Read idoma UJÓBU 40 Bible Online

UJÓBU 40 - idoma bible

UJÓBU 40

¹Anɔ́ɔ Ɔwɔicō da Ujóbu kahíníī,

²“Ɔ́dāŋ ka a géē táafú mla ami nōo wɛ Ɔwɔicō nōo lɔfú fíyɛ́ dúú ā, ayíka a le tútū ō cīla um ohi kú ɔ̄kā nɛ̄ n gáā da uwɔ ā.”

³Ujóbu tá Ɔwɔicō ohi kahíníī,

⁴“N le nyɛ́ nɛ̄ɛ̄nɛ̄hi. Ń tá uwɔ ohi glá ŋ́, Ɔwɔicō. N kwú abɔ̄ ú klá okónu kú um ka n mā ɛlā ō ka ŋ.

⁵N lɛ ɛlā ka fíyɛ́ ɛ́gɛ́nɛ̄ n cíkā ō ka ā dúú ɛɛ́. Ń klla gáā ka ɔhá gɛ ŋ́.”

⁶Anɔ́ɔ Óndú ā lɛ ɛlá ka ígbɔhá ŋmá ipú ofúlutu lɛ Ujóbu á. Ó kahíníī,

⁷“Cāŋjɛ bɛ̄ɛka ɔ̄cɛnyīlɔ ā ka á lɛ ohi tá um.

⁸A gē dɔɔ̄kā ō mafú ka amíyɔ í ka ɛpɔ̄ kpaakpa ŋ́ nɛɛ? A gē ŋmó um ɛpɔbí ka a lɛ́pɔ̄hi nɛɛ?

⁹A lɔfú bɛ̄ɛka ami āa? Ɔkɔ kú uwɔ gē gbo akpáabana bɛ̄ɛka ákú um ā glá āa?

¹⁰Ɔ́dāŋ koó le lɛ ā, ayíka a mafú ka anúɔ wɛ ɔ̄cɛ ojīlīmā klla lɛ ojīlīma. Le mafú ka anúɔ nwuné, ācɛ ɔ́ɔ kē ī le ojīlīmā ce anúɔ.

¹¹Le cɔ̄nū da ācɛ nēe gē yɔ́bɔ́ɔ́cɛ ā, cɛ́ɛ́ ká ā lɛ uwēyī je lɛ uwá.

¹²N ka a má uwá mɛ́ɛ́nɛ, ká ā lɛ uwá tú wāajɛ. Ká ā lɛ ācobɔ̄bíipú ā catāajɛ bōōbū nyā.

¹³Lɛ odúúdú uwā kpó nyi únóji, ká ā lɛ ɔwɛ gwū tū uwā ɔlékwū.

¹⁴Cɛ́ɛ́ ami ā gáā wɛ ɔ̄cɛ aflɛ́yí nōo gē cɛ̄tra awɔ, klla í ka ka ɔfú kú uwɔ le yálé ga uwɔ ɛɛ́ á.

¹⁵Má adāgbéenyi ká ā má ɔ̄. Ami yá ɔ̄ á. Ami kē yá uwɔ á. Ó gē lé ácí bɛ̄ɛka ɛna ā.

¹⁶Amáŋ ó lɔfú iyē nɛ̄hi. Ɛ́nɛ́bɛ́ ɔkpíyē kú ipú kú nū lɔfú nɛ̄hi.

¹⁷Ugbé kú nū kwu gáyí bɛ̄ɛka ɔcí ulóko ā. Íli kú ikpó kú nū kē lɔfú nɛ̄hi.

¹⁸Ikpokwu kú nū lɔfú bɛ̄ɛka oje udɔ ā, Ikpó kú nū kē lɛ ɔfú bɛ̄ɛka ígbó oje ā.

¹⁹Anú hɛ́ um idáagó fíyɛ́ odúúdú ɔdā nɛ̄ n yá ā á. Ami nōo yá ɔ̄ ā lɔfú ŋmó ɔ̄ glá ā á.

²⁰Ó gē lé ɔdōlé kú nū ɛyí aɛ́fu ā abɔ̄ aɛ́bɛ́ ipácí ɔhá ā bá ī hijā abɔ́ɔ ā.

²¹Ó gē nyɛ̄ɛ̄ nyɔ̄ gaá gwutá ɛháajɛ ácí ujē ā. Ó kē ī tayínū ipácí kú ipú ɔ́tɔ̄.

²²Ácí ujē mɛ́mla ácí kú okónu ɔkpá ā gē gbo obobowū klá ɛga otayínū kú nū á.

²³Ó lɛ ɛlá wu ísu ō cēenyi ŋ́. Eko nɛ̄ éŋkpɔ̄ kú ísu kú Ujɔ́dan le pɛ́ klá anú eyī nááná, ó lɛ ɛlá wu ɔ́ ŋ́.

²⁴Ɔ̄nyɛ gē pu ɔ́ eyī klla kwú ɔ̄ glá āa? Ámāŋ, ɔ̄nyɛ gē kwú ɔ̄ ukpa, klla le odée bū ɔ̄ ɛnwú bēhé glá?