Read idoma UJÓBU 33 Bible Online

UJÓBU 33 - idoma bible

UJÓBU 33

¹Abālɔbányā, Ujóbu jāhɔ̄ lɔɔlɔhi lɛ odúúdú ɛlā nɛ̄ n gáā ka ā.

²N kē le tútū ō kɛlā nɛ̄ n bī ɔtū ā ga uwɔ ɛɛ́.

³Odúúdú ɛlā nɛ̄ um gē ka ā ŋmá ɔtū okpaakpa, n kē í ka ɔ́ tɛ́ɛcɛ péee.

⁴Alelékwū kú Ɔwɔicō yá um klla je oyēeyī gā um á.

⁵A má ohi dúúmā, a tá um mɛ́ɛ́nɛ. Lɛ ɛlā nɛ̄ a gáā ka ā tútū, ka a háyi iyɔ̄bū um kɔkɔ.

⁶Ami mɛ́mla awɔ wɛ ɔdā ékpónú ipéyī Ɔwɔicō. Ó yá um ŋmá ɔmɛ bɛ̄ɛka awɔ ā dúú.

⁷Ó lɛ ā, á cíkā ō yúufi um ŋ́, ɛ́ɛ́ nɛ̄ a gē gbɛlá ka amíyɔ géē lɛ abɔ̄ da anúɔ ɛyí tāajɛ ŋ́.

⁸Ɔdā nɛ̄ a bī okónu kú uwɔ ā ka nɛ̄ n pó ahɔ̄ abɔ̄yī um ā yɔ̄ á.

⁹A ka abɔ̄ kú anúɔ le péee, anúɔ í kē yá ucē obɔ̄bí dóódu ŋ́. A klla ka anúɔ gē lā oyēeyī okpaakpa, ka anúɔ í kē gē yá ɔdōbɔ̄bí ŋ́.

¹⁰A ka nááná Ɔwɔicō ɔ́ɔ yɔ̄ í tíne ɛga kóō yá anúɔ ōwē kpɔ́, klla yá anúɔ bɛ̄ɛka olɛlā kú nū ā.

¹¹Kóo lɛ odó ce anúɔ ikpó, klla yɔ̄ ī gbō ɔdā dóódu nɛ̄ anúɔ gē yá ā gɛɛ.

¹²Amáŋ Ujóbu, ɛlā nɛ̄ a ka ā í wɛ ɔkwɛ̄yi ŋ́, ohígbū ka Ɔwɔicō nwuné fíyɛ́ ɔdā nōó gē kɔkɔ mɛ́mla ɔlɛɛcɛ.

¹³Ɔdí yá nɛ̄ a gē ka ɔdā tū Ɔwɔicō ka ɔ́ɔ̄ tóohi kú ɔkɔ nɛ̄ anúɔ ka ā ŋ́ mā?

¹⁴Abɔ̄ Ɔwɔicō gē kɛlā ékpónú igbalɛwa nááná ā, ɔ̄cɛ dúúmā í jāhɔ̄ lɛ ɛlā kú nū nōó gē ka ā ŋ́.

¹⁵Ohígbū ɔ́ɔmā, eko nɛ̄ ācɛ bá ī gbiyɔ̄lā otú, Ɔwɔicō gē kɛlā lɛ uwá ipú ɔ̄na nēé ī nā ā.

¹⁶Ó gē ma odée fú lɛ uwá, klla ī tū uwā ufi nɛ̄hi ō yá kóō lɛ uwá ahɔ̄ pi lɔɔlɔhi.

¹⁷Ɔwɔicō gē yá ɔdānyā kóō cɛ̄ lɛ ācɛ mā ucē ɔ́bíipú mɛ́mla ɔbɔ́ɔ̄cɛ kú uwā tá.

¹⁸Cɛ́ɛ́ kóō lɛ ɔ̄cɛ hɛ́tá ŋmá ikwū mɛ́mla ɔlékwū, cɛ́ɛ́ kóō lɛ ɔ̄cɛ nyatá ŋmá ísu nōo ī kpó ācɛ nēe gekwú nyɔ̄ ɔlékwū ā.

¹⁹Ɔwɔicō gē tú ɔ̄cɛ kwu ɔwɛ, ō ŋmá lɛ ō tū ōcē klá anú nōo gē cɛ̄ lɛ odúúdú iyē lɔnɔ tū ɔ̄ nɛ̄hi.

²⁰Cɛ́ɛ́ ɛdɔ ɔdōlé dúúmā í ŋmó ɔ̄ unwū ō lé ŋ́. Ɔdōlé nōo lɔnyɛ fíyɛ́ dúú ā nááná gē tū ɔ̄ agba.

²¹Ó kwú nyinyi klla kwu pīya ikpokwú yógóó ŋmáajɛ. Odúúdú ikpokwú kú nū nōo tɛtɛ tayínū ā kwú pɛ́ wɛ̄ɛcɛ.

²²Ó kwu ikwū ajaajɛ, ɔlékwū klla kwu ɔ́ ajaajɛ.

²³Amáŋ éyi kú aótɛ̄hɔ̄ úlúúlā kú Ɔwɔicō nōo gē tá ɔ̄cɛ abɔ̄ ā, nōo kwu ɔ́ ajaajɛ ā, jɛ̄ ō ma ɔdā nōó cíkā ō yá fú lɛ ɔ́.

²⁴Ɔ̄cocɛ̄hɔ̄ ā í ményinyi ɔ̄cɛ ā klla ī da Ɔwɔicō ka ɔ́ɔ híī cɛ̄ lɛ ɔ́ ga ɔlékwū ŋ́, ohígbū ka anúɔ lɛ ɔdā nōo yá nōó géē hɛ́ ɔ̄ tá má ɛɛ́.

²⁵Eko ɔ́ɔmā ɔkpíyē kú nū klla géē je pīya ɛ̄yīpɛ̄ bɛ̄ɛka ákú ɔyípɛ̄nɛ̄ncɛ́ ā. Ó klla géē je lɔfú iyē bɛ̄ɛka eko kú ɔyípōklóbīya kú nū ā.

²⁶Eko dúú nōó gbɔ̄ɔkɔ, Ɔwɔicō géē tá ɔ̄ ohi. Ó géē gbā Ɔwɔicō ɛ̄gbā ipú éeyē ohígbū ka Ɔwɔicō í cɛ̄ lɛ ɔ́ kwú ŋ́.

²⁷Cɛ́ɛ́ ó géē gbɔɔ́ ō gwíijē da ācɛ kahíníī, ‘N lɛ íne bīya, n klla gebí ŋmá ɔwɛ okpaakpa ā, amáŋ Ɔwɔicō í cɛ̄ gā um móōwē ɛ́gɛ́nɛ̄ um cíkā ō má ā ŋ́.

²⁸Ó lɛ um hɛ́tá ŋmá ɔlékwū, n kē yēeyī ícɛ kpɔ́.’

²⁹Ɔwɔicō gē yá odúúdú ɔdānyā lɛ ɔ̄cɛ igbalɛwa.

³⁰Ó gē nya ɔ̄cɛ tá ŋmá ikwū klla ī je éeyē kú oyēeyī igbɔhá lɛ ɔ́.

³¹Ujóbu, jāhɔ̄ lɛ ɛlā nɛ̄ n gē ka ā, lɛ okónu klá cíí ká n kɛlā.

³²Amáŋ ɔ́dāŋ ka, a lɛ ɔdā dúúmā í ka nɛɛ, ayíka a ka, ká n pó. Ohígbū ka n tíne ō hɛ́pɔ̄hi ga uwɔ.

³³Amáŋ ɔ́dāŋ ka á má ɔdā dúúmā ka ŋ́, ayíka a lɛ okónu klá cíí, ká n nwū uwɔ ɛ́gɛ́nɛ̄ a géē jééyī lɛ ā ā.