Read idoma UJÓBU 42 Bible Online

UJÓBU 42 - idoma bible

UJÓBU 42

¹Igbīhi nɛ̄ Ɔwɔicō lɛ ɛlā ka ā, Ujóbu lɛ ohi tá ɔ̄ kahíníī,

²“Óndú, n jé ka a lɔfú ō yá ɔdā dúúmā glá. A kē lɔfú yá ɔdā dóódu nōo he uwɔ ɔtū glá.

³A da um ɔ̄kā ka, abɔ̄ ó yá lɛ ɛ́ɛ́ nɛ̄ ami nōo wɛ ogwuda í jé ɔdā dúúmā ŋ́ mā, gē táafú lɛyíkwu íjééyī kú uwɔ āa? N le ɛlā ka lɛyíkwu ɔdā nɛ̄ ń jɛ́yí nū ŋ́, mɛ́mla ɔdā idáagó nōo le ce ami mɛ́mla íjééyī kú um bá.

⁴A da um ka amīyɔ jāhɔ̄, abɔ̄ anúɔ yɔ̄ ī kɛlā ā. A ka amíyɔ yá ka amíyɔ cíla ɔ̄kā nɛ̄ a géē da um ā.

⁵Eko ɔ́ɔmā, ɔdā nɛ̄ ācɛ ɔhá ka gā um lɛyíkwu uwɔ ā ofōōfūnū nɛ̄ n jé á. Amáŋ, abālɔbányā ā, n bī īkpēyī abɔ̄yī um lɛ uwɔ má ɛɛ́.

⁶Ohígbū ɔ́ɔmā, uwēyī lɛ um kwū, ohígbū odúúdú ɔdā nɛ̄ n ka ā. N kē le pīyabɔ̄ abālɔbányā, klla lɛ úmlá mɛ́mla ewo wu klá ɛyí ká n̄ ma ɔtūnōbí fú ohígbū ɛlā nɛ̄ n ka ɔ́ɔmā.”

⁷Eko nɛ̄ Ɔwɔicō lɛ ɛlā ka lɛ Ujóbu kwɛyí ā, Óndú ā da Ɛlífāasi kahíníī, “N yɔ̄ ī cɔ̄nū da awɔ mɛ́mla aóklóbīya awɔ ɛpa ā. Ohígbū ka aá kɛlā ɔkwɛ̄yi lɛyíkwu um, ɛ́gɛ́nɛ̄ Ujóbu, ɔ̄cocɛ̄hɔ̄ kú um, ka ā ŋ́.

⁸Ohígbū ɔ́ɔmā, lɛ ɔbá ɛna ahāapa, mɛ́mla omlede ahāapa kpó gē lɛ Ujóbu, cɛ́ɛ́ ka aá lɛ ɛya gwo ohígbū īyī aá. Ujobu gē gbɔ̄ɔkɔ ohígbū aá. N kē í pó ɔkɔ nōó ī gbā ā. Cɛ́ɛ́ ń gáā je uwēyī lɛ aá ɛ́gɛ́nɛ̄ o cíkā lɛ aá lɛ ā ɛ́ɛ́ gɛ ŋ́. Ohígbū ka aá kɛlā ɔkwɛ̄yi lɛyíkwu um ɛ́gɛ́nɛ̄ Ujóbu ka ā ŋ́.”

⁹Ɛlífāasi mɛ́mla Ubíldāadi mɛ́mla Usófa lɛ ɔdā nɛ̄ Ɔwɔicō da uwá ā yá. Anɔ́ɔ, Ɔwɔicō lɛ ɔkɔ nɛ̄ Ujóbu gbā ā pó á.

¹⁰Igbīhi eko nɛ̄ Ujóbu lɛ ɔkɔ gbā ohígbū aóklóbīya nū ɛtá ā kwɛyí ā, Óndū ā klla kwú aágbénú kú Ujóbu í kpó kwúcē lɛ ɔ́ ɔhá kpɔ́. Óndú ā klla lɛ odúúdú agbénú kú nū ā kpó cīgbīhi lɛ ɔ́ ɛga ɛpa.

¹¹Odúúdú ayínɛ́ nū, mɛ́mla aóklóbīya mɛ́mla aáncɛ́nya Ujóbu tɛtɛ ā, wā í lé klla gwá mɛ́mla anú ɔlɛ́ nū. É lɛ abɔ̄ ce Ujóbu iyē, klla tá ɔ̄ ɔtū lé ohígbū odúúdú unwalu, mɛ́mla ákanya nɛ̄ Óndú ā cɛ̄ nēe yá ɔ̄ ā. Ɔnyɔɔnyɛ kú uwá je ije mɛ́mla eliká kú oje ɔdɔ (ugóolu) lɛ Ujóbu.

¹²Anɔ́ɔ Óndū ā lɛ ɔhá hɛ́ ce eko igbīhāajɛ kú oyēeyī kú Ujóbu ā fíyɛ́ eko aflɛ́yí kú oyēeyī kú nū ā á. Ujóbu lɛ aálá úlā ofuciigwɛ́ɛhɔ̄ (14,000), aínyankwūlūmī úlā igwɛ́ɛhɔ̄ (6,000), aɛ́na úlā ɛhɔ̄ (2,000), mɛ́mla aíjakī úlā ɛpa ce ofigwó (1,000).

¹³Ó ma ayínɔ̄nyīlɔ ahāapa, mɛ́mla ayínɔ̄nyā ɛtá.

¹⁴Ó hī adá kú nū ā lé ka Ujɛmáyíma. Ɛ̄nɛ̄ o wɛ ɔmace kú adá ā lé ka Ukɛsíya. Ó kē hī ɔ́mɛɛtá kú ayí nū nɔ̄nyā ā lé ka, Ukeren-hápūku.

¹⁵Ayínɔ̄nyā dúúmā ɔhá í klla bá ipú ajɛ ā, nēe héyīfuuú bɛ̄ɛka ayínɔnyā kú Ujóbu ɛtá ā ɛ́ɛ́ gɛ ŋ́. Ádā uwá, Ujóbu ā lɛ ɔdā úgwū kú nu kɔ̄ miya uwá bɛ̄ɛka ayínɛ́ uwā nɔ̄nyīlɔ ā dúú.

¹⁶Igbīhi ɔdā nōo yá nyā Ujóbu yēeyī iháyí ofahāapa. Ó lɛ ayí kú ayí nū mɛ́mla ayááyí kú ayí nū má.

¹⁷Anɔ́ɔ Ujóbu gekwú eko nōó kwú hīla ókplící nɛ̄hi ā á.