Read idoma AÍJĒ KÚ Ɛ̄GBĀ 10 Bible Online

AÍJĒ KÚ Ɛ̄GBĀ 10 - idoma bible

AÍJĒ KÚ Ɛ̄GBĀ 10

¹Ɔdíyá nāa yɔ̄ ɛga oligbō ā, Óndú? Ɔdíyá nāa je iyī uwɔ tayínū, eko nɛ̄ alɔ yɔ̄ ipú unwalu kú alɔ ā, Óndú?

²Ācɛ o yɔ́bɔ́cɛ nēe klla bɔ̄bíipú ā, bá yɔ̄ ī yá aógbɛhá ŋmó. Ukpa nēé kpla gbēyī ācɛ ɔhá ā, kóō lɛ uwá abɔ̄yī uwā kpó kwú.

³Ɔ̄cɛ obɔ̄bíipū ā, yɔ̄ ī ka ɔbɔ́cɛ kú ɔdōbɔ̄bí nōo kwu ɔ́ ɔtū kóō yá ā. Ācɛ oyúnwū ɔdā ā, gē wɔ́tū Óndú ā klla gē ka atufú lɛ ɔ́.

⁴Ɔ̄cɛ obɔ̄bíipū ā í lɛ ɛlá wu Óndú ŋ́, ó ka Ɔwɔicō í wɛ ɔdā dúúmā ŋ́.

⁵Ɔdā dóódu nɛ̄ ɔ̄cɛ obɔ̄bíipū gē yá ā, yɔ̄ ī gɔbū lɛ ɔ́ ɔwɛ dóódu. Ó jɛ́ɛ́yí ɔwɛ nɛ̄ Ɔwɔicō í kɛpɔ̄ kú nū ā ŋ́. Ɔ̄cɛ obɔ́bíipú ā yɔ̄ ī kpɛ́nwū klla ī cɛ̄nwū lɛ aólɛlā kú nū eko dóódu.

⁶Ó gē da īyī nū kahíníī, “Ɔdā dúúmā í gáā yá um gbóógbóō ŋ́, ɛ́ɛ́ nɛ̄ n kōō ī ga ipú unwalu dúúmā glá gɛ ŋ́.”

⁷ Okónu ō tá, ɛ̄kɛ̄mgbɛ̄ ō kā mɛ́mla ɔfū ōlā le mu ɔ́ okónu. Ó gē bī unwalu gé lɛ ācɛ. Ɛlā obɔ̄bí í kē lɔnɔ tū ɔ̄ ka ŋ́.

⁸É gē nyɔ̄ ī tayínu ipú aípɔ́lɛ́ ā, kéē há acɛ nēé yá ɔdōbɔ̄bí dúúmā ŋ́ mā ŋmó bónū icííci. Ó yɔ̄ ī gbō ɔ̄cɛ nɛ̄ ó lɛ ɔ̄cɛ dúúmā ō gbō uwā ŋ́ mā gɛɛ.

⁹Ó gē tayínū gē gbēyī ɔlɛhɔ́cɛ ɛ́gɛ́nɛ̄ ágábá gē gbēyī ɛbɛ́ kóō kwú lé ā. Cɛ́ɛ́ eko nɛ̄ ukpa kú nū lɛ uwá kwú ɛɛ́, cɛ́ɛ́ ó lɛ uwá pi nyɔ̄.

¹⁰Ó bī ɔfú kú nū le ācɛ nēé lɔfú ŋ́ mā hɛ́ gwāajɛ gblugudu, má wúlaklá uwá, le uwá cā tāajɛ.

¹¹Ɔ̄cɛ obɔ̄bí gē gbɛlá ipú ɔtū kú nū kahíníī, “Ɔwɔicō í lɛ ɛlá wu ɔ́ ŋ́. Ó kwú eyī ú tónū ɛɛ́, ó kē gaá má ɔdā nɛ̄ um yá nyā ŋ́.”

¹²Óndú, Ɔwɔicō, cāŋjɛ ká ā lɛ italā yá uwā. Óndú, ā híīī mlanyī ācɛ nēé bá ī yá ōwē nyá ŋ́.

¹³Ɔdíyá nɛ̄ ɔ̄cɛ obɔ̄bíipū géē yɔ̄ í leyī gla Ɔwɔicō, klla yɔ̄ ī gwō ipú ɔtū kú nū kahíníī, “Ɔwɔicō í gáā yá um italā ŋ́” mā.

¹⁴Amáŋ, a gē mɛ́ɛbɛ dúú. A kē móōwē mɛ́mla unwalu nɛ̄ aógbɛhá bá ipú nū ā. A kē le tútū eko dóódu ká ā tá uwā abɔ̄ ɛɛ́. Ɔ̄cɛ nɛ̄ ó lɛ otábɔ̄ ŋ́ mā, kwú īyī nū í gā uwɔ ɛɛ́. Awɔ kē húmáyī tá ayókwū abɔ̄ á.

¹⁵Kwú ɔfú kú ācobɔ̄bíipū ā, ú ŋmá ɛgiyí uwā. Yá uwā italā jāā gbéeko nēé klla yá ucē kú ɔ̄bíipū igbɔhá gɛ ŋ́.

¹⁶Óndú ā wɛ ɔcɛ́ piyóó. Ācɛ nēe gē pɛ̄cí ā, géē je kpó yíífi ŋmá ajɛ kú ɔlɛ́ nū.

¹⁷Óndú, a géē jāhɔ̄ lɛ ɔkɔ nɛ̄ ācɛ nēe tá iyī uwā wāajɛ ā gē gbā gā awɔ ā. A klla ī tú uwā ɔtū kwu ɔtū, ī lɛ ɔfú tū uwā iyē.

¹⁸A gē pó ikwū nɛ̄ ācɛ nēé bá ī pīyatū ā mɛ́mla ayōkwū gē je ā. A géē hɛ́ ɛpɔ̄hi le uwá, nɛ̄ alɛɛcɛ í klla gáā tū uwā ufi ɛ́ɛ́ gɛ ŋ́.