Read idoma UJÓBU 9 Bible Online

UJÓBU 9 - idoma bible

UJÓBU 9

¹Anɔ́ɔ Ujóbu tóohi kahíníī,

²“Īī, n tɛtɛ le ɛjɛ̄ɛ̄jī ɔdā nɛ̄ a ka ā jé ɛɛ́ nɛ. Amáŋ, ɔlɛɛcɛ í kɛpɔ̄ klla lé ɛpɔ̄hi ka anúɔ í yá ɔdōbɔ̄bí dúúmā ŋ́ iyɔ̄bū Ɔwɔicō glá ŋ́.

³Ɔ́dāŋ ka ɔ̄cɛ tíne ō kɛpɔ̄ mɛ́mla anú, Ɔwɔicō lɔfú dɔɔ̄kā úlúúlā nɛ̄ ɔ̄cɛ dóódu í gáā cīla glá ŋ́.

⁴Ɔwɔicō jéeyī klla lɛ ɔfú nɛ̄hi. Ɔ̄cɛ dúúmā í bɛ̄yíkwu ɔ́, ká ɔ̄cɛ ɔ́ɔmā kóō yálé glá ŋ́.

⁵Gbɔbū ɛ́ɛ́ ka ɔ̄cɛ dúúmā kóō jé, ó ī kpó aɛ́fú hɛ́ wulú. Ó gē pīya uwá eyī klá ajɛ ohígbū kóō le cɔ̄nū.

⁶Ɔwɔicō géē jīla ɛcɛ iyē jāā ga etikpa kú nū. Ó klla ī cɛ̄ lɛ aɛ́cɔ̄ nōó ce ɛyí uwā jīliyē.

⁷Ó lɛ ɔfú je ɔ́da lɛ ɛnɔ, nɛ̄ ɛnɔ í gáā wɛ̄ɛcɛ ɛ́ɛ́ nōó gē fíyajɛ ŋ́. Ó kē lɔfú yá ka aínyílɔ́wɔ kóō fíyajɛ otú ŋ́ glá.

⁸Anú ōfōōfūnū, yá ɔkpáncō kwu ɛga nōó kwu ā, klla ī kwú úgbagwú kú ísu tū cíí á.

⁹Anú yá aínyílɔ́ɔwɔ nēé hī ka ɔgwú, mɛ́mla ɛ́nɛ́ ugwū layīlayī, mɛ́mla ogbɔ̄lɛ́ gbēyī ɔyā mɛ́mla aínyílɔ́ɔwɔ nēe kwu ɛhícō ā á.

¹⁰Ó gē yá ɔda nɛ̄hi nɛ̄ alɛɛcɛ í jɛ́yí nū glá ŋ́, mɛ́mla aɔ́dā idáagó alɛwa nɛ̄ ɔ̄cɛ í gbo uwá áluka glá ŋ́.

¹¹Ó gē yɛ pi um, amáŋ ń má ɔ̄ ŋ́. Ń kōō jé kóō yɔ̄ pi um ŋ́.

¹²Ó gē je ɔdā nōó tíne ā, ɔ̄cɛ dóódu í kē ci ɔ́ anú glá ŋ́. Ɔnyɛ géē lɔtū da ɔ́ ɔ̄kā ka, ‘Ɔdí nɛ̄ a gē yá yɔ̄’ ā glá āā?

¹³Ɔwɔicō í gē ci īyī nū ícɔ̄nū ɔ́dāŋ nōó le cɔ̄nū ŋ́. Ó kwú aólɛlā kú nū nēe tá ɛbɛ́ obɔ̄bí kú ísu nɛ̄hi, nēé hī ka Uráhāabu ā, abɔ̄ kóō bɛ̄yíkwu Ɔwɔicō ā í yálé ɛɛ́.

¹⁴Ó lɛ ā, abɔ̄ ó yá lɛ ɛ́ɛ́ nɛ̄ n géē má ɔkɔ í ka ipéyī nū glá aā?

¹⁵Nááná nɛ̄ ń yá ɔdōbɔ̄bí dúúmā ŋ́ mā, ń lɛ ɔkɔ dúúmā ō ka ŋ́. Ɔkɔ ōfōōfūnū nɛ̄ n géē yɔ̄ ī gbā lɛ Ɔwɔīcō nōo ī kɛpɔ̄ tū um ā, kóō méyīnyinyi um á.

¹⁶Ɔ́dāŋ ka n lɛ ígwú hī ɔ̄ ka alɔ kɛpɔ̄, nōó cɛ̄ nááná, ń gáā cɛ̄ koó le ahɔ̄ jē lɛ ɛlā nɛ̄ n ka ā ŋ́.

¹⁷Ó géē tū owu nɛ̄hi wā í ca um tū ɔkpá, klla í yá um ágbe áncā nɛ.

¹⁸Ó cɛ̄ ga um fu owu ŋ́, amáŋ, ó cɛ̄ gā um yɔ̄ ī móōwē ipú oyēeyī kú um.

¹⁹Ɔ́dāŋ koó wɛ ɔdā ɔfú nɛ̄ɛ, Ɔwɔicō géē cɛ̄ ɔfú. Ɔ́dáŋ koó wɛ ɔdā ō bī ɔ̄cɛ ga ɔnu ɛpɔ̄ nɛɛ, ɔnyɛ géē hɛ́pɔ̄ ka ami mɛ́mla anú ā?

²⁰Nááná nɛ̄ ń yá ɔdōbɔ̄bí ŋ́ mā, Ɔwɔicō gē bī ɔkɔ nɛ̄ n ka piiíí ā le ŋmó um ɛpɔ̄bí. Nááná nɛ̄ n gē yá ucē kpaakpa ā, ó géē pi ɛpɔ̄ tū um ɔkɔ.

²¹Ńááná nɛ̄ ń yá ɔdā dúúmā bɔ̄bí ŋ́ mā, ń lɛ ɛlá wu ɔdā nōo í yá um ā gɛ ŋ́.

²²Ɔdā dóódu í cɛgbá tū um ɛ́ɛ́ gɛ ŋ́ ohígbū ka Ɔwɔicō gē kpó ācɛ okpaakpa mɛ́mla ācobɔ̄bíipú yíífi ɔwɛ ékpónú.

²³Eko dúúmā nɛ̄ ámíyā lɛ ācɛ nēe yá ɔdōbɔ̄bí dúúmā ŋ́ ŋmó acígilí, Ɔwɔicō gē yɛhɛ tū uwā ipú ákanya kú uwā.

²⁴Ɔwɔicō kwú ɛcɛ ú tá ipú abɔ̄ kú ācobɔ̄bíipú. Ó kē le abɔ̄ klá aɔ́cɛ́ ohɛ́pɔ̄ ā eyī, í cɛ̄ lɛ uwá kéē hɛ́pɔ̄ kpaakpa ŋ́. Ɔwɔicō yá ɛnyā á. Ó wɛ anú ŋ́, ɔnyɛ kē yá ɛnyā āa?

²⁵Oyēeyī kú um yɔ̄ ī yɛ fíyaa, ɔdōōlɔhi dóódu í kē yá gā um ŋ́.

²⁶Oyēeyī kú um yɔ̄ ī wā oŋmɛ́yí fíyaa bɛ̄ɛka úgbéenyi nōo ī yɛ éŋkpɔ̄ fíyaa ā. Ó klla wā í yɛ fíya bɛ̄ɛka ɔgɔ nōo wā gáā je ugwū ā.

²⁷Ɔ́dāŋ ka n le ka ka, ń lɛ ɛlá wu unwalu kú um gɛ ŋ́, ká n̄ lɛ eyī um pīyabɔ̄ lɛ ɛhɛ kwu aīnu,

²⁸n gēe yɔ̄ í yúufi kú odúúdú ōwē nɛ̄ n yɔ̄ ī má ā géē yá um kpɔ́. Ohígbū ka n jé ka awɔ nōo wɛ Ɔwɔicō ā í gáā cɛ̄ ka amíyɔ í yá ɔdōbɔ̄bí ŋ́.

²⁹Abɔ̄ a le ɛpɔ̄bí ŋmó um ā, ɔdí yá nɛ̄ n cíkā ō kllá í nyɔ̄ í ka ɔkɔ kú um bónū áncā āa?

³⁰Ɔ́dāŋ ka n bī éŋkpɔ̄ opéee nɛ̄hi lɛ iyē gwá, klla lɛ īyī um abɔ̄ na mla ukwɔ-ɔ́cɛ̄ nááná,

³¹a géē kwu um ga ipú ɔ̄gɔ̄ ɔ́tɔ kpɔ́, nɛ̄ īlī kú um klla í yɔ̄ í yá uwēyī um dúú.

³²Ɔ́dāŋ ka Ɔwɔicō wɛ ɔ̄cɛ ɔlamu bɛ̄ɛka ami ā nɛɛ, ń yɛ í lɔfú ka ɔkɔ mɛ́mla anú. N géē yɛ í lɛ ɔkpá tá lɛ ɔ́, ka ami mɛ́mla anú kéē lɛ ɛpɔ̄ hɛ́ lɛ alɔ.

³³Eyī yá um ka ɔ̄cɛ éyi kóō yɔ̄ nɛ̄ ami mɛ́mla Ɔwɔicō í ka ɔkɔ kú alɔ lɛ ɔ́, nɛ̄ ɔ̄cɛ ɔ́ɔmā í lɛ íkwu gē hɛ́pɔ̄ kú alɔ.

³⁴Ɔwɔicō, a híī yá um italā ɛ́ɛ́ gɛ ŋ́, a kē híī tū um ufi gɛ ŋ́.

³⁵Abɔ̄ Ɔwɔicō yɔ̄ ī tū um ufi nɛ̄ ń lɛ īyī um ŋ́ mā, ń má okónu dúúmā ka ɔkɔ mɛ́mla anú ŋ́.