Read idoma UJÓBU 7 Bible Online

UJÓBU 7 - idoma bible

UJÓBU 7

¹Oyēeyī kú ācɛ ipú ɛcɛ nyā lɔnɔ nɛ̄hi lɛbɛ̄ɛka úklɔ́ olɔfú nɛ̄hi nɛ̄ aícɔ́ɔja gē yá abɔ̄fú ā. Ó klla lɔfú tū iyē lɛbɛ̄ɛka oyēeyī kú ācɛ nēe ī yúklɔ́ ɔ́gwū nɛ̄hi ā.

²Oyēeyī kú alɔ ipú ɛcɛ nyā lɛbɛ̄ɛka ɔfiyɛ nōo yɔ̄ í tíne obobowú ō lɛ ɛyí kwu ɔ̄ ā. Ó klla lɛbɛ̄ɛka ɔ̄cɛ nōo ī yúklɔ́ ɔ́gwū nōo ī gbēyī ulé kú nū ā.

³Oyēeyī nɛ̄ um gē lā ɔyā alɛwa nyā í tīile dóódu ŋ́. Ŋmá otú ga otú, n yɔ̄ ī má ɔtūnōbí.

⁴Eko nɛ̄ n má gwutá ka n gbīyɔ̄lā nɛɛ, ó lɛbɛ̄ɛka otú ā klla kwú līkpō tōōtɔ̄ɔ̄ ā. N gē yɔ̄ ī pīya kpánákpáná yɔ̄ ī gbēyī eyōōnya, yɔ̄ ī gbɛlā ka eko nyá nɛ̄ eyī géē nyā ā?

⁵Iyē kú um kwú gbo ɛkɔ̄ mɛ́mla ipí nɛ̄hi. Aípí ā kwú kpó tū ifu, klla kwú hɛ́bū yɔ̄ í pɛ́ ifu kɔtɔɔɔ.

⁶Oyēeyī kú um yɔ̄ í wā oŋmɛ́yí fíyaa, ń kē lɛ eyīyōce dúúmā ŋ́.

⁷Woó, Ɔwɔicō, bla ka oyēeyī kú um lɛbɛ̄ɛka owu ā ōfōōfūnū nɛ. Ń gáā má olɔhi dúúmā glá ɛ́ɛ́ gɛ ŋ́.

⁸Ɔwɔicō, a gē má um abālɔbányā, amáŋ á gáā má um ŋ́ gbóógbóō ɛ́ɛ́ gɛ ŋ́. A géē tíne um, amáŋ n géē gekwú le yɛ ɛɛ́.

⁹Ɔ̄cɛ dóódu nōo gekwú í gē kwúcē wā oyēeyi gɛ ŋ́ bɛ̄ɛka ojuja nōo gē bí tāajɛ ā.

¹⁰Ó klla gāa kwúcē wā ɔlɛ́ nū ɔhá glá ɛɛ́ gɛ ŋ́. Ācɛ ɔlɛ́ nū klla géē je mlanyi nū.

¹¹Ohígbū ɔ́ɔmā, ń gáā le okónu klá glá ŋ́! N gēe yɔ̄ í kɛlā tɛ́ɛcɛ ohígbu ka n yɔ̄ ī cɔ̄nū, ɔtū kē yɔ̄ í wú um nɛ̄hi.

¹²Ɔdí yá nɛ̄ a yɔ̄ ī gbō um gɛɛ ā? Ń kē wɛ ísu nɛ̄hi amáŋ ka ɛbɛ́ obɔ̄bí kú ipú ísu nɛ̄hi ā[3] ɛ́ nɛ̄ a gē gbō um gɛɛ ŋ́.

¹³N má gwutá agōdō kú n̄ mlɛ́nyɔ́, klla gbɛlá ka ɔnɔ kú um géē dē cē tū.

¹⁴Amáŋ a kē gē bī ɔna le tū um ufi, klla í bī ɔna obɔ̄bí le tū um ufi nɛ̄hi.

¹⁵Ó gēe he um ɔtú nɛ̄hi kéē lɛ um ɔkɔ nya cē ká n gekwú fíyɛ́ ō yēeyī, kwú nyinyi, kwú pīya ikpokwú ōfōōfūnū ā.

¹⁶Ɛ̄jɛ̄ oyēeyī le jɛ̄ um ɛɛ́. Ɔwɔicō má um tá cíí ohígbu ka oyēeyī kú um le kpií ā, ó kē lɛ ile tū um ŋ́.

¹⁷Ɔdíyá nɛ̄ ɔlɛɛcɛ cɛgbá ga uwɔ dúú ɛ́ɛ́ nɛ̄ a ī lɛ ɛlá wu ɔ́ āa?

¹⁸A gē jila anú ɔcɔ̄ɔ̄cī dóódu, klla ī jé ɔ̄ má eko dóódu.

¹⁹Kwú eyī hī um tá eko kpiíí nɛ̄ n géē ce ahɛ mlɛ glá.

²⁰Ɔwɔicō, awɔ nōo gē héyī tū ɔ̄cɛ ā, ɔ́dáŋ ka n lɛ íne bīya, ɔdí nɛ̄ ɔ́ɔmā géē yá uwɔ ā? Ɔdí yá nɛ̄ a yɔ̄ ī fīyɛ̄ um odée igbalɛwa ā mɛ́ɛ̄? Abɔ̄ ó lɛ nɛ̄ um klla kwú pīya iyó ogbɛnú ga uwɔ ā mɛ́ɛ̄?

²¹Á je íne nɛ̄ n bīya ā mɛ́mla ɔdōbɔ̄bí nɛ̄ n yá ā yá um ɛhi glá ŋ́ nɛɛ? Ohígbū ka n géē kwú, é kē í je um nyi ānāānā. A géē tíne um, amáŋ ń kē gáā yēeyī ɛ́ɛ́ gɛ ŋ́.”