Read idoma AÍJĒ KÚ Ɛ̄GBĀ 102 Bible Online

AÍJĒ KÚ Ɛ̄GBĀ 102 - idoma bible

AÍJĒ KÚ Ɛ̄GBĀ 102

¹Óndú, jāhɔ̄ lɛ ɔkɔ nɛ̄ n gē gbā ā, kócōō lɛ ikwū nɛ̄ n gē je ka ā tá um abɔ̄ ā pó.

²A je eyī kú uwɔ tónū ŋmá ɛgiyí um eko kú ákanya mɛ́mla unwalu kú um ŋ́. Óndú, jāhɔ̄ gā um, ká ā lɛ ohi tá um fíya eko nɛ̄ n gē hī uwɔ igwú ā.

³Oyēeyī kú um gē bī tāajɛ bɛ̄ɛka ódūdū ā ɛɛ́, odúúdú iyē kú um yɔ̄ ī je yɔlá ŋmá ajɛ ɛɛ́.

⁴N kwú pīya bɛ̄ɛka ácí nōo le ŋmókókó, nɛ̄ ɔ̄cɛ ī da báajɛ kwɛɛ́kwɛɛ́ ā ɛɛ́. Ɔdōlé dúúmā í klla ŋmó um unwū ō lé gɛ ŋ́.

⁵N yɔ̄ í tíifu gbōmgbōm, n kwú nyinyi ŋmá ajɛ gaá hile ikpokwú yēgēē ōfōōfūnū.

⁶N lɛbɛ̄ɛka epu nōo klá ipú ígbíli ā, ámáŋ ogwugwu kú ipú alácɛ̄ ā.

⁷N gē gwutá, amáŋ ń gbiyɔ̄lā ŋ́. N klla lɛbɛ̄ɛka ígbáanɔ nōo ce ajīlɛ̄yí inu ōfōōfūnū ā.

⁸Aólɛlā kú um bá ī cá um ɛcá eko dóódu. Ācɛ nēe ī yá um okónu ā, klla bá ī bī iyē kú um gē le tókónu lɛ ācɛ.

⁹N gē lé ewo ikɔkɔ ɔdōlé, agīje kú um klla le wīya tɔ̄há mla ɔdā nɛ̄ n yɔ̄ ī gwá ā.

¹⁰A klla kwú um ú ŋmá ajɛ lɛ um tá tónū, ohígbū ánya mɛ́mla ícɔ̄nū kú uwɔ.

¹¹Oyēeyī kú um lɛbɛ̄ɛka ojiji kú ɔ̄nɔ̄ɔ̄nɛ̄ nōo ī bí tāajɛ eko nɛ̄ otú kwú bī ā. N klla lɛbɛ̄ɛka ácí nōo kwú ŋmōkókó ā.

¹²Amáŋ, awɔ, Óndú ā, wɛ ɔcɛ́ piyóó, odúúdú ācɛ kú eko ɛyɛ́ɛyɛ́yí gē blakwu uwɔ ŋmá eko éyi ga eko ɔhá.

¹³A géē cāŋjɛ cɛ́ɛ́ ká ā ményinyi Usáyɔn, ohígbū ka eko nāa í tá uwā ɔtūlé ā le yá ɛɛ́. Eko nāa tū ā kē yɔ̄ mɛ́ɛ̄ á.

¹⁴Usáyɔn he ācocɛ̄hɔ̄ kú uwɔ ɔtū, nááná nōó kwú yíífi ɛɛ́ mā. É géē ményinyi nū, nááná nōó tá alácɛ̄ ā.

¹⁵Odúúdú aéwo géē yúufi Óndú ā. Odúúdú aɔ́cɛ́ kú ɛcɛ klla í yúufi ɛ́gɛ́nɛ̄ ó lɔfú lɛ ā.

¹⁶Eko nɛ̄ Óndú ā lɛ Usáyɔn túgwó, ó géē ma ɛgahi kú nū fú lɛ ācɛ.

¹⁷Ó géē pó ɔkɔ kú ācɛ ɔlɛ́ nū, nēé lɛ ɔlɛ́ ŋ́ mā, ó kē í tá uwā ohi.

¹⁸Aá lɛ ɔdā nɛ̄ Óndú yá nyā tá tū ɔkpá gbēyī ayí igbīhi nēe ī wā ā, cɛ́ɛ́ kú ayááyí nēé ma ɛ́ɛ́ ŋ́ mā, géē cɛ̄tra Óndú.

¹⁹Óndú ā pīyeyī má ajɛ ŋmá ɛga otīihɔ kú nū ɔkpáncō,

²⁰anɔ́ɔ ó le ifu nɛ̄ aálagbá ā bá ī tá ā pó á. Anɔ́ɔ ó gaá le ācɛ nēé ŋmɛ́pɔ̄bí kéē lɛ uwá kpó ŋmó ā hɛ́tá á.

²¹Ohígbū ɔ́ɔmā, é géē bī iyē kú nū tɔ́ɔna Usáyɔn, klla í cɛ̄tra anū igelī nɛ̄hi kú Ujerúsālɛm,

²²eko nɛ̄ aéwo mla ajɔ̄ɔ̄cɛ́ géē pīya tɔ̄há wā í gbɔ̄ɔkɔ lɛ Óndú.

²³Óndú ā lɛ um ɔfú cē tū, eko kú ɔyípōklóbīya kú um, klla kwú oyēeyī kú um ú yá kpií.

²⁴Ɔwɔicō, ā híī je um ŋmá amānyā abālɔbányā ɛ́ɛ́ kú n̄ je hīla ŋ́. Óndú, a yēeyī piyóó.

²⁵ Ŋmá eko ígblé nɛ̄ ó je ikpó kú ɛcɛ nyā táajɛ ā, ó bī abɔ̄ kú nū le odúúdú ɔkpáncō mla ɔdā dóódu nēe bá ipú nū ā kpó yá.

²⁶Odúúdú uwā géē mɛtāajɛ, amáŋ a géē yɔ̄ piyóó. Ɛcɛ mɛ́mla ɔkpancō géē kpó gbɛnɛ̄ŋcɛ̄ bɛ̄ɛka īlī ā, é kē géē kpó uwā bónū bɛ̄ɛka áhingílí ā. é kē í je gblífi ŋmá ajɛ.

²⁷Amáŋ, a yɔ̄ ɛ́gɛ́nɛ̄ a lɛ ā, á gē pīyabɔ̄ ŋ́. Oyēeyī kú uwɔ í gē ŋmɛ́yí ŋ́.

²⁸Ayí kú alɔ géē lā ipú ajɛ ā ɛbɔ́, a géē yɔ̄ ī leyīkwu ayááyí uwā, nēé géē bá ɛbɔ́.