Read idoma UJÓBU 36 Bible Online

UJÓBU 36 - idoma bible

UJÓBU 36

¹Ɛlíhu klla kɛlā gɔbū kpɔ́ kahíníī,

²“Lɛ ɔtū lé ga um eko kpiíí ká n̄ le mafú gā uwɔ. Ɔdā alɛwa bá nɛ̄ n géē ka kwɛyí Ɔwɔicō.

³N géē bī íjééyī nɛ̄hi nɛ̄ n jé ā le mafú ga uwɔ ka ɔ̄cɛ nōo yá um ā lɛ́pɔ̄hi á.

⁴Le jé péee ka odúúdú ɛlā nɛ̄ n gē ka ā wɛ ɔkwɛ̄yi. Ɔ̄cɛ nōo jé ɔdā olɔhi fíyɛ́ dúú nɛ̄ a má yɔ̄ ī kɛlā ga uwɔ yɔ̄ á.

⁵Ɔwɔicō lɔfú nɛ̄hi ā, ó kē ī lɛ eyī gla ɔ̄cɛ dúúmā ŋ́. Ó kē lɛ ɔdā dúúmā nōó jé ŋ́ nɛɛ ŋ́.

⁶Ó gē cɛ̄ lɛ ācobɔ̄bíipú ā kéē yēeyī yɔ̄ ī gɔbū kpɔ́ ŋ́. Amáŋ ó í hɛ́pɔ̄hi, klla ī yá ɔdā okpaakpa lɛ aólɛhɔ́ɔ̄cɛ.

⁷Ó gē leyīkwu ācɛ nēe ī yá ucē kpaakpa kóō gbō uwā. Ó gē cɛ̄ lɛ uwá gbāajɛ bɛ̄ɛka aɔ́cɛ́ ā. Ó klla í cɛ̄ lɛ uwá gē lɛ ojīlīmā piyóó.

⁸Amáŋ ɔ́dāŋ keé lɛ agbá tū uwā, nēé bá ī móōwē,

⁹ó gē da uwá ɔdōbɔ̄bí nēé yá ā, mɛ́mla ɔbɔ́ɔ́cɛ nēé yá ā.

¹⁰Ó gē cɛ̄ lɛ uwá jāhɔ̄ lɛ ahɔ̄ nōo gē pi uwá anú ā, klla ī je ɔ́da lɛ uwá kéē le pīyabɔ̄ ŋmá ɔ́bíipú kú uwā.

¹¹Ɔ́dāŋ keé lɛyítáajɛ lɛ Ɔwɔicō, klla ī cɛ̄ ɔ̄ ɛhɔ̄, é géē lā oyēeyī kú uwá ipú ɛbɔ́, klla ī jɛ̄ gicō í gbagbénú.

¹²Amáŋ, ɔ́dāŋ keé lɛyítáajɛ lɛ Ɔwɔicō klla cɛ̄ ɔ̄ ɛhɔ̄ ŋ́, é géē pɛ́ kwú ipú ogwuda kú uwá, klla í bēhé ísu nōo ī kpó ācɛ nēe gekwú nyɔ̄ ɔlékwū ā.

¹³Ācɛ nēé kpɔ́tūce Ɔwɔicō ŋ́ mā, géē bá ī cɔ̄nū kpɔ́. Ɔwɔicō kōō yɔ̄ ī yá uwā italā nááná, é gáā gbɔ̄ɔkɔ lɛ ɔ́ kóō tá uwā abɔ̄ ŋ́.

¹⁴É gē kwú eko nēé wɛ ɛdrɔ́ kpɔ́ ɛ́ɛ́ mā. Oyēeyī kú uwā kē ī ŋmɛ́yí ipú uwēyī.

¹⁵Amáŋ Ɔwɔicō gē nwū ācɛ ɛlā ŋmá ōwē nōó ī cɛ̄ lɛ uwá ī bū ipú nū ā. Ó klla gē bī ákanya gē nwūla ɔ̄cɛ ahɔ̄.

¹⁶Ɔwɔicō le uwɔ bī bɛ̄cɛ ŋmá ipú ákanya, klla kwú uwɔ ú bī wā ɛga nōó géē leyīkwu uwɔ í yá ɛgbá kú uwɔ dóódu gā uwɔ ɛɛ́. Ó klla lɛ itébulu nēé ī kpó ɔdōlé ce gā uwɔ ká ā lé ā tū mu mla ɔdōlé ɛ́nɛ́nɛ̄ gónóó.

¹⁷Amáŋ abālɔbányā, a yɔ̄ ī móōwē nōo cíkā lɛ italā nɛ̄ ācobɔ̄bíipú cíkā ō mīyɛ ā ɛ̄ɛ́.

¹⁸Lɛ ɛlá kwu ɔ́, ká ā cɛ̄ lɛ ije pllá uwɔ, ɛ́ɛ́ nɛ̄ ācɛ gē bī omíci le já uwɔ ŋ́.

¹⁹Ikwū nɛ̄ a ī je kú otabɔ̄ ā í gáā tá uwɔ abɔ̄ dúúmā ŋ́. Odúúdú ɔfú kú uwɔ, í kē tá uwɔ abɔ̄ abālɔbányā glá ɛ́ɛ́ gɛ ŋ́.

²⁰A híī tíne otú, eko nɛ̄ odúúdú éwo gē je yíífi ŋmá ajɛ ā, kóō bī ŋ́.

²¹Lɛ ɛlá kwu ɔ́ ká ā ma ɔdōbɔ̄bí ō yá tá. É tū ōwē nɛ̄ a gē má ā klá uwɔ ká ā híī yá ɔdōbɔ̄bí gɛ ŋ́.

²²Blakwu ɛ́gɛ́nɛ̄ ɔfú kú Ɔwɔicō nwuné lɛ ā. Anú jé ō nwū ɔ̄cɛ odée fíyɛ́ odúúdú ācɛ nēe ī nwū ɔ̄cɛ odée ā á.

²³Ɔ̄cɛ dúúmā í gáā da Ɔwɔicō ɔdā nōó géē yá ā glá ŋ́, ɛ́ɛ́ nɛ̄ ɔ̄cɛ dúúmā gē cīje kú ɔdōbɔ̄bí ō yá bá ɔ̄ glá ŋ́.

²⁴É gē cɛ̄tra Ɔwɔicō eko dóódu, kú ɔdā nōó gē yá ā. Awɔ abɔ̄yī uwɔ ā cíkā ō cɛ̄tra anú piíí dúú.

²⁵Odúúdú ācɛ lɛ ɔdā nōó yá ā má ɛɛ́. Amáŋ ó wɛ odúúdú ācɛ jɛ́yí odúúdú ɔdā nōo yá ā ŋ́.

²⁶Ɔwɔicō le nwuné fíyɛ́ ɔdā nɛ̄ alɔ gē jé ɔ̄ dúúdú. Alɔ í kē jé ɛ́gɛ́nɛ̄ ó lé ɛcɛ lɛ ā glá ŋ́.

²⁷Ɔwɔicō gē pi éŋkpɔ̄ ŋmá ajɛ ɛ́ɛ́ nōó klla gē je ɔ́ pīya ɔwɔ nōo gē yā klá ajɛ ā á.

²⁸Ó gē cɛ̄ lɛ ɔwɔ pɛ́ ŋmá ipú ojuja, lɛ odúúdú alɛɛcɛ.

²⁹Ɔ̄cɛ dúúmā í jé ɛ́gɛ́nɛ̄ ojuja gē yāwu ā, ɛ́ɛ́ nōó gē jé ɛ́gɛ́nɛ̄ akpáabana gē gbo ŋmá ɔkpáncō, ɛga nɛ̄ Ɔwɔicó lá ā ŋ́.

³⁰Ó gē tū Ɔwolímanya bū odúúdú ɔkpáncō, amáŋ ɔkɛklɛ kú ísu ā tá ipú obū kpímm.

³¹Ɔwɛ ɔ́ɔmā nōó gē jé ɔdōlé lɛ ācɛ, klla ī je ɔdōlé cabácabá á.

³²Ó gē bī abɔ̄ kú nū kwú Ɔwolímanya, klla í je íkwu lɛ ɔ́ kóō gbo akpáabana klá ɛga nōo tíne ā.

³³Akpáabana gē ka tɛ́ɛcɛ ɛdɔ ɔwɔ nōo yɔ̄ ī wā ā. Aɛ́bɛ́ ɔlɛ́ nááná kē jé ka ɔwɔ ɔ́ɔ ī wā.