Read idoma AÍJĒ KÚ Ɛ̄GBĀ 103 Bible Online

AÍJĒ KÚ Ɛ̄GBĀ 103 - idoma bible

AÍJĒ KÚ Ɛ̄GBĀ 103

¹N géē bī odúúdú ɔtū kú um le cɛ̄tra Óndú. N gwéeyē ŋmá ipú ɔtū dúúdú ohígbū ɛjɛ̄ɛ̄jī ɔdā nɛ̄ Óndú ā yá ā.

²N cɛ̄tra Óndú ā ŋmá ipú ɔtū kú um dúúdu, ā kē je mlanyī odúúdú ɔdā olɔhi nɛ̄ ó yá ā ŋ́.

³Anú je odúúdú íne nɛ̄ n bīya ā, yá um ɛhi klla le um nyatá ŋmá ipú odúúdú ōcē nɛ̄ n du kpɛ́mm āá.

⁴Anú nya um tá ŋmá ɔlékwū á. Ó ményinyi um le ɔhā hɛ́ ce um.

⁵Anú gē yá odúúdú ɛgbá kú n gā um á, cɛ́ɛ́ ká n̄ hīla ŋ́, kú n̄ klla lɔfú nɛ̄hi bɛ̄ɛka ígbáanɔ nēé hī okpé ā.

⁶Óndú, a gē cɛ̄pɔ̄ kú ācɛ nēé gē pīyatū ā, a klla ī hɛ́pɔ̄ okpaakpa lɛ uwá.

⁷Ó le ɔdā nɛ̄ ó miya kóō yá ā mafú lɛ Umósīsi, ó klla le úklɔ́ nɛ̄hi nɛ̄ ó yá ā mafú lɛ ācɛ kú Ísrɛ̄lu.

⁸ Óndú ā gbonɛnɛ klla ī ményinyi ɔ̄cɛ, ó gē cɔ̄nū fíyaa ŋ́, ó klla gē yíihɔtū eko dóódu cabá cabá.

⁹Ó gáā cɔ̄nū mla ācɛ ɔlɛ́ nū piyóó ŋ́, ɛ́ɛ́ nōo géē yɔ̄ ī dɛ̄gba tū uwā piyóó ŋ́ má.

¹⁰Ó gē yá alɔ italā ɛ́gɛ́nɛ̄ o cíkā lɛ ɔdā nɛ̄ alɔ yá ā ŋ́. Ó kē cíla alɔ óluma ɛ́gɛ́nɛ̄ íne nɛ̄ alɔ bīya ā lɛ ā ŋ́.

¹¹Ɔwɔicō yíihɔtū tá ācɛ nēe gē lɛ ojīlīmā ce ɔ́ ā. Ɛ́gɛ́nɛ̄ ɔkpáncō nwuné nɛ̄ ó klá odúúdú ɛcɛ ā, ɛ́gɔ́ɔmā nɛ̄ ihɔtū nɛ̄ ó yá tá alɔ ā nwuné lɛ á.

¹²Ɔwɔicō kwú íne nɛ̄ alɔ bīya ā ú yá alɔ ɛhi, klla kwú ɔ̄ ú ŋmá ɛgiyí alɔ ligbó-ligbó bɛ̄ɛka ɛ́gɛ́nɛ̄ ɛnɔ̄ɔ̄cī ligbó ŋmá ɛnɔ̄ɔ̄nɛ̄ ā.

¹³Ɛ́gɛ́nɛ̄ ádā gē gbonɛnɛ lɛ ɔyí nū lɛ ā, ɛ́gɔ́ɔmā nɛ̄ Ɔwɔicō kē gbonɛnɛ lɛ ācɛ nēe gē yúufi nū ā lɛ á.

¹⁴Ohígbū ka, ó jé ɔdā nɛ̄ ó bī le yá alɔ ā, ó klla le bla ka alɔ ɔ́ɔ wɛ ajɛ áncā nɛ.

¹⁵Alɔ nēe wɛ alɛɛcɛ ā, oyēeyī kú alɔ le kpií bɛ̄ɛka ákú ácí nɛ̄ ó gē yɔ̄ gbojī ŋ́ mā. Alɔ gē jɛ̄ bɛ̄ɛka ododó kú ipácí ā.

¹⁶Eko nɛ̄ owu le tá klá anú, ó kwú ŋmó, klla gebí tāajɛ, nɛ̄ ɔ̄cɛ í klla gáā má ɛga nōó tɛtɛ kwu ā gɛ ŋ́.

¹⁷Amáŋ ihɔtū kú Óndú ā yɔ̄ eko dóódu lɛ ācɛ nēe gē gbā ɔ̄ ɛ̄gbā piyóó ā. Olɔhi kú nū kē yɔ̄ lɛ uwá ŋmá ayááyí ga ayááyí.

¹⁸Ó klla yɔ̄ lɛ ācɛ nēe lɛ okónu nōó ce lɛ uwá ā tū. mla ācɛ nēe lɛyítáajɛ lɛ íne kú nū tū.

¹⁹Óndú ā kwú akpa kú ɔcɛ́ kú nū ú kwu ɔkpáncō ɛɛ́, anú wɛ ɔcɛ́ kú ɛga dóódu, klla ī gbō ɛga dóódu á.

²⁰Aálelékwū ōtɛ̄hɔ kú nū nēe lɔfú iyē nɛ̄hi ā, aá nēe gē lɛyítáajɛ lɛ ɔ́da mɛ́mla íne kú nū, klla gē lɛyítáajɛ lɛ ɛlā kú nū ā, kóō cɛ̄tra Óndú ā.

²¹Aá cɛ̄tra Óndú ā, odúúdú aícɔ́ɔja kú nū nēe bá ɔkpáncō ā, ācocɛ̄hɔ̄ kú nū, nēe gē yá ɔdā nōó tíne ā.

²²Aá cɛ̄tra Óndú, odúúdú aá nōó yá ā. N bī ɛjɛ̄ɛ̄jī odo kú um le cɛ̄tra Óndú ā.