Read idoma UJÓBU 41 Bible Online

UJÓBU 41 - idoma bible

UJÓBU 41

¹Ujóbu, á gáā bī uwɔ okwú ɛbéenyi le kwú íkwu glá ŋ́. Á bī ɔŋ́gbá ɔlamu le gbō ikwú okónu glá ŋ́.

²Á lɛ ɔŋ́gbá bū ɔ̄ ɛnwū, klla je uwɔ tū ɔ̄ alagba glá ŋ́?

³Ó gáā gbɔ̄ɔkɔ gā uwɔ, ká ā lɛ anúɔ hɛ́tá ŋ́. Ó gáā gbɔ̄ɔkɔ gā uwɔ ká ā ményīnyi nū ŋ́?

⁴Ó gáā cɛ̄ cokónu mɛ́mla awɔ, ka anúɔ gē cɛ̄ uwɔ ɛhɔ̄ píyoo ŋ́?

⁵Á gáā lɛ ɔ́ŋgbá tū ɔ̄ bɛ̄ɛka aígbáanɔ ā, ká ā hijā mɛ́mla anú glá ŋ́. Á kē lɛ ɔ́ŋgbá wū ɔ́ ɔkɔ yɔ̄ ī yɛ ka ācocɛ̄hɔ̄ nɔ̄nyā kú ɔlɛ́ uwɔ kéē cōkē nū glá ŋ́?

⁶Ācokwébéenyi í gáā bá ī kwɔ̄ɔ́lá lɛyíkwu ɛmulá nēé géē je ɔ́ lá ā ŋ́. Ācotɔ́sú í gáā je ɔ́ kpó hɛ́ lá ŋ́?

⁷Á gáā lɛ ɔdájī gwū ɔ̄ ɔkpíyē kóō yɛ ɔ́ glá ŋ́. Óbo nēé ī le ŋmó ɛbéenyi ā í yɛ ɔ́ ɛyí glá?

⁸Lɛ abɔ̄ kwu ɔ́ igbeékpónú ká ā má ɔ̄. Á klla gáā cɛ̄ lɛ abɔ̄ kwu ɔ́ igbō ɔhá gɛ ŋ́. Ohígbū ka á gáā mlānyi unu nōó ī nu tú uwɔ ɛ̄cī ɔ́ɔmā ŋ́.

⁹Ɔ̄cɛ dúúmā nōo lɛ ikwú má, ufi gē kwú ɔ̄, owu ī mɛ lɛ ɔ́, ó klla ī gwōnū wɔɔlɔ wāajɛ.

¹⁰Eko dúúmā nēé lɛ ɔ́ yá cɔ̄nū, ɔ̄cɛ dúúmā í lɔtū hayi iyɔ̄bū nū glá ŋ́.

¹¹Ɔ̄cɛ dóódu nōo nyɔ̄ í yɔ̄ ī nuunu tá ɔ̄, í gáā yɔ̄ ɛbɔ́ glá ŋ́? Ɔ̄cɛ dúúmā í yá ɔ́ɔmā ipú ɛcɛ nyā glá ŋ́.

¹²Ká n̄ lɛ ɛlá ká ga uwɔ lɛyíkwu aíkpó kú aíkwu, mɛ́mla ɛ́gɛ́nɛ̄ ó lɔfú klla lɔhi ō má lɛ a ā.

¹³Ɔ̄cɛ dúúmā í pla āpū kú iyē kú nū ā glá ɛ́ɛ́, nōó gē lɛ odée gwū ɔ̄ kóō yɛ āpū kú nū nōo lɔfú lɛbɛ̄ɛka oje ā glá ŋ́.

¹⁴Ɔ̄cɛ dóódu í nwūla ɔ́ okónu kú nū nōo le mu mla aīnu otūufi kú nū ɔ́ɔmā glá ŋ́?

¹⁵Igbīhi kú nū le hɔ́ɔgba mɛ́mla ígwíígwu kú āpū nēe lɔfú bɛ̄ɛka ɔkplɛ́fú ā. É klla kwu ɔhá klá īyī uwā, le jé bɔ́há bɛ̄ɛka ɛcɔ̄ ā.

¹⁶Āpū éyi kwu ɔhá ká, sɔɔɔ́ nɛ̄ ɛga dúúmā ī yɔ̄ ɔtāhɛ̄ uwá nɛ̄ owu gē bū ɔ̄ glá ŋ́.

¹⁷É kwu īyī uwā lɔfú ká, nɛ̄ ɔdā dúúmā í fū uwā hī īyī uwā tá glá ŋ́.

¹⁸Ɔwɔ gē límanya eko dúúmā nōó lɛ ácihóo tá. Īkpēyī kú nū kē ī cɛ̄ bɛ̄ɛka ɛnɔ nōo ŋmá ajɛ ā.

¹⁹Ígblɛ́nyī ɔlá gē bɛ̄cɛ ŋmá okónu kú nu blublu. Īmū ɔlá kē ī tá kátáá ŋmá ɔɔ́ okónu.

²⁰Ódūdū gē bɛ̄cɛ ŋmá ɛnwū kú nū, bɛ̄ɛka ódūdū nōo ī tá ŋmá ɛ̄hī nēé lɛ odée ce ɔlá anú, le hɔ́lá yɔ̄ ī wú ā.

²¹Owu ofu kú nū ī tɔ̄lá. Ígblɛ́nyī ɔlá ī bɛ̄cɛ ŋmá okónu kú nū.

²²Ɔkɔ kú nū lɔfú nɛ̄hi. Ɔ̄cɛ dúúmā nōo jīla mɛ́mla anú gē gbɔɔ́ ō yúufi.

²³Kwu ɛ́nɛ́bɛ́ ɔkpíyē kú nū nááná lɔfú bɛ̄ɛka oje ɔlamu ā.

²⁴Ɔtū kú nū í gē yúufi ŋ́, í klla ī pīyabɔ̄ ŋ́, bɛ̄ɛka ɛcɔ̄ olɔfú nɛ̄hi nēé ī le yá ɛgɔ̄ ā.

²⁵Eko dúúmā nōó cāŋjɛ, kwu aɔ́wɔ ā géē yúufi. É klla ī je kwu hɛ̄ ɔ́ tá.

²⁶Ɔkpacaŋ́gelī dúúmā ámāŋ ka ɛdɔ óbō dúúmā, ámāŋ ɔdájī dúúmā í yɔ̄ nōo ī yá ɔ̄ ágbe glá ŋ́.

²⁷Ó gē je oje kóō lɔfú ŋ́ lɛbɛ̄ɛka ácí ā. Oje udɔ kē le fɔkɔfɔkɔ bɛ̄ɛka ɔcí nōo le wa ā tū ɔ̄.

²⁸É gáā tá ɔyī dúúmā lɛ ɔ́ nōo ī cɛ̄ lɛ ɔ́ kwinya glá ŋ́. Ɛcɔ̄ dúúmā nēé le tá lɛ ɔ́ ā ó gē yá ɔ̄ iye yiili áncā.

²⁹Ogbló le yá ɔ̄ lɛbɛ̄ɛka ácí ā. Eko dúúmā nɛ̄ ācɛ gē tá óbō mɛ́mla ɔdájī lɛ́ ɔ́, ó gē lɛ ɛlá wu ɔ́ ŋ́.

³⁰Āpū kú ipú kú nū lɛbɛ̄ɛka ákánjɔ̄ ā, é gē yila ajɛ bɛ̄ɛka ɛnū ā.

³¹Ó gē yá ipú ísu pūtūputupūtū bɛ̄ɛka éŋkpɔ̄ nōo yɔ̄ ī wú ā. Ó klla gē yá ka isú kóō wū bɛ̄ɛka ɛ̄hī kú anɔ̄ nōo ce ɔlá ā.

³²Ó gē tá ɔwɛ gbóóló igbīhi nū ipú ísu mɛ́mla ūwū pɛ̄ɛtúu. Ó klla ī je ísu pīya ɛnɛ̄hɛ́ mɛ́mla ūwū.

³³Ɔdā dúúmā í yɔ̄ ɛcɛ nyā nēé gē le gbla anú ŋ́. Ó wɛ ɔdā nɛ̄ Ɔwɔicō yá nōó gē yúufi ɔdā dúúmā ŋ́.

³⁴Ó gē je aɛ́bɛ́ ipácí ɔhá kéē wɛ ɔdā dóódu ŋ́. Anú wɛ ɔcɛ́ kú odúúdú aɛ́bɛ́ ipácí dóódu ā.