Read idoma UJÓBU 35 Bible Online

UJÓBU 35 - idoma bible

UJÓBU 35

¹Ɛlíhu klla kahíníī,

²Ujóbu, á ka lɔhi ŋ́, ɛ́gɛ́nɛ̄ nɛ̄ a ka anúɔ í yá ɔdōbɔ̄bí dúúmā ipéyī Ɔwɔicō ŋ́ mā.

³Nɛ̄ a klla gē da Ɔwɔicō ka íne nɛ̄ anúɔ bīya ā ɔ́ɔ ká ā wɛ ɔdā dúúmā ɛyɛ́ɛ́yí tū ɔ̄ ŋ́ mā. A klla da ɔ́ ka anúɔ í lɛ ile dóódu ŋmá ɔdōbɔ̄bí nɛ̄ anúɔ tá ō yá ā ŋ́.

⁴N gēe tá awɔ mɛ́mla aóklóbīya uwɔ nēe bá pī uwɔ nyā ohi kú ɛlā nɛ̄ a ka ā.

⁵Pīyeyī má ɔkpáncō ká ā má ɛ́gɛ́nɛ̄ ojuja licō ŋmá ajɛ lɛ ā.

⁶Ɔ́dāŋ ka a lɛ íne bīya, ó yá Ɔwɔicō ɔdā dúúmā ŋ́. Ɔ́dāŋ ka yá ɔdōbɔ̄bí igbalɛwa nááná, ɔdí nɛ̄ ɔ́ɔmā géē yá ɔ̄ ā?

⁷Ɔ́dāŋ ka a gē yá ucē kpaakpa nááná, á je ɔdā dúúmā lɛ Ɔwɔicō, ɛ́ɛ́ nɛ̄ a ī tá ɔ̄ abɔ̄ ŋ́.

⁸Ɔ̄cɛ bɛ̄ɛka awɔ ā nɛ̄ ɔ́bíipú kú uwɔ gēe yá ɔ̄ odée glá ā. Ámāŋ nɛ̄ okpaakpa kú uwɔ tá ɔ̄ abɔ̄ glá á.

⁹Eko nēé lɛ abɔ̄ du ācɛ ɛyí tāajɛ, é gē tíifu, klla ī bá ī jikwū kú ɔ̄cɛ nōo géē nya uwá tá ŋmá abɔ̄ kú ācɛ nēe lɔfú ā.

¹⁰Amáŋ, é gē ga ɛgiyí Ɔwɔicō, nōo yá uwá ā ŋ́. Anú gē je eyīyōce lɛ uwá, eko nēé bá ipú unwalu ā á.

¹¹É ga ɛgiyí Ɔwɔicō nōo ī je íjééyī lɛ alɔ fíyɛ́ aɛ́bɛ́ mɛ́mla aígbáanɔ dóódu ā á ŋ́.

¹²É ge jikwū kú otábɔ̄, amáŋ Ɔwɔicō í tá uwá ohi ŋ́, ohígbū keé wɛ ācɛ nēe ī yá ɔbɔ́ɔ́cɛ mɛ́mla ācɛ nēe ī yá ɔdōbɔ̄bí.

¹³Ikwū nēé gē je ā wɛ áncā, ohígbū ka Ɔwɔicō nōo lɔfú fíyɛ́ dúú ā í gē pó ŋ́. Ó kōō ī pīyeyī má uwā ŋ́.

¹⁴Ujóbu, ó lɛ ā, abɔ̄ ó géē pó ɔkɔ kú uwɔ lɛ ā, nɛ̄ a ka anúɔ í má ɔ̄ ŋ́ mā. A klla ka anúɔ ɔ́ɔ lɛ ɛpɔ̄ kú anúɔ bī wā iyɔ̄bū nū klla yɔ̄ ī gbēyī ɔdā nōo géē yá ā ɛɛ́.

¹⁵A klla gbɛlá ka Ɔwɔicō ɔ́ɔ gē cɔ̄nū í yá ɔ̄cɛ italā ŋ́. Koó kē ī lɛ ɛlá wu ucē obɔ̄bí nɛ̄ ɔ̄cɛ ɔ́ɔ gē yá ā lɛ ā ŋ́.

¹⁶Ujóbu gē kɛlā alɛwa nōo wɛ áncā. Ó kē ī kɛlā lɛyíkwu ɔdā alɛwa nōó jɛ́yí nū ŋ́.