Read idoma AÍJĒ KÚ Ɛ̄GBĀ 104 Bible Online

AÍJĒ KÚ Ɛ̄GBĀ 104 - idoma bible

AÍJĒ KÚ Ɛ̄GBĀ 104

¹N cɛ̄tra awɔ, Óndú, Ɔwɔicō kú um, a lɔfú nɛ̄hi. A le ifa yá mla ojīlīmā mɛ́mla ɛgahi bɛ̄ɛka ɛ́gɛ́nɛ̄ ɔ̄cɛ ī lɛ úwé wiyē ā.

²A klla le ɔlá ofíyajɛ klá iyē bɛ̄ɛka īlī ā. A lɛ ɔkpáncō nándaa bɛ̄ɛka ɛ́gɛ́nɛ̄ ɔ̄cɛ ī nā ipoto daa klá ɛyí inu ā.

³A le ɔlɛ́ uwɔ gwó cɛyí éŋkpɔ̄, ɔkpáncō, a kwú ojuja ú pīya úgbɔ́nya kú ɛfú kú uwɔ. A klla ce owu bɛ̄ɛka ɛ́gɛ́nɛ̄ ɔ̄cɛ ī ce ɔnya ā.

⁴A kwu owu mla ofúlutu ú pīya ɔdā ōtɛ̄hɔ̄ kú uwɔ. A klla le ɔwolímanya pīya ɔdā ō cɛ̄ uwɔ ɛhɔ̄ dúú.

⁵A kwú ɛcɛ ú kwu ikpó kú nū nāa le táajɛ ā kli, nɛ̄ ɔdā dúúmā ī gáā fu ɔ́ ɔkwu ŋmá ajɛ glá ŋ́.

⁶A kwú itekwú ú klá ɔ́ iyē bɛ̄ɛka awulú ā, éŋkpɔ̄ klla kwú aɛ́fu ā ú mulɛ.

⁷Amáŋ eko dúúmā, nāa lɛ ɛgba dɛ̄ tū éŋkpɔ̄ ā, ó kwú pɛ́ nyɔ̄ fíyaa, eko nēé lɛ ɛgba kú ɔ́da kú uwɔ pó, é gē pɛ́ kwu nyɔ̄ fíyaa.

⁸É pɛ́ gla ɛyí ɛfú, ga ɔpɛ́ kú ɛfu, ga ɛga nāa yá lɛ uwá ā.

⁹A le ɛjī tū lɛ uwá, nēé gaá pɛ́ gla anú wā ipú ɛcɛ í mīya ɔ́ tāabɔ̄ dúúdú glá gɛ ŋ́.

¹⁰A le ayɔ́kpá yá kéē pɛ́ ɔpɛ́ kú aɛ́fu, ísu kē yɔ ī pɛ́ ɔtāhɛ̄ kú aɛ́fu nɛ̄ŋcɛ́ mla aɔ́pɛ́ ā.

¹¹Ɛgiyí uwā nɛ̄ aɛ́bɛ́ kú ipácí gē wā ī gwá éŋkpɔ̄ á, abɔ́ɔ nɛ̄ aíjakī kú ipácí gē gwá éŋkpɔ̄ cɛ́ɛ́ kú ijēēnyi kú uwā kóō mɛ á.

¹²Aígbáanɔ gē gwó ɔlɛ́ ce icō aɔ́cí nēe kwu ɔkpá ā ajaajɛ ā, é klla ī gwíijē abɔ́ɔ.

¹³A gē tū ɔwɔ klá aɛ́fu nɛ̄ŋcɛ́ ā, ŋmá ɔkpáncō, cɛ́ɛ́ kú ɛcɛ kóō le mu mla ɔhā kú uwɔ.

¹⁴A yá kú ácí kóō bū lɛ aɛ́na, a klla je aɔ́dɛ̄hɔ̄ lɛ alɛɛcɛ kéē hí, cɛ́ɛ́ kú ɔdōlé kóō le bɛ̄cɛ ŋmá anú lɛ uwá.

¹⁵Cɛ́ɛ́ ka é bī īkpɔ̄dɛ̄hɔ̄ ā yá ejé nōo í cɛ̄ lɛ ɔtū he uwá. Mɛ́mla anɔ̄ nōo í cɛ̄ lɛ alɔ gwéeyē, klla mla ɔdōlé nōo ó cɛ̄ lɛ alɔ lɔfú iyē ā.

¹⁶Aɔ́cí Usɛ́da kú Ulɛ́bānɔn ā wɛ aɔ́cí kú Óndú abɔ̄yī nū nōó tū á. Ó kē ī kpó éŋkpɔ̄ tū ɔ̄ lɔɔlɔhi.

¹⁷Ābɔ̄ kú aɔ́cí ā nɛ̄ aígbáanɔ gē gwó ɔlɛ́ kú uwā ce á, aómlɛgwā gē gwó ɔlɛ́ kú uwā ce icó ɔcí nēé hī ka Ufɛ́ɛ ā.

¹⁸Aɛ́wū kú ipácí ī lā ɛyí ɛfu ā.

¹⁹A le ɔyā yá kwu, ká ālɔ̄ bī le jé ɛ̄cī nōo ī yá ipú ɔyā a. Ɛnɔ kē ī gaajɛ eko nōo cíkā ō gaajɛ ā.

²⁰A le otú yá, cɛ́ɛ́ ipú obū ā nɛ̄ odúúdú aɛ́bɛ́ ipácí ā gē wɛ̄ɛcɛ ī lúlé á.

²¹Aágábá ī tōoji, abɔ̄ é bá yɔ̄ ī tɔ́tɛ́ gē tíne ɔdōlé nɛ̄ Óndú ā ī je lɛ uwá ā.

²²Eko dúúmā nɛ̄ eyī le nyā, é nyɔ̄ gaá gwutá ipú ɔ̄gɔ̄ kú uwā.

²³Cɛ́ɛ́, alɛɛcɛ le bɛ̄cɛ gaá gbɔɔ́ ō yúklɔ́ kú uwā jāā gbéeko nɛ̄ ɔ̄nɔ̄ɔ̄nɛ̄ klla le gbō kpɔ́.

²⁴Óndú, a yá ɔdā alɛwa. Íjéeyī nɛ̄hi kú uwɔ ā nāa bī le yá uwā á. Ɛcɛ le mu mla ɔdā nāa yá ā.

²⁵Itekwú nōo nwuné klla lɔwá ā yɔ̄ abɔ́ɔ dúú. Ɔdā alɛwa, kwu ɛnɛ̄hi kwu ɛnɛ̄ŋcɛ́ lā ipú itekwú ā.

²⁶ Úgbéenyi gē yɛ eyī nū. Ulɛbíyātan, ɛbɛ́ obɔ̄bī nɛ̄hi nāa yá kóō bēē hiijā ipú éŋkpɔ̄ ā lā ipú nū dúú.

²⁷Ɔdā dóódu nāa yá ā gē lēyīce uwɔ klla gbolóce uwɔ ká ā je ɔdōlé lɛ uwá, eko nɛ̄ ɛgbá nū ce uwá ā.

²⁸A í jē ɔdōlé ā lɛ uwá, é kē ī lé ɔdōlé ɔ́ɔmā, klla ī nīīpú.

²⁹Eko dúúmā nāa lɛ eyī pīya ŋmá ɛgiyí uwā, ufi lɛ uwá kwú, eko dúúmā nāa mīyɛ owu kú uwɔ, é le pɛ́ gekwú, klla kwúcē ga ipú ajɛ nāa bī le yá uwā ā.

³⁰Amáŋ eko dúúmā nāa kwú owu kú uwɔ ú lɛ uwá nɛɛ, a klla lɛ uwá yá kú oyēeyī ɛ̄yīpɛ̄ kóō klla gbo ɔ́ ipú ɛcɛ nyā kpɔ́.

³¹Ɛgahi mɛ́mla ocɛ̄tra kú Óndú ā kóō yɔ̄ piyóó, ka ɔtū kóō he Óndú, mɛ́mla ɔdā dóódu nɛ̄ ó yá ā.

³²Óndú ā gē pīyeyī má ɛcɛ, ɛcɛ gē gbɔɔ́ ō jíliyē. Óndú le abɔ̄ kwu aɛ́fu, aɛ́fu ā gē gbɔɔ́ ō tó ódūdū.

³³N géē yɔ̄ í gwíijē lɛ Óndú ā piyóó ipú odúúdú oyēeyī kú um. N klla í yɔ̄ ī cɛ̄tra Ɔwɔicō kú um piyóó.

³⁴Ká ɛlá ōgbo kú um ā kóō kē he Óndú ɔtū, ohígbū ka ɔtū nɛhɛ́ mɛ́mla éeyē kú um ŋmá ɛgiyí nū.

³⁵Kéē kwú ācobīyíne ā kpó yíífi, ká ācobɔ̄bíipú ā kéē bá gɛ ŋ́. N cɛ̄tra Óndú ā. Aá cɛ̄tra Óndú ā.