Read idoma UJÓBU 6 Bible Online

UJÓBU 6 - idoma bible

UJÓBU 6

¹Anɔ́ɔ Ujóbu tá ɔ̄ ohi kahíníī,

²“Ɔ́dáŋ́ kéē lɔfú lɛ íwɔ́tū kú um mɛ́mla ɔdōbɔ̄bí nōo yá um ā miya nɛɛ,

³anú gáā gbɛnú fíyɛ́ ɔjɛ nēe bá okónu ísu nɛ̄hi á. Ɔdā nōo yá ɛɛ́ nɛ̄ n gē kɛlā fáa ŋmó okónu ā yɔ̄ abɔ́ɔ á.

⁴Ɔwɔicō nōo lɔfú fíyɛ́ dúú ā lɛ aɔ́yī kú nū tá cē um ɛɛ́. Ɛ́fa kú nū ā yɔ̄ ī pɛ́ tū odúúdú iyē kú um. Ɔwɔicō le ɔdōtūufi kú nū hɔ́ɔgba lɛyíkwu um.

⁵Ijakí kú ipácí gē klá cííí, eko nōó yɔ̄ ī lé ácí. Ɛna kē ī yɔ̄ cííí eko nōó gē lé ácí.

⁶Ɔdōlé ɔgbɔ ī lɔnyɛ ō lé ŋ, amáŋ ɛga ɛnɛ̄hɛ́ kú ipú ayi ugwū ā í lɔnyɛ ŋ́ fíyɛ́ á.

⁷Ń gē lé ɛdɔ ɔdōlé ɛ́gɔ́ɔmā ŋ́. Ɔdā dóódu nɛ̄ um lé gē tū um agba.

⁸Ó géē he um ɔtū nɛ̄hi ɔ́dāŋ ka Ɔwɔicō lɛ ɛ̄ba nɛ̄ um ba ā je ga um, klla lɛ ɔdā nɛ̄ um tíne ā yá gā um.

⁹Óndú ā í kē í yɛ í kwú um ú ŋmó, igbo ékpónú.

¹⁰N húmáyī lɛyítáajɛ lɛ ɔdā nɛ̄ Ɔwɔicō gē je ɔ́da ga um kā n yá ā, ɔ́dáŋ ka n gekwú, n géē tóómbili í gwéeyē. N kóō gáā lɛ ɛlá wu ɔnɔ kú ikwū ŋ́.

¹¹Ɔfú nyá nɛ̄ n lɛ ō yēeyī ɛɛ́ mā? Ɔdí wɛ eyīyōce kú um ɛɛ́ nɛ̄ n gē yēeyī kpɔ́ ɛ́ɛ́ mā?

¹²N lɛ ɔfú bɛ̄ɛka ɛcɔ̄ ā ŋ́. É kē yá um ŋmá oje ŋ́.

¹³Ń lɛ ɔfú dúúmā nya īyī um tá glá ŋ́, ɛ́ɛ́ nɛ̄ n gē lɛ ɔdā dúúmā ō tá um abɔ̄ ŋ́.

¹⁴Ācɛ nēé ményinyi oklóbīya uwā eko ɛ́gɛ́nyā ŋ́, í lɛ ojīlīmā ce Ɔwɔicō ŋ́ dúú.

¹⁵Amáŋ aá, aóklóbīya um ā, gē pllá um klla ī já um bɛ̄ɛka aɔ́kpá nēe gē je ŋmó ŋmá ajɛ eko nɛ̄ ɔwɔ í yā ŋ́ mā.

¹⁶Éŋkpɔ̄ kú aɔ́kpá ɔ́ɔmā hīlaŋ́dɔ́, ébú kē le cē klá uwá kpímm.

¹⁷Amáŋ eko nɛ̄ iyē okwɔ́lá kú ɔnɔ̄ gā, aɔ́kpá ā gē je ŋmó ŋmá ajɛ klēklēklē.

¹⁸Ācɛ nēe gē ce aínyankwūlūmī ī ga iyāwu ipú ígbíli ā gē nyā ŋmá ɔwɛ ī tíne éŋkpɔ̄. É gebí ipú ígbíli, cɛ́ɛ́ é le pɛ́ gekwú.

¹⁹Ācɛ nēe ī ga iyāwu nyā ōhī ŋmá Utéma, é kē bá ī tíne éŋkpɔ̄. Aɔ́há kú uwā ŋmá Ussɛ́ba, é klla bá ī leyīce ka aá géē má éŋkpɔ̄ dúú.

²⁰Amáŋ é má ɔdā nēé leyīce nɛ̄hi ā ŋ́, ohígbū ka aɔ́kpá ā kwú ŋmó nɛ̄ uwá í má éŋkpɔ̄ ō gwá ɛ́ɛ́ gɛ ŋ́.

²¹Ɛ́gɛ́nɛ̄ aɔ́kpá ɔ́ɔmā yá ācɛ nēe ī ga iyāwu ɔ́ɔmā nɛ̄ aá yá um dúú á. Aá bá ī má ɔdā ufi nōo yɔ̄ í yá um ā, anɔ́ɔ aá klla bá ī yɛ ɔkwɔɔkwu hɛ um tá á.

²²Ń da aá ka aá yá um ɛhi jéjée ɛ́ ŋ́, ɛ́ɛ́ nɛ̄ n gē da aá, ka aá lɛ omíci je lɛ ācɛ kwɛyí um ŋ́.

²³Ń kē da aá ka aá lɛ um hɛ́tá ŋmá abɔ̄ kú aólɛlā kú um, ámāŋ ka aá lɛ um lá kwúcē ŋmá abɔ̄ kú ɔ̄cɛ nōo ī pīya um tū jéejéē ɛ́ ŋ́.

²⁴Ó lɔhi. Aá nwū um mɛ́ɛnɛ. Aá da um ɔdā nɛ̄ um yá bɔ̄bí ā. N géē klá cííí, í jāhɔ̄ lɛ ɛlā ká aá.

²⁵Ɛlā ɔkwɛ̄yi gē cɛ̄ lɛ ɔ̄cɛ cɛ̄ ɛlā nɛ̄ ɔ̄cɛ ī ka lɛ ɔ̄cɛ ā. Amáŋ ɛlā nɛ̄ aá gē ka nyā í lɛ ā ŋ́. Ó ma ɔkwɛ̄yi ā fú ŋ́.

²⁶Aá gbɛlá ka aá gē tá um kwu ɔwɛ ɔ́dāŋ ka aá gē má um bɛ̄ɛka ɔ̄cɛ nōo ī kɛlā olíla ohígbu kóō lɛ eyīyōce gɛ ŋ́ mā.

²⁷Aá lɔfú tíicɛ, kú aá yálé, cɛ́ɛ́ kéē je ayókwū lɛ aá, kéē le pīya aɔ́fiyɛ ká aá. Aá kē lɔfú je aóklóbīya aá fíyɛ́ dúú lá, ká aá le gbo agbénú.

²⁸Aá kóō leyīkwu um eyī ka aá má ɔ̄. Ń gáā kɛ̄mgbɛ̄ lɛ aá ŋ́.

²⁹Aá mā ō ŋmó um ɛpɔ̄bí áncā. Aá kóō cɛ̄ ka ń yá ɔdōbɔ̄bí dóódu ɛ́ ŋ́.

³⁰Aá kóō gbɛlá ka amíɔɔ yɔ̄ ī kɛ̄kɛ̄mgbɛ̄ ŋ́. N kē jé ɛyɛ́ɛ́yɛ́yí kú ɛlā olɔhi ŋmá ɛlā obɔ̄bí.