Read idoma AÍJĒ KÚ Ɛ̄GBĀ 105 Bible Online

AÍJĒ KÚ Ɛ̄GBĀ 105 - idoma bible

AÍJĒ KÚ Ɛ̄GBĀ 105

¹Aá tá Óndú ahínyá. Aá gbā ɔ̄ ɛ̄gbā tɛ́ɛcɛ, kú aá gbɔ̄ɔkɔ lɛ ɔ́. Cɛ́ɛ́ kú aá ka ɔdā nōó yá ā tɛ́ɛcɛ lɛ aéwɔhá.

²Aá gwííjē lɛ ɔ́, kú aá cɛ̄tra anú, cɛ́ɛ́ kú aá ka úklɔ́ idáagó kú nū tɛ́ɛcɛ.

³Aá bī ɔdā nɛ̄ Óndú nōo tīihɔ yá ā, le ka ɔ́bɔ́ɔ̄cɛ. Odúúdú ācɛ nēe gē gbā ɔ̄ ɛ̄gbā kéē gwéeyē.

⁴Aá ga ɛgiyí Óndú kóō tá aá abɔ̄, ká aá yɔ̄ ī gbā ɔ̄ ɛ̄gbā eko dóódu.

⁵Aá blakwu úklɔ́ idáagó nōó yá ā, ɔdā idáagó mɛ́mla ɛpɔ̄ nɛ̄ Óndú hɛ́ lɛ ācɛ ɔlɛ́ nū ā.

⁶Aá wɛ ayí kú Ábrahām ɔ̄cocɛ̄hɔ̄ kú nū ā mɛ́mla ayí kú Ujékɔ̄pu, ɔ̄cɛ nōó fu ā.

⁷Anú, Óndú ā, wɛ Ɔwɔicō kú alɔ á, anú ī hɛ́pɔ̄ ɛga dóódu ipú ɛcɛ á.

⁸Ó gē yá okónu nōó ce ā mɛ́mla okónu nɛ̄ ó le táajɛ ā ŋmá eko tá eko ga ayááyí úlúúlā.

⁹Ó gē yá ɛka nɛ̄ ó gbo lɛ Ábrahām, ó kē ī lɛ okónu nɛ̄ ó ce lɛ Áyísīki ā tū.

¹⁰ Ó klla lɛ okónu nyā ce lɛ Ísrɛ̄lu mla íne, kóō wɛ ɛka nōo yɔ̄ piyóó lɛ ācɛ Ísrɛ̄lu.

¹¹Ó da ɔ́ kahíníī, “N géē je ajɛ kú Ukénan gā uwɔ, kóō wɛ ukpɛ̄ mɛ́mla ɔdā úgwū kú ayááyí uwɔ piyóó.”

¹²Ācɛ kú Ɔwɔicō ā í kē lɛ ɛwa ŋ́, é wɛ ugbɔga ipú ajɛ ā,

¹³é bā ī yɛ ŋmá éwo éyi ga ɔhá, ŋmá ajɔ̄ɔ̄cɛ́ éyi ga ɔhá,

¹⁴ Amáŋ, Ɔwɔicō yɔ̄ ī gbō uwā, ó kē cɛ̄ lɛ ɔ̄cɛ dúúmā pīya uwá tū ŋ́, ó lɛ abɔ̄ pi aɔ́cɛ́ ā ahɔ̄ kahíníī,

¹⁵“Aá bɔ́tū lɛ abɔ̄ kwu ācɛ ɔlɛ́ um, nɛ̄ n le anɔ̄ tū uwā ɛyí ā ŋ́, ɛ́ɛ́ nɛ̄ aá ī jámá yá ācomɛ́ɛbɛ kú ɔlɛ́ um ɔdōbɔ̄bí dúúmā ŋ́.”

¹⁶Óndú ā le ɔkpɛtā tū klá ajɛ kú uwā, klla kwú odúúdú ɔdōlé kú uwū í kpó.

¹⁷Amáŋ ó lɛ ɔ̄cɛ éyi tɛ̄hɔ̄ nyɔ̄ gbɔbū lɛ uwá, ɔ̄cɛ ɔ́ɔmā wɛ Ujósɛ̄fu nēé je lá ga ajɛ kú Íjīpiti ā.

¹⁸É lɛ agbá kwu ɔ́ ikpó, klla lɛ agbá kú oje kwu ɔ́ ɔkɔ.

¹⁹Jāā gbéeko nɛ̄ ɛlā nɛ̄ ó ka ā le yá jīla, ɛlā nɛ̄ Óndú ā da Ujósɛ̄fu ā le yá jīla klla le mafú kóō wɛ ɔkwɛ̄yi.

²⁰Anɔ́ɔ ɔcɛ́ kú Íjīpiti ā le ɔ́ hɛ́tá, klla kwú ɔ̄ ú tɛ́ɛcɛ ŋmá agbá.

²¹Ó kwú ɔ̄ ú pīya otrɛ̄yí kú aíkonó kú ɔlɛ́ nū, klla kwu ɔ̄ ú kóō leyīkwu odúúdú agbénú kú nū ā.

²²Ó klla le íkwu je lɛ ɔ́ lɛyíkwu odúúdú aígabɔ̄ kú nū ohile ā. Kóō klla nwū ācɛ nēe ī nwū ɔcɛ́ ɛlā ā íjéeyī.

²³Anɔ́ɔ Ujékɔ̄pu ga ajɛ kú Íjīpiti gaá lā ajɛ kú Uhám á.

²⁴Ɔwɔicō cɛ̄ lɛ ācɛ ɔlɛ́ nū le nyīla nɛ̄hi, klla le uwá yá lɔfú nɛ̄hi fíyɛ́ aólɛlā kú uwā.

²⁵Ó le yá kú ācɛ Íjīpiti kéē gbɔɔ́ ō wɔ́tū ācɛ ɔlɛ́ nū, kéē yá ācɛ ɔlɛ́ nū ɔdōbɔ̄bí.

²⁶Anɔ́ɔ ó le Umósīsi ɔ̄cocɛ̄hɔ̄ kú nū mɛ́mla Árɔ̄ni nēé fu ā tɛ̄hɔ̄ ga Íjīpiti á.

²⁷É yá ɔdā ōcābɔ̄ kú nū ɔtāhɛ̄ uwā, ó klla yá ɔdā idáagó alɛwa ipú ajɛ kú Uhám.

²⁸Ó le obū tū wā í klá ɛcɛ, kwú ɛcɛ ú dobū. Amáŋ ācɛ Íjīpiti í lɛyítáajɛ lɛ ɛlā kú nū ŋ́.

²⁹Ó kwú ísu mla éŋkpɔ̄ kú uwá dóódu í pīya oyī. Ó klla yá kú ɛbéenyi kú uwá dóódu kéē le pɛ́ gekwú.

³⁰Ó le abaná tū klá ajɛ kú uwā, jāā kwu ipú inu o gbɔɔlā kú ɔcɛ́ kú uwā.

³¹Ó le ɛlā ka, anɔ́ɔ ɔ́wá kú aíju nōbí mɛ́mla aɛ́lá le tū wā í le mu odúúdú ajɛ kú uwā á.

³²Ó le ɔwɔ o wɛ́ɛcɔ̄ mɛ́mla ɔwɔ olímanya tū klá ajɛ kú uwā ikɔkɔ ɔwɔ ɔlamu.

³³Ɔwɔ owɛ́cɔ̄ nyā lɛ ɔdɛ̄hɔ̄ mɛ́mla odúúdú aɔ́cí kú ajɛ kú uwā kpó bīya.

³⁴Ó lɛ ɛlā ka lɛ efūma mɛ́mla ɛdrɔ́ kú efūma nōo tōō gbaáluka ŋ́ tū klá uwá.

³⁵Efūma nyā kwú ēpū, ɔcí mɛ́mla odúúdú ɔdɛ̄hɔ̄ kú uwā ú kpó lé ŋmá ajɛ.

³⁶Ó lɛ odúúdú aɔ́kplá kú aípɔ́ɔnū dóódu kú ācɛ Íjīpiti kpó ŋmó.

³⁷Anɔ́ɔ ó lɛ ayí kú Ísrɛ̄lu kpó bɛ̄cɛ ŋmá Íjīpiti mɛ́mla aɔ́dīifa kú ugóolu (oje ɔdɔ) mɛ́mla oje nɛ̄hɛ́. Odúúdú ācɛ ɔlɛ́ nū lɔfú iyē kplákplá, ɔdā dúúmā í yá odóódu kú uwā ŋ́.

³⁸Ɔtū he Íjīpiti nɛ̄hi, eko nēé le bɛ̄cɛ ŋmá ipú ajɛ kú uwā ā, ohígbū kēé yúufi uwā nɛ̄hi.

³⁹Ɔwɔicō le ojuja kpúm pi klá uwá ɛyí, ó klla kwú ɔlá ōfíyajɛ nɛ̄hi ú gbɔbū lɛ uwá kóō cɛ̄ lɛ uwá mɛ́ɛbɛ otú.

⁴⁰É dɔɔ̄kā kéē lé ɛbɛ́, ó le ɛwá kpó gé lɛ uwá. Ó klla lɛ ɔdōlé nēé hī ka “umaná” je lɛ uwá ŋmá ɔkpáncō.

⁴¹Ó lɛ ápátɛ́cɔ̄ nwūla, anɔ́ɔ éŋkpɔ̄ le pɛ́ bɛ̄cɛ ŋmá anú, yɔ̄ ī pɛ́ bɛ̄ɛka ɔkpá ā.

⁴²Ohígbū kōó le ɛlá gbo kwu okónu otīihɔ nɛ̄ ó ce lɛ ɔ̄cocɛ̄hɔ̄ kú nū Ébrahām.

⁴³Anɔ́ɔ ó lɛ ācɛ ɔlɛ́ nū nɛ̄ ó fu ā kpó bɛ̄cɛ, anɔ́ɔ é bá yɔ̄ ī gwíijē kú éeyē.

⁴⁴Ó kwú ajɛ kú aéwɔhá ā ú lɛ uwá, anɔ́ɔ é mīyɛ ɛhɔ̄ nɛ̄ ācɛ éwɔhá móōwē tū ɔ̄ ā á.

⁴⁵Cɛ́ɛ́ kú ācɛ ɔlɛ́ nū kéē lɛyítáajɛ lɛ aíne kú nū. Aá cɛ̄tra Óndú ā!