Read idoma UJÓBU 4 Bible Online

UJÓBU 4 - idoma bible

UJÓBU 4

¹Anɔ́ɔ Ɛlífāasi, ɔ̄cɛ kú Utémān ā da Ujóbu kahíníī,

²“Ujóbu, ɔ́dáŋ ka ɔ̄cɛ lɛ ɛlā ka gā uwɔ, a géē cɔ̄nū? Amáŋ, ń klá okónu tū ɛlā ā glá ɛ́ɛ́ gɛ ŋ́.

³Blakwu ɛ́gɛ́nɛ̄ a nwū ācɛ alɛwa lɛ, klla lɛ ɔfú tū ācɛ nɛ̄ abɔ̄ le gbobú lɛ uwá iyē klla je uwá abɔ̄ gicō lɛ ā āā.

⁴Eko nɛ̄ ɔ̄cɛ le ikpó gbo ajɛ, nɛ̄ abɔ̄ le hɛ́ ɔ̄ iyē, nɛ̄ ɛ̄jɛ̄ le jé ɔ̄, ɛlā nɛ̄ a gē ka lɛ ɔ́ ā gē je ɔfú tū ɔ̄cɛ ɔ́ɔmā iyē, kóō cāŋjɛ háyi.

⁵Amáŋ, abɔ̄ ɔgba kú unwalu ā gáā ce uwɔ abālɔbányā ɛɛ́ mā, ɔtū kú uwɔ kē kwú gbenyi ɛɛ́. Ó lɛ abɔ̄ kwu uwɔ iyē ā, abɔ̄ kē hɛ́ uwɔ iyē ɛɛ́.

⁶Abɔ̄ a gē gbā Ɔwɔicó ā, a cíkā ō lɔtūce ɔ́. Abɔ̄ a kē ī yá ucē okpaakpa ā, a cíkā ō leyīce ɔ́.

⁷Gbɛlá ka ā má ɔ̄. Ɔwɔicō je ɔ̄cɛ okpaakpa ŋmó jéejée ɛɛ́ ɛ̄ɛ̄? Kɛ̄ɛ ka a má ɛga nōó je ɔ̄cɛ nōo ī yá ucē olɔhi yíífi jéjée ɛɛ́?

⁸Ɛ́gɛ́nɛ̄ nɛ̄ um má lɛ ā, wɛ ka ācɛ nēe hɛ́hɔ̄ kú ɔdōbɔ̄bí, klla nyi īkpō kú ɔ́bíipú ā, géē cɛ̄ ɔdɛ̄hɔ̄ kú unwalu mɛ́mla ɔ́bíipú á.

⁹Ɔwɔicō gē cɔ̄nū da uwá í kpó uwā yíífi ŋmá ajɛ bɛ̄ɛka ɛ́gɛ́nɛ̄ owu nɛ̄hi gē kpó odée bónū ā.

¹⁰Ācobɔ̄bíipú lɛbɛ̄ɛka aágábá nēe ī tōoji klla ī wɔ́ɔha, nɛ̄ Ɔwɔicō gē je uwá okónu klá, klla ī je uwá aínu kpó ce ā.

¹¹Bɛ̄ɛka aágábá nēé má ɛbɛ́ dúúmā ŋmó lé ŋ́ mā, é gekwú, ayí uwā kwú fíyákátā.

¹²Ɔ̄cɛ éyi lɛ olɛhɔ̄ bī gé um wɛɛlɛ. Ó kɛlā ŋiniŋini nɛ̄ um pó ŋ́ igbō.

¹³Otū éyi, n lɛ ɔna obɔ̄bí nā, eko nɛ̄ ācɛ gē gbiyɔ̄lā lipú lipí ā.

¹⁴N gbɔɔ́ ō yúufi nɛ̄ɛnɛ̄hi, klla gbɔɔ́ ō fīyégbúlu. Odúúdú iyē kú um kē yɔ̄ ī fīyégbúlu kpákpákpá.

¹⁵Owu eyī le tá fee klá um, ɛyí yá um waaaa. Anɔ́ɔ ɛ́kpā ofū ce tū um iye á.

¹⁶Ó gāa mahayi iyɔ̄bū um cííí. N yɔ̄ gē má odée, n plla eyī tū ɔ̄ amáŋ n jé ɔdā nōo wɛ ā ŋ́. Anɔ́ɔ n pó ɔkɔ éyi kahíníī,

¹⁷“Ɔlɛɛcɛ í le kpaakpa ipéyī Ɔwɔicō glá ŋ́. Ɔ̄cɛ í le yēŋēē ipéyī ɔ̄cɛ nōo yá ɔ̄ ā glá ŋ́.

¹⁸Ɔwɔicō í koō lɔtūce ācocɛ̄hɔ̄ kú ɔlɛ́ nū kú ɔkpáncō ā ŋ́. Ó klla í má ɛnyá kú aálelékwū-ōtɛ̄hɔ̄ kú nū ā.

¹⁹Ó lɛ ā abɔ̄ a gbɛlá kóō géē lɔtūce ɔlɛɛcɛ nōó yá ŋmá ɔmɛ ā, nōo wɛ ajɛ, nēé klla lɔfú je ɔ́ catāajɛ bɛ̄ɛka ɛha āa?

²⁰Ɔ̄cɛ lɔfú yēeyī ɔ̄cɔɔ̄cī, nɛ̄ ofíilí kú otú kóō bī ā, nōó lɔfú kwú, nɛ̄ ɔ̄cɛ dúú í jé ka ɔ́ɔ kwú ŋ́ glá.

²¹Ācɛ ɔhá géē je ɔdā dúúmā nōó lɛ ā kpó. Ó lɛ íjéeyī nōo ŋmá ɛgiyí Ɔwɔicō ā, eko nōó kwú ā ŋ́.”