Read idoma UJÓBU 5 Bible Online

UJÓBU 5 - idoma bible

UJÓBU 5

¹Ujóbu, hīgwú ka á má ɔ̄, ɔ́dāŋ ka ɔ̄cɛ dúúmā géē cɛ̄ uwɔ igwú. Ɛgiyí aálelékwū-ōtɛ̄hɔ̄ nyá nɛ̄ a géē nyɔ̄ kú otābɔ̄ āa?

²Ɔnū nɛ̄ olíla gē cɛ̄ lɛyíkwu Ɔwɔicō ā gē ŋmó ɔ̄ á. Ímálānyī kē í ŋmó ɔ̄cɛ nōó jéeyī ŋ́ mā á.

³Ami abɔ̄yī um má aólíla nēe lā bɛ̄ɛka é yɔ̄ ɛbɔ́ ā ɛɛ́. Amáŋ, n le okónu tá lɛ ɔlɛ́ uwá bōōbū.

⁴Ayí uwā í kē bá ɛbɔ́ glá ŋ́, ɔ̄cɛ dúúmā í yɔ̄ nōó gē cɛ̄pɔ̄ ayí uwā ɛga okɛpɔ̄ ŋ́.

⁵Ācɛ nɛ̄ ɛmiyɛ gē ŋmó uwá géē je ɔdɛ̄hɔ̄ kú nū kpó lé, kwu aɛ́nɛ̄ e jɛ̄ ipú ujē ā dúú. Ācɛ nēe ī yá ūnwū ɔdā nɛ̄hi ā gē je uwá agbénú kpó lé.

⁶Ɔdōōbɔ̄bí í gē wā ŋmá ipú ajɛ ŋ́, ɛ́ɛ́ nɛ̄ unwalu gē bū ŋmá ipú ajɛ ŋ́ dúú.

⁷Amáŋ, ɔ̄cɛ kē í bī unwalu gē lɛ īyī nū bɛ̄ɛka ɛ́gɛ́nɛ̄ ínyí ɔlá gē tá ŋmá ipú ɔlá gicō ā.

⁸Ɔ́dāŋ ka n wɛ awɔ nɛɛ, ń géē yɛ í gaá le ɔkɔ gbā lɛ Ɔwɔicō, klla í lɛ unwalu kú um ka klá ajɛ lɛ ɔ́.

⁹Ɔwɔicó ī yá ɔdā ohídáagó nɛ̄ ɔ̄cɛ í jé ɛyí nū glá ŋ, ó klla ī yá ɔdā idáagó alɛwa nɛ̄ ɔ̄cɛ í ka áluka nū glá ŋ́.

¹⁰Anú gē yá nɛ̄ ɔwɔ ī yā klá ajɛ ā. Anú klla í kpó éŋkpɔ̄ tū ajɛ ɛhɔ̄ á.

¹¹Anú wɛ Ɔwɔicō nōo gē je ācɛ nēe tá īyī uwā wāajɛ ā gicō á. Anú klla í je éeyē lɛ ācɛ nēe yɔ̄ ekwu mɛ́mla ɔtūnōbí á.

¹²Ó gē fíyɛ́ ojuju mɛ́mla ula kú ācoyúula ā ákátā, cɛ́ɛ́ ó cɛ̄ lɛ uwá lɛ abɔ̄ kwú ɔdā dúúmā ipú ula kú uwá ā ŋ́.

¹³Ó klla ī kwú ācɛ nēe jéeyī ā abɔ̄ ipú ula kú uwá bɛ̄ɛka ukpa ā. Ɔwɔicō í gē cɛ̄ lɛ ula ká ācopllɔ̄cɛ ā yá ɛ́gɛ́nɛ̄ é tíne ā ŋ́.

¹⁴Otú gē bī uwá ɔlɛ́ɛnɔ, uwá klla bá í lɛ abɔ̄ ma ajɛ ɛnoyɛ̄yí bɛ̄ɛka otú ā.

¹⁵Ɔwɔicō gē nya aógbɛhá tá ŋmá ikwū, ó klla í hɛ́ uwá tá ŋmá abɔ̄ kú ācɛ nēe ī pīya uwá tū ā.

¹⁶Ó gē je eyīyōce lɛ aógbɛhá, cɛ́ɛ́ ó lɛ okónu kú ācobɔ̄bíipú ā gwū.

¹⁷Ákú ɔ̄cɛ nɛ̄ Ɔwɔicō ī dɛ̄gba tū ɔ̄ kóō tá ɔ̄ tū ɔwɛ ā lɔhi! Ɔtū kóō híī wú uwɔ, eko nɛ̄ ó gē dɛ̄gba tū uwɔ ŋ́.

¹⁸Ɔwɔicō gē yá ɔ̄cɛ ágbe, amáŋ anú kē í tá ágbe nōó yá ɔ̄cɛ ɔ́ɔmā á. Ó gē yá ɔ̄cɛ ágbe, amáŋ́ ó klla í hɛ́ ɔ̄cɛ tá.

¹⁹Igbaáluka dúúmā nɛ̄ a ga ipú unwalu, ó géē tá uwɔ abɔ̄. Ó kē ī gbō uwɔ ŋmá ɔdōbɔ̄bí dúúmā, nɛ̄ abɔ̄ odúúmā í gáā kwu uwɔ glá ŋ́.

²⁰Eko kú ɔkpɛtā, ó géē lɛ uwɔ tū oyēeyī. Eko ɛfú ō kpó, ó gē nya uwɔ tá ŋmá ikwū.

²¹Ó géē nya uwɔ tá ŋmá okónu ō kwiyē dóódu. Ó klla í nya uwɔ tá eko ífi dóódu.

²²Ā géē yɛhɛ tū ífi mɛ́mla ɔkpɛtá. Á klla gáā yúufi kú ɛbɛ́ obɔ̄bí kú ipácí dúúmā ŋ́.

²³Ɛcɔ̄ í gáā bá ipú ajɛ̄hɔ̄ kú uwɔ ŋ́. Aɛ́bɛ́ obɔ̄bí kú ipácí dóódu í gáā yá uwɔ ɔdōbɔ̄bí ŋ́.

²⁴A gē lā ɔlɛ́ uwɔ ɛbɔ́. Eko dúúmā nɛ̄ a jila aálá kú uwɔ, odúúdú uwā géē bá ɛbɔ́.

²⁵A géē ma ayí alɛwa. Ɛwa kú ayí uwɔ klla í lɛbɛ̄ɛka ácí nēe ī bū ɛbɛɛbɛ ā.

²⁶A géē hīla klla í kwú eko kú ókplícī kú uwɔ nɛ̄hi ā, bɛ̄ɛka ɔdɛ̄hɔ̄ nōo le jɛ̄, klla í jé, jāā gbéeko okpaakpa nēé cíkā ō cē ɔ̄ ā.

²⁷Ujóbu, alɔ lɛ ɛnyā kllɔcɛ́ gbojī dúú ɛɛ́. Ó wɛ ɔkwɛ̄yi. Jāhɔ̄ lɛ ɛlā nyā, ká ā lɛ ɔ́ jé ohígbu īyī uwɔ.”