Read idoma UJÓBU 37 Bible Online

UJÓBU 37 - idoma bible

UJÓBU 37

¹“Ɔwɔ nōo gē gwó kwūūū nyā gē hɛ́ um ɔtú ko.

²Odúúdú aá, aá jāhɔ̄ lɛ ɔkɔ kú Ɔwɔicō. Aá jāhɔ̄ lɛ akpáabana nōo gē gbo ŋmá okónu kú nū ā.

³Ó gē yá kú ɔwɔ kóō límanya ŋmá abɔ̄ éyi kú ɔkpáncō ga ɔhá, klla ŋmá oŋmɛ́yí kú ɛcɛ éyi ga ɔhá.

⁴Ighīhi ɛ̄nyā, ɔkɔ kú Ɔwɔicō gē dɛ̄gba lɔfú lɔfú bɛ̄ɛka akpáabana nōo ī gbo ā. Ɔwɔ kē ī yɔ̄ ī límanya eko ékpónú ɔ́ɔmā.

⁵Ɔkɔ kú Ɔwɔicō gē gbo akpáabana nōo ī hí idáago ō pó. Ó gē yá ɔdā nɛ̄hi nɛ̄ alɔ í jɛ́yí nū dúúdú glá ŋ́.

⁶Ó gē da ɛcɔ̄ɔwɔ ka ɔ́ɔ pɛ́ klá ajɛ. Ó klla gē da ɔwɔ ka ɔ́ɔ yá klá ɛcɛ nɛ̄hi.

⁷Ó lɛ odúúdú úklɔ́ nɛ̄ ācɛ gē yá ā ci céɛ́ ká odúúdú ācɛ kéē má ɔdā nōo yá glá ā.

⁸Aɛ́bɛ́ kú ipácí ā le pɛ́ kwu gaá tayínū ipú ɔ̄gɔ̄ kú uwā jāā gbéeko nɛ̄ ɔwɔ nɛ̄hi ā le yā mɛ.

⁹Ofúlutu mɛ́mla owu nɛ̄hi ā le fu ŋmá ɛháajɛ kwūūū. Ofū nōo kē ī kwu tū iyē nɛ̄hi ŋmá ɛhícō.

¹⁰Owu nɛ̄ Ɔwɔicō gē fu ā gē je éŋkpɔ̄ kwú bá ɔhá kwú ɔ̄ ú ŋmó kwú pīya ɛcɔ̄ɔwɔ kɔ́ŋgɔ́ɔ.

¹¹Ɔwɔ límanya ŋmá ipú ojuja ā,

¹²abɔ̄ uwá bā í yɛ ɛ́gɛ́nɛ̄ Ɔwɔicō tíne lɛ ā. É gē yá odúúdú ɔdā nɛ̄ Ɔwɔicō je ɔ́da lɛ uwá kéē yá ɛga dóódu ipú ɛcɛ ā.

¹³Ɔwɔicō gē tū ɔwɔ ɛhɔ̄ ī yá klá ɛcɛ á. Ó lɔfú tū ɔ̄ kóō yá ācɛ italā. Ó klla lɔfú tū ɔ̄ kóō yá olɔhi lɛ ācɛ.

¹⁴Ujóbu, mā cíí ká ā jāhɔ̄! Gbɛlá, ká ā lɛ eyī yɛ ɔdā idáagó nɛ̄hi nɛ̄ Ɔwɔicō gē yá ā.

¹⁵A jé ɛ́gɛ́nɛ̄ Ɔwɔicō gē je ɔ́da kú nū, klla ī yá ka ɔwɔ kóō límanya ŋmá ipú ojuja ā?

¹⁶A jé ɛ́gɛ́nɛ̄ ojuja gē túbá klla ī pɛ́ ɔkpancō āa? Ɔ́ɔmā wɛ úklɔ́ idáagó kú Ɔwɔicō nōo jé ɔdā dóódu ā á.

¹⁷Eko nɛ̄ owu okwɔ́lá gbɔɔ́ ō tá ŋmá ɛháajɛ ā, a gē yɔ̄ ī bū ahɛ tū ipú īlī nɛ̄ a le wiiyē ā.

¹⁸A lɔfú je ɔkpáncō nāŋdaa klá icō kóō yɔ̄ ī ceyī bɛ̄ɛka ogigo ā, ɛ́gɛ́nɛ̄ Ɔwɔicō yá ā glá áa?

¹⁹Awɔ ā kóō nwū alɔ ɔdā nɛ̄ alɔ géē ka lɛ Ɔwɔicō ā. Ohígbū ka ɔtū kú alɔ ā wɛ áncā, alɔ í kē jé ɔdā ō ka ŋ́.

²⁰Ń gáā dɔɔ̄kā ō kɛlā mla Ɔwɔicō ŋ́. Ohígbū ka ń tíne ō je ɛga dúúmā lɛ ɔ́ lígíi kóō je um yíífi ŋ́.

²¹Abālɔbányā ā, ofíyajɛ kú ɔkpancō ā yɔ̄ ī ceyī. Ó yɔ̄ ī ceyī ŋaáŋaá nōó tū ō leyīkwu ɔ́ ŋ́. Owu kē le odúúdú ɔkpancō ā gwu péee ɛɛ́.

²²Ɔwɔicō yɔ̄ ī wā ŋmá ɛhíícō ipú ɛgahi nɛ̄ o ōmá eyī kú nū lɛbɛ̄ɛka oje ɔdɔ (ugóolu) ā. Oceyī kú nū ī tūufi ō má.

²³Ɔwɔicō nōo lɔfú fíyɛ́ dúú ā le lɔfú fíyɛ́ alɔ abɔ̄ nōo tōō tūblá ɔ́ ŋ́ mā. Ó lɔfú nɛ̄hi, ó kē ī yá ɔ̄cɛ ɔdā nōo cíkā ā.

²⁴Ń ka ŋ́ nɛ̄, anɔ́ɔ odúúdú ācɛ gē yúufi nū á. Ó kē ī lɛ eyī gla ācɛ nēe gbɛlá ka aá ɔ́ɔ jéeyī ā tá, klla lɛ ɛlá wu uwá ŋ́.