Read idoma UJÓBU 32 Bible Online

UJÓBU 32 - idoma bible

UJÓBU 32

¹Abɔ̄ Ujóbu le kpaakpa, í klla yá ɔdōbɔ̄bí dúúmā ŋ́ tū īyī nū ā, aóklóbīya nū ɛtá ā mā ō tá ɔ̄ ohi.

²Amáŋ ɔyípōklóbīya éyi háyi abɔ́ɔ yɔ̄ ī pó ɛlā nēé bá ī ka ā. Iyē kú nū le ka Ɛlíhu, ɔyí kú Ubárākelu, nōo ŋmá ipɔ́ɔ́nū kú Urám, ɔ̄cɛ ipɔ́ɔmā kú Ubúsi ā. Ó le cɔ̄nū lɛyíkwu Ujóbu nɛ̄hi, ohígbū koó yɔ̄ ī hɛ́pɔ̄hi lɛ īyī nū, klla yɔ̄ ī ŋmó Ɔwɔicō ɛpɔ̄bí.

³Ó klla le cɔ̄nū lɛyíkwu aóklóbīya kú Ujóbu ɛtá ā dúú, ohígbū ka abɔ̄ é máfu lɛ Ujóbu ka anú ɔ́ɔ yá ɔdōbɔ̄bí ā glá ŋ́ mā, é lɛ ɔ́ yá lɛbɛ̄ɛka ɔdā nɛ̄ Ɔwɔicō ɔ́ɔ yá ɔdōbɔ̄bí ā.

⁴Ɛlíhu gbēyī uwā kéē le ɛlā ka kwɛyí ɛ́ɛ́ kóō kɛlā lɛ Ujóbu ohígbū ka uwá wɛ anyākwɔ́cɛ lɛ ɔ́ á.

⁵Amáŋ abɔ̄ ó má ka ācɛ ɛtá ā í klla má ohi dúúmā tá Ujóbu ɛ́ɛ́ gɛ ŋ́ mā, ó kwú cɔ̄nū.

⁶Anɔ́ɔ ó kahíníī, “Abɔ̄ n wɛ ɔyípɛ̄ nɛ̄ aá kē wɛ anyākwɔ́cɛ kú um ā yá ɛ́ɛ́ nɛ̄ ufi í cɛ̄ gā um lɔtū ka ɔdā nɛ̄ n gbɛlá ā ŋ́ mā.

⁷N gbɛlá da īyī um ka aá nēe le ɛcɛ lé ɛɛ́ mā cíkā ō kɛlā á. Ka anyākwɔ́cɛ klla cíkā ō nwū ācɛ íjééyī á.

⁸Amáŋ ɔkwɛ̄yī ā wɛ ka alelékwū nōo yɔ̄ ipú ɔ̄cɛ gē cɛ̄ lɛ ɔ́ jéeyī ā wɛ owu kú Ɔwɔicō nōo lɔfú fíyɛ́ dúú ā nɛɛ.

⁹Ó wɛ ō gbo ókplícī gē cɛ̄ lɛ ācɛ gē jééyī ā ŋ́, ɛ́ɛ́ nɛ̄ ɛcɛ ō lé gbojī gē yá ka ɔ̄cɛ kóō jé ɔdā nōo le kpaakpa ā ŋ́.

¹⁰Ohígbū ɔ́ɔmā ā, aá jāhɔ̄ gā um, ká n̄ da aá ɔdā nɛ̄ n gbɛlá ā.

¹¹N gbeyī ká n̄ pó ɛlā nɛ̄ aá gáā ka ā, klla jāhɔ̄ ká n̄ pó ɛlā íjéeyī kú aá abɔ̄ aá yɔ̄ ī tíne ɛ́gɛ́nɛ̄ aá ī kɛlā ā.

¹²N jāhɔ̄ lɔɔlɔhi lɛ ɛlā kú aá dúúdú, amáŋ odúúmā kú aá í mafú lɛ Ujóbu ka anú ɔ́ɔ yá ɔdōbɔ̄bí ā ŋ́. Odúúmā kú aá í tá ɔ̄ ohi kú ɛlā nōó ka ā glá ŋ́.

¹³Aá híī da īyī aá ka aá ɔ́ɔ wɛ ācɛ nēe jéeyī ā ŋ́. Ɔwɔicō ofōōfūnū géē tá Ujóbu ohi piíí á. Ɔ̄cɛ ɔlamu dúúmā í tá ɔ̄ ohi glá ŋ́.

¹⁴Aá nɛ̄ Ujóbu yɔ̄ ī kɛlā lɛ aá á, ó ka gā um ŋ́. Amáŋ ń gáā tā ɔ̄ ohi ɛ́gɛ́nɛ̄ aá tá ɔ̄ ohi ā ŋ́.

¹⁵Ujóbu, aóklóbīya uwɔ nyā í má ɛlā ō ka gɛ ŋ́. É má ohi dúúmā tá uwɔ ɛ́ɛ́ gɛ ŋ́.

¹⁶N gáā gbēyī ō kɛlā gā uwɔ ohígbū keé má ɔdā dóódu ō ka gā uwɔ gɛ ŋ́.

¹⁷Amáŋ n géē tóohi ákú um dúú, n géē da uwɔ ɔdā nɛ̄ n gbɛlá ā.

¹⁸Ohígbū ka, ohi kú ɛlā nɛ̄ a ka ā le mu um ipú hile, nɛ̄ ń kwú ɔ̄ tū ipú kú um glá gɛ ŋ́.

¹⁹N le mla ohi ɛlā kú uwɔ bɛ̄ɛka ejé nōo le mu ɛtɛ́ yɔ̄ í wú ā. Ɔ́dāŋ ka ń má ɛga kɛlā ŋ́, ó lɛbɛ̄ɛka ɔdā nɛ̄ n géē je ca bɛ̄ɛka ejé ɛ̄yīpɛ̄ nōo gáā je ɔjá ca ohígbū ɛ́gɛ́nɛ̄ ó ŋmá lɔfú lɛ ā.

²⁰N géē tóohi ɛlā ā piíí, ka ɔtū kóō cɛ̄ um fóó. N géē nwūla okónu í tóohi ɛlā piíí.

²¹Ń gáā yɛce ɔ̄cɛ dúúmā, ɛ́ɛ́ nɛ̄ n gē yá ɔ̄cɛ dúúmā ɛbɛ́ ŋ́.

²²Ohígbū ka ŋ́ jé ō yá ɔ̄cɛ ɛbɛ́ ŋ́. Ɔ́dāŋ nɛ̄ n lɛ ɔ́ɔmā yá, Ɔwɔicō í je um yíífi fíyaa fíyaa.