōo ī jɛ̄ gā um ā kóō le bīyatāajɛ.

⁹Ɔ́dāŋ́ ka um le únwū ɔnyā ɔ́mpā um yá, nɛ̄ n gaá yɔ̄ ī tɔ́ɔtɛ́ nū ō cikpó nū,

¹⁰ayíka ɔnyā um kóō lɛ pīya ɔnyā ɔ̄cɛ ɔhá, ī yá ɔdōlé lɛ ɔ́, ka ɔ̄cɛ ɔhá kóō kē cíkpó ɔnyā um.

¹¹Ɔ́dāŋ nɛ̄ n le ikpó ɔnyā ɔ̄cɛ ɔhá ce, ɔ́ɔmā géē wɛ ínē obɔ̄bí nɛ̄hi ō kpó. Ó wɛ ɛdɔ íne ō kpó néē ī bī íne le yá ɔ̄cɛ italā kú nū.

¹²Ikpó ɔnyā ɔhá gwū ɔnyā um tá ō ce lɛbɛ̄ɛka ɔlá nɛ̄hi ā, nōo géē yi um í jē um yíífi. Ó klla í je ɔdā dóódu nɛ̄ n lɛ ā yi tāajɛ.

¹³Eko nɛ̄ ācocɛ̄hɔ̄ kú um lɛ ífulá ka lɛyíkwu um, n gē jāhɔ̄ lɛ uwā, klla gē yá lɛ uwá ɛ́gɛ́nɛ̄ o cíkā ā.

¹⁴Ɔ́dāŋ ka ń yá lɛ ā ŋ́, abɔ̄ ó lɛ ɛ́ɛ́ nɛ̄ n géē leyīkwu Ɔwɔicō eyī glá? Ɔdí nɛ̄ n géē da Ɔwɔicō eko nōó gaá gbɔɔ́ ō da um ɔ̄kā?

¹⁵Ɔwɔicō ékpónú nōo yá um ā, anú yá ācocɛ̄hɔ̄ kú um á. Anú yá ɔ́na kú ami mɛ́mla uwá ipú aɛ́nɛ́ alɔ á.

¹⁶Ń tá ō tá aólɛhɔ́cɛ abɔ̄ jéejéē ɛ́ɛ́ ŋ́. N kē ī yá ka anyōkwū kéē leyīce odée eko dóódu.

¹⁷Ń kē mā ayókwū tá lɛ ɛmiyɛ ŋmó uwā, eko nɛ̄ n lɛ gē lé ā ŋ́.

¹⁸Ŋmífī nɛ̄ n wɛ ɔyípɛ̄ ā, n gē leyīkwu ayókwū tɛnɛ́ɛ́ bɛ̄ɛka ɔdā nɛ̄ n wɛ ádā uwā ā. Ŋmífī nɛ̄ n kē jé īyī um ɔ̄cɛ ā, n kē húmáyī leyīkwu anyōkwū.

¹⁹Eko dúú nɛ̄ n má olɛhɔ́ɔ̄cɛ nōó lɛ īlī ō le wiiyē ŋ́, nōo ofu gáā je ɔ́ ŋmó,

²⁰n gē je īlī nēé bī ɔnwū aálá kú um tá ā lɛ ɔ́ kóō le wiiyē. Cɛ́ɛ́ ó gē cɛ̄tra um.

²¹Ɔ́dāŋ ka n lɛ ɔyókwū dúúmā pīyatū, ohígbū ka n jé ka n lɛ ācɛ nēe ī hɛ́pɔ̄hi gā um ɛga okɛpɔ̄,

²²ayíka éē lɛ um abɔ̄ kpó cē, kéē lɛ uwá kpó fa ŋmá ácábɔ̄ kú um.

²³Ohígbū ka n gē yúufi Ɔwɔicō ā, kóō í cɛ̄ lɛ ámíyā yá um ā, ń yá ɛdɔ ɔdā ɛ́gɔ́ɔmā glá ŋ́.

²⁴Ń kpɔtūce agbénú jéjéē ɛ́ɛ́ ŋ́, ámāŋ ka ije wɛ ɔdā nɛ̄ n gbolócē á jéjéē ɛ́ɛ́ ŋ́.

²⁵Ń kē yá ɔbɔ́ɔ́cɛ ka n lɛ agbénú lɛ nɛ̄ɛ̄nɛ̄hi ŋ́.

²⁶Ń má ɛnɔ, abɔ̄ ó yɔ̄ ī fíyáajɛ, ámāŋ́ ka ɔyā, ɛ́gɛ́nɛ̄ ó tū ɛgahi yɔ̄ ī yɛ icō lɛ ā,

²⁷cɛ́ɛ́ ka n gbɔɔ́ ō yá únwū ō gbā uwā ɛ̄gbā jééjéē ɛ́ ŋ́.

²⁸Ɔ́dāŋ ka n̄ le yá lɛ ā nɛɛ, ó géē yɛ í wɛ ucē ɔ́bíipú nōo wɛ ínē ō kpó nēé í yá um italā kú nū. Ohígbū ka ɔ́ɔmā lé ka n tá Ɔwɔicō abɔ̄yī nū ɛɛ́.

²⁹Ɔtū í he um eko nɛ̄ aólɛlā kú um ī móōwē, ɛ́ɛ́ nɛ̄ ɔtū gē he um eko nɛ̄ ífi gbo ce uwá ŋ́.

³⁰Ń yɛ í le íne bīya ɔ́dāŋ ka ń yɛ í lɛ ɔkɔ gbā ká olɛlā kú um kóō gekwú. Amáŋ ń yá lɛ ā ŋ́.

³¹Ɛjɛ̄ɛ̄jī ācɛ ɔlɛ́ um jé ka ɔ̄cɛ dúúmā nōo gā ɛgiyí um, gē lé ɔdōlé nɛ̄ n gē je lɛ ɔ́ ā jāā gbéeko nōó le ipú nū.

³²Ń gē cɛ̄ lɛ aúgbɔga gbo ɛcɛ ŋ́, amáŋ n gē nwūla ɔwɛ ɔlɛ́ um lɛ uwá eko nēé bá ī ga iyāwu nɛ̄ otú le bī uwā.

³³Ācɛ ɔhá gē je íne nēé bīya tayínū, amáŋ ń lɛ abɔ̄ klá ákú um jéejéē ɛ́ɛ́ ŋ́.

³⁴Ń yúufi kú ɔdā nɛ̄ ācɛ gē ka ŋ́, ɛ́ɛ́ nɛ̄ n gē lɛ okónu klá, tayínū ipú inu, ohígbū ka n gē yúufi kéē ī yá um ɛbɛ́ ŋ́.

³⁵Kpái, ɔ̄cɛ éyi kē í yɛ í jāhɔ̄ lɛ ɔdā nɛ̄ n gē ka ā. Ɔwɔicō nōo lɔfú fíyɛ́ dúú ā í kē yɛ í lɛ ohi tá um. N lɛ abɔ̄ tá ɔkpá ka ɛlā nɛ̄ n ka ā wɛ ɔkwɛ̄yi. Eyī yá um kéē lɛ ɛlā nɛ̄ ācɛ nēe ī bɛyíkwu um ā tū bá um ā tá tū ɔkpá.

³⁶N yɛ í kwú uwā í klá ácábɔ̄ kú um bɛ̄ɛka īlī, ámāŋ kwú uwā í klá ɛyí bɛ̄ɛka ɔfulā ā.

³⁷N géē da Ɔwɔicō ɔdā dóódu nɛ̄ n yá ā. N géē hayi iyɔ̄bū nū bɛ̄ɛka ɔ̄cɛ ojīlīmā ā.

³⁸Ɔ́dāŋ ka n mīyɛ ajɛ ɛhɔ̄ nɛ̄ n gē hɛ́hɔ̄ anú ā ŋmá abɔ̄ aóndú nū ā uwī,

³⁹nɛ̄ n lɛ ɔdɛ̄hɔ̄ kú ajɛ ɔ́ɔmā lé, nɛ̄ aɔ́glɛjí nēe hɛ́hɔ̄ ā bá ɛmiyɛ,

⁴⁰ayíka ikɔkɔ nɛ̄ igwu amáŋ ka ocikāpā gē bū, ajɛ̄ɛ̄hɔ̄ ā kóō kwú bū ɔha mɛ́mla ujē.” Ɛlā nɛ̄ Ujóbu yɔ̄ ī ka ā mɛ ɛɛ́.