Read idoma UJÓBU 8 Bible Online

UJÓBU 8 - idoma bible

UJÓBU 8

¹Anɔ́ɔ Ubíldāadi, ɔ̄cɛ Ussúwa ā tá ɔ̄ ohi kahíníī,

²“Ɛlā kú uwɔ í lɛ ō mɛ ŋ́, amáŋ ɛlā nɛ̄ a ī ka ā kē wɛ áncā, bɛ̄ɛka owu nōo ī tá nɛ̄hi ā.

³Ɔwɔicō gē kɛpɔ̄ kpaakpa. Ó klla gē yá ɔdā nōo le kpaakpa eko dóódu.

⁴Ayí uwɔ le íne bīya ŋmá lɛ ō yá ɔdā nɛ̄ Ɔwɔicō kéē híī yá ŋ́ mā, anú yá nɛ̄ Ɔwɔicō yá uwā italā kú ɔdā nēé yá ā á.

⁵Amáŋ abālɔbányā, tíne otábɔ̄ ŋmá ɛgiyí Ɔwɔicō, nōo lɔfú fíyɛ́ dúú ā. Tíinalegwu lɛ ɔ́.

⁶Ɔ́dāŋ kā a le yēŋēē klla ī yá ucē ɔkwɛ̄yi, Ɔwɔicō géē cāŋjɛ wā í tá uwɔ abɔ̄, klla í je odúúdú agbénú mɛ́mla ɔlɛ́ kú uwɔ ā kwúcē gā awɔ, kóō wɛ ulé kú uwɔ.

⁷Ɔdā nɛ̄ a géē lɛ igbīhāajɛ ā gáā nwuné fíyɛ́ ɛ̄nɛ̄ a tɛtɛ lɛ ā á.

⁸Lɛ eyī yɛ ɛlā kú íjééyī kú íkée ā, ká ā lɛ eyī yɛ ɔkwɛ̄yi nɛ̄ aádáádā alɔ jé ā.

⁹Ohígbū ka oyēeyī kú alɔ le kpií ā ā, alɔ í jé ɔdā dúúmā ŋ́. Ɛ̄cī nɛ̄ alɔ gē lā ipú ɛcɛ nyā le kpiíí bɛ̄ɛka ɛ́gɛ́nɛ̄ ɔ̄cɛ gē cē eyī beé ā.

¹⁰Ɛlā nɛ̄ ācɛ ojéeyī kú īkée ka ā kéē nwū uwɔ ɛlā. Jāhɔ̄ lɛ ɛlā nēé lɛ ō ka ga uwɔ ā.

¹¹Aígwɛ̄bɛ́ í gē jɛ̄ ajɛ nōó lɛ éŋkpɔ̄ nwúné ŋ́.

¹²Ɔ́dāŋ ka éŋkpɔ̄ kwú ŋmó, uwá wɛ aflɛ́yí nēe ī kwú á, nááná nēé jɛ̄ nɛ̄ ɔ̄cɛ gē hɛ́ uwā le yá ɔdā dúúmā ɛɛ́ ŋ́ mā.

¹³Ācɛ nēe tá ō lɛyítáajɛ lɛ Ɔwɔicō ā lɛbɛ̄ɛka aígwɛ̄bɛ́ ɔ́ɔmā. Abɔ̄ é kwú ɛlá í gwū hɛ̄ Ɔwɔicō tá ā, é lɛ eyíyōce kú ɛcɔ̄bū dúúmā gɛ ŋ́.

¹⁴Ɔdā nɛ̄ ɔ̄cɛ ɛ́gɔ́ɔmā lɔtūce ā í gboji ō hɛ́ ŋ́ bɛ̄ɛka owú kú ɔlákápá ā.

¹⁵Ó gbolóce agbénú kú nū kóō gbō ɔ̄, amáŋ ó lɛ ā glá ŋ́. Ó lɛ abɔ̄ bī agbénú ɔ́ɔmā ká, amáŋ agbénú ā í lɛ́ɛcɛ glá ŋ́

¹⁶Ācɛ nēe ī yá ɔdōbɔ̄bí ā lɛbɛ̄ɛka ácí nēé ī kpó éŋkpɔ̄ tū ɔ̄ gbɔbū ɛ́ɛ́ ka ɛnɔ kóō bɛ̄cɛ ā. É gē tá ābɔ̄ ga ɛbɛɛbɛ kú ipú ɛhɔ̄ ā.

¹⁷É kē ī tá ɛgba jāā gaá bī aɛ́cɔ̄ nēé tikwū bá ā, klla ī tá ɛgba yɛ pi ápátɛ́cɔ̄ tá biílí.

¹⁸Amáŋ eko nēé kwú uwā í kpó fu ŋmá ajɛ, ɔ̄cɛ dóódu í gáā jé kéē bá abɔ́ɔ jééjéē ɛ́ɛ́ ŋ́.

¹⁹Ɛ́gɔ́ɔmā nɛ̄ éeyē kú ācɛ nēe ī yá ɔdōbɔ̄bí í gē gboji ŋ́ lɛ ā á. Cɛ́ɛ́ ācɛ ɔhá gáā mīyɛ ɔkwu uwā.

²⁰Ɔwɔicō í gáā tá ɔ̄cɛ dúúmā nōo ī yá ucē kpaakpa ā ŋ́. Ó kē gáā tá ɔ̄cɛ nōo ī yá ɔdōōbɔ̄bī ā abɔ̄ ŋ́.

²¹Ó géē cɛ̄ ga uwɔ yɛhɛ, klla tɔ́ɔga ohígbū éeyē kpɔ́ ɛɛ́.

²²Ɔwɔicō géē je uwēyī lɛ aólɛlā kú uwɔ. Ó klla ī je ɛga nɛ̄ ācobɔ̄bíipú lā ā yíífi.