Read idoma UJÓBU 39 Bible Online

UJÓBU 39 - idoma bible

UJÓBU 39

¹A jé eko nɛ̄ aɛ́wū kú ipácí gē ma ayí uwā āa? A má īkpɛ̄ɛnū yɔ̄ ī ma ɔyí jéejéé ɛɛ́?

²A jé ɛ́gɛ́nɛ̄ nēé ī yīipú ligbó lɛ āa? A jé eko nēé ī ma ɔyí kú uwá āa?

³Anyā īkpɛ̄ɛnū gē tú wāajɛ, ɛ́ɛ́ nēé gē ma ɔyí uwā wāajɛ á?

⁴Ipácí nɛ̄ ayí uwā gē jɛ̄ lɔfú iyē á. É gē nyɛ̄ɛ̄ ŋmá ɛga aɛ́nɛ́ uwá, é klla ī cīgbīhi wā ɛgiyí uwā ɛ́ɛ́ gɛ ŋ́.

⁵Ɔ̄nyɛ hɛ́ aíjakī kú ipácí tá kéē yɛ ga ɛga dúú nēe he uwá ɔtū ā. Ami mā uwá tá kéē bā ī yɛ gajɛ gicō ipácí á?

⁶Ami je ipú ígbíli mɛ́mla ɛga nɛ̄ ácí í gē bū ŋ́ mā lɛ uwá kóō wɛ ɔlɛ́ uwá á.

⁷É gē cɛ̄ túblá uya kú ipú igelī ŋ́. É gē pó ācɛ ī dɛ̄gba tū uwā kéē yá uwá kéē yúklɔ́ ŋ́.

⁸Ɛyí aɛ́fu nɛ̄ uwá gē tíne ɔdōlé mɛ́mla ácí ɛ̄mɛ̄ɛ̄mɛ̄ kéē lé á.

⁹Ɔbá ɛyī géē cɛ̄ ō yúklɔ́ ga uwɔ glá āa? Ó géē cɛ̄ ō gbo ɔlɛ́ ɛbɛ́ ɔlɛ́ kú uwɔ otū gbɔ́ɔ̄cī glá āa?

¹⁰A lɛ ɔ́ŋgbá tū odúúmā kú uwā kéē yúklɔ́ ɛhɔ̄ ga uwɔ glá āa?

¹¹A géē gbolóce ɔfū nɛ̄hi kú nū ā kóō yá odúúdú úklɔ́ olɔfu kú uwɔ ga uwɔ glá āa?

¹²A leyīce ɔ́ kóō kwúcē klla gaá kpó aɔ́dɛ̄hɔ̄ nɛ̄ a cē ā ga ɛga nɛ̄ a ī fīyɛ̄ uwā ā glá āa?

¹³Acá kú okokonkofí lɔfú nɛ̄hi, amáŋ ó lɛbɛ̄ɛka acá mɛ́mla éfú kú omlɛgwá ā glá āa?

¹⁴Okokonkofí gē mābɔ̄ ayi kú nū tá ipú ɔjɛ. Cɛ́ɛ́ ka idɔlá kú ajɛ kóō hɛ́ klá anú.

¹⁵Ó kōō gbɛlá ka ikpó kú alɛɛcɛ, ámāŋ ka aɛ́bɛ́ kú ipácí ɛ́ɛ ca ɔ́ glá ŋ́.

¹⁶Ó gē lɔnɔɔtū lɛ ayí nū bɛ̄ɛka ɔdā nɛ̄ ayí ā í wɛ ákú nū ŋ́ mā. Ó lɛ ɛlá wu ɔ́, ɔ́dāŋ ka ōwē nōo má tá ayí nyā le pīya áncā ŋ́.

¹⁷Ami yá nōó líla á. Ami í klla je íjééyī lɛ ɔ́ ŋ́ má.

¹⁸Amáŋ, eko dúúmā nōó cāŋjɛ gbɔɔ́ ō kwinyā, a géē lɔfú hī ɔnya mɛ́mla ɔ̄cocɔnyā dúúmā igwú gaá cɛ́cá.

¹⁹Ujɔ́bu, awɔ wɛ ɔ̄cɛ nōo yá nɛ̄ aɔ́nya lɔfú ɛ́gɛ́nɛ̄ é lɔfú ā áa? Awɔ yá ɛɛ́ nɛ̄ uwá lɛ īnyīlɛyí kú uwá nōo gwā playi ajɛ aā?

²⁰Awɔ yá ɛɛ́ nēé gē tómbili bɛ̄ɛka efūma, klla ī tū ācɛ ufi mla owu nēé ī fu ɔfɔ́ɔ́fú bū ɛnwū kú uwā āa?

²¹É gē bī āpīicɛ kú uwā bū ajɛ, ī ma ɔfú kú uwá fú. É klla ī kwinya ga ɔgbɛ́fú lɛyíkwu iyɛ́fú kú aólɛlā ā.

²²É gē jé ufi ō yá ɛ́ɛ́, nēé gē kwu ŋmá ɔnɛ́fú ŋ́.

²³aɔ́yī kú ācɛ nēe gē ce uwá ā ī yúuya ipú ahámgbā. Aóbó kú uwā kē bá ī ceyī ŋaáŋaá.

²⁴Eko dúúmā nēé gbɔɔ́ ō tá opo kú ɛfú, é ī mahayi cíí glá ɛ́ gɛ ŋ́. é gbɔɔ́ ō hápápá kwinya nyɔ̄ fíyaa.

²⁵Eko dóódu nēé le opo kú ɛfú tá, aɔ́nya ā gē dɛ̄gba. É gē hí ípī ɛfú ŋmá ɛga oligbó ɛ́ɛ́ kéē ga ajɛ ɔgbɛ́fú ā. É klla ī pó ɔ́da kú ɛfú nɛ̄ aótrɛ̄yí kú aícɔ́ɔja ā gē je lɛ aícɔ́ɔja ā.

²⁶Eko nɛ̄ ucē gē wu ga ɛháajɛ ā, awɔ nɛ̄ɛ́ kllɔcɛ́ ŋmá ɛgiyí uwɔ ɛɛ́ nōó gē wu áā?

²⁷Okpé gē gbēyī ká ā lɛ ɔ́da je lɛ ɔ́ ɛ́ kóō gwó ɔlɛ́ nū ce icō ágēnégēne kú ɛfu?

²⁸Ó gē gwó ɔlɛ́ nū ce ɛyí ápátɛ́cɔ̄ nōo licó fíyɛ́ dúú ā. Ó klla ī lɛ ogéné kú ɛfu ā yá ɛga nōó ī tayínū.

²⁹Oŋmá abɔ́ɔ ā nōó ī leyīkwu ɛcɛ gɛɛ, ī tíne ɔdá nōó gē kwú lé á.

³⁰Ɛga nɛ̄ aókwū ɛbɛ nēé ŋmó ā bá ā, abɔ́ɔ nɛ̄ aókpé gē jīla á. Ayí kú uwā kē ī gwá oyī.