Read idoma UJÓBU 38 Bible Online

UJÓBU 38 - idoma bible

UJÓBU 38

¹Igbīhāajɛ ka aɔ́dā nēe yá nyā, Ɔwɔicō le ohi tá Ujóbu ŋmá ipú owu nɛ̄hi éyi. O kahíníī,

²“Ujóbu, ɔnyɛ nɛ̄ a wɛ ɛ́ɛ́ nɛ̄ a gē bī ɛlā áncā mɛmla ɛlā ogwuda kú uwɔ le da um ɔ̄kā lɛyíkwu íjééyī kú um āa?

³Lɛ ɔtū lé bɛ̄ɛka ɔ̄cɛnyīlɔ ā, ká ā cāŋjɛ ka cīla um ɔ̄kā nɛ̄ n gáā da uwɔ ā.

⁴Ā yɔ̄ abɔ́ɔ eko nɛ̄ n lɛ etikpa kú ɛcɛ kwu ajɛ āa? Ɔ́dāŋ ka a jé ɔdā íbí, da um mɛ́ɛnɛ!

⁵Ɔ̄nyɛ miya ɛ́gɛ́nɛ̄ ɛcɛ nwuné lɛ ā? Ɔ̄nyɛ kē bī ɔ́ŋgbá le miya ɔwá mɛ́mla īkpō kú nū āa? A jé ohi nū?

⁶Ɔdí bī aúpíla nēe bī ɛcɛ hayi āa? Ɔ̄nyɛ lɛ ɛcɔ̄ kú ɔ́kíkā kú etikpa kú ɛcɛ kwu ajɛ

⁷abɔ̄ aínyílɔ́wɔ kú ɔ̄cɔ̄ɔ̄cī ā bá ī gwííjē bɛ̄ɛka ācɛ nēe ī gwíjē tɔ̄ɔhá āa, nɛ̄ odúúdú aálelékwū-ōtɛ̄hɔ̄ ā klla bá ī tɔ́ɔga ohígbū éeyē ā?

⁸Eko nɛ̄ ísu ca klá ɛcɛ gbɔɔ́ ŋmá ipú ajɛ ā, ɔ̄nyɛ gwū ɔwɛ tū uwā kéē yɔ̄ cíí ā?

⁹Ami wɛ ɔ̄cɛ nōo lɛ ojuja klá isú bá ajɛ ɔkpancō, klla lɛ ɔ́ dobū kpimm á.

¹⁰N lɛ ɛjī tū lɛ isú, kóō gla anú gaá cēenyi klá ajɛ glá ŋ́ má.

¹¹N da ɔ́ kahíníī, “Amānyā nɛ̄ ɔfú mɛ́mla úgbagwú kú uwɔ géē kwu ɛjī ā. A híī gla anú ŋ́.”

¹²Ujóbu, a je ɔ́da lɛ eyī ka ɔ́ɔ le nyā, nɛ̄ eyī le nyā ipú oyēeyī kú uwɔ jéejéé ɛɛ́ ɛ̄ɛ̄?

¹³A je ɔ́da lɛ eyī ka ɔ́ɔ le nyā péee ipú ɛcɛ, ka ācobɔ̄bíipú ka ɛ́ɛ̄ le pɛ́ kwú ŋmá ɛga otayínū kú uwá jéejéé ɛɛ́ ɛ̄ɛ̄?

¹⁴Eyōōnyā gē je aɛ́fu mɛ́mla aɔ́pɛ́ tú kwu ɛcɛ péee, lɛbɛ̄ɛka ɛ́gɛ́nɛ̄ īlī gē cē bá nukwunukwu ā.

¹⁵Eko nɛ̄ eyī le nyā, ācobɔ̄bíipú ā í má obū nēé gē tayínū gɛ ŋ́. Cɛ́ɛ́ é lɔfú ō yá ācɛ ɔdōbɔ̄bí gɛ ŋ́.

¹⁶A yɛ ga ɛga nɛ̄ éŋkpɔ̄ gē pɛ́ ŋmá ipú ísu ā jéejéé ɛɛ́ ɛ̄ɛ̄? A lɛ ikpó bá ɔkɛklɛ kú ísu jéejéé ɛɛ́ ɛ̄ɛ̄?

¹⁷Ɔ̄cɛ dúúmā mafú okómpinu nōo ga ɔ̄gɔ̄ olékwū nōo dobū nɛ̄hi ā ga uwɔ jéejéé ɛɛ́?

¹⁸A jé ɛ́gɛ́nɛ̄ ɛcɛ nyā nwuné lɛ āa? Tá um ohi, ɔ́dāŋ ka a jé n?

¹⁹A jé ɛga nɛ̄ ɔlá ofíyajɛ gē ŋmá wɛ̄ɛcɛ ā a? A klla je ɛga nɛ̄ obū gē du ŋmá ā āa?

²⁰Ɔ́dāŋ ka a jé, a lɔfú gē da obū mɛ́mla ɔlá ofíyáajɛ, ɛga nɛ̄ uwá géē yɛ nyɔ̄ ā, mɛ́mla ɛga nēé ī kwúcē nyɔ̄ ā.

²¹A gbɛlá ka a jé ohi ā lɛbɛ̄ɛka ɔdā nēé lɛ uwɔ ma eko nɛ̄ n yá ɛcɛ ā ɛɛ́ mā. N gbɛlá ka a le ɛcɛ lé nɛ̄hi ɛɛ́ n déē?

²²A le tá ɔbā nɛ̄ n kpó ɛcɔ̄ɔwɔ mɛ́mla ébú tayínū anú ā jéejéé ɛɛ́?

²³N kpó uwá tayínū abɔ́ɔ gē gbēyī eko kú unwalu, nɛ̄ ācɛ ī nuunu klla ī kpɛ́fú ā.

²⁴A jé ɔwɛ ga ɛga nɛ̄ n gē yá kú ɔwɔ kóō límanya ŋmá ā, ámāŋ nɛ̄ owu kú ɛnɔ̄ɔ̄cī gē tá ŋmá āa?

²⁵Ɔ̄nyɛ bū ɔ̄gɔ̄ nɛ̄ ɔwɔ gē pɛ́ ŋmá anú wɛ̄ɛcɛ āa? Ɔnyɛ gē tá ɔwɛ lɛ akpáabana āa?

²⁶Ɔnyɛ yá ɛ́ɛ́ nɛ̄ ɔwɔ gē yā ɛga nɛ̄ ɔ̄cɛ dúúmā í lā ŋ́ mā, kwu ipú ígbíli nōo wɛ áncā āa?

²⁷Ɔnyɛ gē kpó éŋkpɔ̄ tū ajɛ nōo le ŋmíkpākplā, ɛ́ɛ́ nɛ̄ ácí gē bū ŋmá anú wɛ̄ɛcɛ ā?

²⁸Ɔwɔ lɛ ádā lɛbɛ̄ɛka ɔlɛɛcɛ ā nɛɛ? Kɛɛ keé ma ébú bɛ̄ɛka ɛ́gɛ́nɛ̄ é ma ayí āa?

²⁹Ɛ́nɛ́ ma ɛcɔ̄ɔwɔ ā nɛɛ? Kɛɛ keé ma ébú

³⁰nōo gē je éŋkpɔ̄ ŋmó ŋmá ɛcɔ̄ kɔ́ngɔ́ɔ ā, nōo klla gē je éŋkpɔ̄ kú eyī isú kwú bá kóō ŋmó ofū nɛ̄hi āa?

³¹A gē gbō aínyílɔ́ɔwɔ nēé hī ka ɛ́nɛ́ ugwū layílayí bá ɔhá, klla wī ɔdā nōo gbō ogbɔ̄lɛ́ gbēyī ɔyā ā glá āa?

³²A gē lɔfú da aínyílɔ́ɔwɔ eko nēé ī bɛ̄cɛ ā glá āa?

³³A jé íne nōo gē gbō ɛ́gɛ́nɛ̄ aɔ́lá nēe bá ɔkpáncō gē yúklɔ́ lɛ āa? A yá ka íne ɔ́ɔmā kóō gbō ɛcɛ glá āa?

³⁴A je ɔ́da lɛ ojuja, kóō yā ɔwɔ klá uwɔ cɔcɔcɔ glá āa?

³⁵Ɔ́dāŋ ka a le ɔ́da je lɛ Ɔwolímanya, kóō límanya, Ó gē kwúcē wā í da uwɔ kahíníī, ‘Ɔkpani, ɛhɔ̄ nɛ̄ a tū um ā, n le ɔ́ yá kwɛyí ɛɛ́. Iní ɔhá nɛ̄ n géē nyɔ̄ āā?

³⁶Ɔ̄nyɛ yá ka ojuja kóō jé ɛ́gɛ́nɛ̄ ó ī yā ɔwɔ āa? Ɔ̄nyɛ kē mafú lɛ ébú ɛ́gɛ́nɛ̄ ó ī ce āa?

³⁷Ɔ̄nyɛ jéeyī gē gbo ojuja áluka glá, klla í píya anú kɛgɛ́ɛ̄ kóō pīya ɔwɔ wɛ̄ɛcɛ ŋmá anú āa?

³⁸Ɛdɔ ɔwɔ ɔ́ɔmā nōo gē je yá nɛ̄ ajɛ gē kwú bá ɔhá kpɔ́kɔ́ɔ klla ī je ŋmó kɔ́ngɔ́ɔ á.

³⁹Awɔ gē tíne ɔdōlé lɛ ágábá mɛ́mla ayí uwā ɛ́ɛ́ nēé gē lé ā,

⁴⁰eko nēé tayínū ipú ɔ̄gɔ̄ mɛ́mla ɔ̄gɔ̄ ɛcɔ̄ kú uwá bā ī gbēyī āa?

⁴¹Ɔ̄nyɛ gē je ɔdōlé lɛ aɔ́tágláma, eko nɛ̄ ayí uwā gē jikwū tū um kú ɔdōlé, eko nɛ̄ abɔ̄ le hɛ́ uwā iyē ohígbū ɛmiyɛ āa?