Read idoma AÍJĒ KÚ Ɛ̄GBĀ 106 Bible Online

AÍJĒ KÚ Ɛ̄GBĀ 106 - idoma bible

AÍJĒ KÚ Ɛ̄GBĀ 106

¹Aá cɛ̄tra Óndú. Aá tá Óndú ahínyá, ohígbū ka Óndú ā lɔhi, ihɔtū nɛ̄ ó lɛ ācɛ ā yɔ̄ piyóó.

²Ɔ̄nyɛ lɔfú ka odúúdú úklɔ́ idáagó kú Óndú ā tɛ́ɛcɛ glá ā? Ɔ̄nyɛ lɔfú cɛ̄tra anú kwɛyí glá ā?

³Ɔhā yɔ̄ lɛ ācɛ nēe gē yá ucē ɔ̄kwɛ̄yi, klla í yá uce okpaakpa eko dóódu ā.

⁴Óndú, eko nāa géē ményinyi ācɛ ɔlɛ́ uwɔ ā, blakwu um dúú. Eko nāa géē nya uwá tá ā, tá um abɔ̄ dúú.

⁵Cɛ́ɛ́ ká n̄ géē má o jɛ̄ gɔbū kú ācɛ kú uwɔ nāa fu ā, cɛ́ɛ́ ká ɔtū kóō he ami mɛ́mla uwá tɔ̄há. Cɛ́ɛ́ ká n̄ gwéeyē mla ācɛ ɔlɛ́ uwɔ nāa je gicō ā dúú.

⁶Alɔ le íne bīya ɛ́gɛ́nɛ̄ aádáádā alɔ yá ā ɛɛ́. Alɔ le ɔ́bíipú mɛ́mla ucē obɔ̄bí yá ɛɛ́.

⁷Eko nɛ̄ aádáádā alɔ bá ajɛ kú Íjīpiti ā, é lɛ ɛlá wu úklɔ́ idáagó nāa yá lɛ alɔ ā ŋ́. É kwú ɛlá í gwū hɛ̄ ihɔtū nɛ́ Óndú mafú lɛ uwá igbo alɛwa ā tá. É klla le ikpɛ̄yí olɔfú yá tú anú nōo lɔfú fíyɛ́ dúú ā okónu ísu igwɛ̄bɛ́ ā.

⁸Nááná ā, ó le uwá nyatá ohígbū iyē kú nū, cɛ́ɛ́ kóō lɛ ɔfú nɛ̄hi kú nū mafú.

⁹ Ó le ɔ́da je lɛ ísu igwɛ̄bɛ́ ā, ó kwú ŋmó ŋmá ajɛ, anɔ́ɔ ó bī uwā bēhé, ɛyí ajɛ íkpākplā bɛ̄ɛka ipú ígbíli ā.

¹⁰Ó le uwá nyatá ŋmá abɔ̄ kú ācɛ nēe gē wɔ́tū uwā a, o klla le uwá hɛ́tá ŋmá abɔ̄ ɔfú kú aólɛlā kú uwā.

¹¹Amáŋ ísu ā kwú cēenyi le aólɛlā kú uwā kpó, nɛ̄ odúúmā kú aólɛlā kú uwā ā í hile ŋ́.

¹² Anɔ́ɔ ācɛ ɔlɛ́ nū cɛ̄ɛ̄lā kú nū le ijē gwó cɛ̄tra anú á.

¹³Amáŋ, é kwú mlanyī ɔdā nɛ̄ ó yá nyā fíyaa, anɔ́ɔ é klla gbēyī kéē má ɔdā nɛ̄ ó tíne kéē yá ā ŋ́ má.

¹⁴Amáŋ, é yá unwū ɔdōlé nɛ̄hi ipú ígbíli, anɔ́ɔ ó cɛ̄ lɛ uwá le Ɔwɔicō jámá ipú ígbíli á.

¹⁵Ó lɛ ɔdā nēé tíne ā je lɛ uwá, Amáŋ ó lɛ ōcē tū klá uwá.

¹⁶Eko nɛ̄ ācɛ ōhī gbɔɔ́ ō má ímálānyī kú Umósīsi mɛ́mla Árɔ̄ni nōo wɛ ācocɛ̄hɔ̄ kú Óndú gē cɛ̄ ɔ̄ ɛhɔ̄ ā,

¹⁷ajɛ le okónu nwūla, kwu Udátan ú mulɛ, kwú okónu ú klá tū ācɛ ɔlɛ́ Abiram.

¹⁸Ɔlá gāajɛ ipú ācɛ nēe yɛce uwá ā gaá kwú ācobɔ̄bíipú a ú kpó yi.

¹⁹ É le ojibó kú ɛna kú ugóolu (oje ɔdɔ) ma ikpó ɛfu kú Uhɔ́rɛ̄bu, anɔ́ɔ é bá ī gbā ɔ̄ ɛ̄gbā á.

²⁰É kwú ojīlīmā, mɛ́mla ɛgahi kú Ɔwɔicō ā ú, lɛ ojibó kú ɛna nōo gē lé ácí ā.

²¹É kwú mlanyī Óndú, nōo nya uwá tá ā. Anú nōo yá ɔdā nɛ̄hi lɛ uwá ajɛ kú Íjīpiti,

²²klla yúklɔ́ idáagó ipú ajɛ kú Uhám ā. Ó klla yá ɔdā nɛ̄hi ipú ísu igwɛ̄bɛ́ ā.

²³Ó wɛ Umósīsi, ɔ̄cocɛ̄hɔ̄ kú nū nōo háyi iyɔ̄bū nū yɔ̄ ī gbɔ̄ɔkɔ kɔ́ɔ̄ lɛ ɔtū kú nū pīyabɔ̄ ā ŋ́ nɛɛ, ó géē yɛ í lɛ uwá kpó yíífi eko nɛ̄ ó ka ka anúɔ géē kpó uwā yíífi ŋmá ajɛ ā.

²⁴Anɔ́ɔ é tá ajɛ olɔhi ā, ohígbū keé gē kpɔ́tūce okónu nɛ̄ Óndú ā ce lɛ uwá ā gɛ ŋ́.

²⁵É bá ī ka iŋini ipú áklɔ̄kpɛ kú uwā, anɔ́ɔ é lɛyítáajɛ lɛ ɔkɔ kú Óndú ā gɛ ŋ́ má.

²⁶Anɔ́ɔ Óndú ā je abɔ̄ kú nū gicō le ɔkpá ce iyī nū ka, anúɔ géē cɛ̄ lɛ uwá pɛ́kwú ipú ígbíli.

²⁷ Ó klla ka anúɔ í kpó ayááyí uwā pahīla tū ipú aéwɔhá, cɛ́ɛ́ kéē kwú pɛ́kwú ajɛ kú aéwɔhá.

²⁸ É kwú iyī uwā ú lɛ ɔwɔ nɛ̄ aéwɔhá ī gbā, nēé hī ka Ubáalu ā. É bá ī gbā ɔ̄ ɛ̄gbā ipú ajɛ kú Upéyɔ. É klla bá ī lé ɔdōlé nēé le gwɛ́ɛya lɛ aɔ́wɔ nēé yéeyī ŋ́ mā.

²⁹É cɛ̄ lɛ Óndú le cɔ̄nū ohígbū ucē kú uwā nyā, anɔ́ɔ ó lɛ ōcē obɔ̄bí tū klá uwá.

³⁰Amáŋ Ufínɛ̄hasi cāŋjɛ le italā yá ācɛ nēe lɛ́pɔ̄bí ā, anɔ́ɔ Óndú ā cɛ̄ lɛ ōcē obɔ̄bí nōo yɔ̄ ī kpó uwā ŋmó nyā mɛ á.

³¹Ācɛ ī blakwu ɔdā olɔhi nɛ̄ Ufínéhasi yá nyā, é kéē ī blakwu ɔ̄ ŋmá eko tá eko, ŋmá aɛ́gɔ́ éyi ga aɛ́gɔ́ ɔhá.

³² É yá Óndú cɔ̄nū ɛgiyí njɔlɔ kú Umɛ́rība, Ācɛ ā le Óndú yá cɔ̄nū abɔ́ɔ, anɔ́ɔ unwalu gaá ce Umósīsi ikpɛ̄yí ohígbū uwā á.

³³Ohígbū keé lɛ Umósīsi ɔtū bīya, anɔ́ɔ ó le ɛlā ka ipú ánya á.

³⁴É kpó ācɛ éwɔhá ā yíífi ɛ́gɛ́nɛ̄ Óndú ā je ɔ́da lɛ uwá ā ŋ́.

³⁵Amáŋ é gbɔɔ́ ō lɛ anyā ŋmá ɛgiyí aéwɔhá ā, kla gbɔɔ́ ō yá ucē kú ɛcí ō pā kú ācɛ ā.

³⁶É gbɔɔ́ ō gbā aójibó kú aɛ́cí kú uwā ɛ̄gbā. Ucē nyā kwú pīya ukpa lɛ uwá.

³⁷ É gbɔɔ́ ō kpó ayí uwā nɔ̄nyīlɔ, mɛ́mla ayí uwā nɔ̄nyā gwɛ́ɛya lɛ aɔ́wɔ kú Ukénan.

³⁸ É le ayípɛ̄ nɛ̄ŋcɛ́ ɔ́ɔmā kpó ŋmó icííci. Ayí uwā nēé je kpó ŋmó je gwɛ́ɛya lɛ aɔ́wɔ kú Ukénan á. Ohígbū ɔ́ɔmā oyī kú ayípɛ̄ ā kwú ajɛ ā ú tēelihɔ.

³⁹É kwú iyī uwā iyē ú tēelihɔ, o ŋmá lɛ ucē kú uwā. É klla kwú igbīhi ú cē kwu Ɔwɔicō ipú ɔdā nēé ī yá ā.

⁴⁰Anɔ́ɔ Óndú ā kwú cɔ̄nū mla ācɛ ɔlɛ́ nū, anɔ́ɔ ó klla tá ɛlā kú uwā á.

⁴¹Ó ma uwá tá ipú abɔ̄ kú aéwɔhá, anɔ́ɔ ācɛ nēe gē wɔ̄tū uwā ā, gbɔɔ́ ō lɛ íkwu lɛyíkwu uwá á.

⁴²Aólɛlā kú uwā yɔ̄ ī pīya uwá tū, anɔ́ɔ é kē bá ipú abɔ̄ kú aólɛlā kú uwā á.

⁴³Igbo alɛwa, ó le uwá hɛ́tá. Amáŋ īkpɛ́yí olɔfú he uwá ɔtū ō yá tá Óndú á, cɛ́ɛ́ ó kē ī cɛ̄ lɛ uwá je kpó yíífi.

⁴⁴Amáŋ, ó lɛ eyī yi ōwē mɛ́mla ákanya mɛ́mla ɔnɔ kú uwā, eko nɛ̄ ó lɛ ikwū nēé je ā pó ā.

⁴⁵Ó le blakwu okónu nɛ̄ ó ce ā ohígbū uwā, abɔ̄ é kē he ɔ́ ɔtū nɛ̄ɛ̄nɛ̄hi, anɔ́ɔ ó le ɔtū kú nū pīyabɔ̄ á.

⁴⁶Ó le yá kú ācɛ dóódu nēe kwú uwā aɔ́fiyɛ ā, kéē ményinyi uwā.

⁴⁷ Óndú, Ɔwɔicō kú alɔ, lɛ alɔ nyatá, cɛ́ɛ́ ká ā lɛ alɔ kwúcē wā ŋmá ipú aéwɔhá ā, cɛ́ɛ́ ká ālɔ̄ tá awɔ nɛ̄ iyē kú uwɔ tīihɔ ā ahínyá, ká alɔ bá ī gwíije ī cɛ̄tra awɔ.

⁴⁸Aá cɛ̄tra Óndú, Ɔwɔicō kú Ísrɛ̄lu ŋmá abālɔbányā ga eko nɛ̄ ó gē mɛ gbógbóō ŋ́ mā. Odúúdú ācɛ kéē kahíníī, “Aamí.” Aá cɛ̄tra Óndú.