Read idoma AÍJĒ KÚ Ɛ̄GBĀ 107 Bible Online

AÍJĒ KÚ Ɛ̄GBĀ 107 - idoma bible

AÍJĒ KÚ Ɛ̄GBĀ 107

¹Aá tá Óndú ā, ahínyá, ohígbū ka ó lɔhi. Ihɔtū nɛ̄ ó lɛ lɛ ācɛ ā yɔ̄ piyóó.

²Ɛjɛ̄ɛ̄jī aá nɛ̄ Óndú ā nyatá ŋmá abɔ̄ kú aólɛlā kú aá ā, kéē yɔ̄ ī cɛ̄tra anú igbo alɛwa.

³Ó klla le aá kpó kwúcē wā ɔlɛ́ ŋmá ajɛ kú aéwɔhá, ŋmá ɛnɔ̄ɔ̄cī, ɛnɔ̄ɔ̄nɛ̄, ɛhícō, mɛ́mla ɛháajɛ ɛɛ́.

⁴Ācɛ ōhī bá ī ga amu ga anú ipú ígbíli, í jé ɔwɛ nēé í yɛ ga igelī nɛ̄hi dúúmā nēé géē nyɔ̄ í lā ŋ́.

⁵Ɛmiyɛ mla ijēēnyi ŋmó uwā, é leyī ce ɔdā dúúmā gɛ ŋ́.

⁶Anɔ́ɔ é le ikwū je klá Óndú ipú unwalu kú uwā, anɔ́ɔ ó le uwá hɛ́tá ŋmá ipú ákanya kú uwā á.

⁷Ó le uwá bī jé ɔwɛ okpaakpa jāā ga ipú igelī nɛ̄hi nɛ̄ ācɛ lā anú ā.

⁸Kéē tá Óndú, ahínyá ohígbū ihɔtū nɛ̄hi nɛ̄ ó lɛ lɛ alɛɛcɛ ā. Mɛ́mla ohígbū ɔdā idáagó nɛ̄ ó yá lɛ uwá ā.

⁹Ó gē je ɔdōlé lɛ ɔ̄cɛ nɛ̄ ɛmiyɛ gē ŋmó ɔ̄ ā, ó klla gē je ɔdōgwá lɛ ɔ̄cɛ nɛ̄ ijēēnyi gē ŋmó ɔ̄ ā.

¹⁰Ācɛ ōhī lā ipú ɔtūnōbí mɛ́mla ipú obū kpúm, é wɛ alagbá nēé le agbá kwu uwá.

¹¹Ohígbū keé tá ō lɛyítáajɛ lɛ ɛlā kú Ɔwɔicō, nōo lɔfú fíyɛ́ dúú ā, é klla lɛ ɛlá wu ɛlā nɛ̄ ó gē nwū uwā ā ŋ́.

¹²Úklɔ́ olɔfú kú ōwē cɛ̄ lɛ agbafú le gbo uwá, é klla má ɔ̄cɛ dúúmā tá uwā abɔ̄ ŋ́.

¹³Anɔ́ɔ é le ikwū je klá Óndú ipú unwalu kú uwā, anɔ́ɔ Óndú ā lɛ uwá hɛ́tá ŋmá ipú ákanya kú uwā á.

¹⁴Ó le uwá kpó bɛ̄cɛ ŋmá ipú ɔtūnōbí mla obū, anɔ́ɔ ó le agbá nōo kwu uwá ā kpó hɛ́ á.

¹⁵É cíkā ō tá Ɔwɔicō ahínyá ohígbū ihɔtū nɛ̄hi nōó lɛ lɛ alɛɛcɛ eko dóódu ā, mɛ́mla ohígbū ɔdā idáagó nōó yá lɛ uwá ā.

¹⁶Ohígbū ka Óndú kwú odūngwɔ̄wɛ kú oje udɔ ā ú kpó ca, ó klla le igbóje nēé le cíla odūngwɔ̄wɛ ā kpó hɛ́ bónū.

¹⁷Ācɛ ōhī wɛ aólɛlā nēe bá gē móōwē, ohígbū íne nēé bīya ā mɛ́mla ohígbū ɔdōbɔ̄bí nēé yá ā.

¹⁸Ɛdɔ kú ɔdōlé dúúmā í he uwá ɔtū ŋ́, ó hile lígíí kéē le pɛ́kwú.

¹⁹Anɔ́ɔ é lɛ ikwū je klá Óndú ā ipú unwalu kú uwá, anɔ́ɔ ó lɛ uwá hɛ́tá ŋmá ipú unwalu mla ákanya kú uwá á.

²⁰Ó ŋmá ɔfú kú ɛlā nɛ̄ ó ka ā, ó le uwá hɛ́tá ŋmá ōcē. Ó le uwá nyatá ŋmá ipú ikwū mɛ́mla ífi.

²¹É cíkā ō tá Ɔwɔicō ahínyá ohígbū ihɔtū nɛ̄hi nōó lɛ lɛ alɛɛcɛ mɛ́mla aɔ́dā idáagó nōó yá lɛ uwá ā.

²²É cíkā ō bī ɛya ōgwó gé lɛ Óndú cɛ́ɛ́ kéē tá ɔ́ ahínyá. Kéē gwíijē kú éeyē kéē ka odúúdú ɔdā nōó yá ā tɛ́ɛcɛ.

²³Ācɛ ōhī bá yɔ̄ ī yɛ eyī enyi ipú úgbéenyi, bá ī tá ɔhí kéē má ɔdōlé lé.

²⁴É kē le ɔdā nɛ̄ Óndú yá glá ā má ɛɛ́, mɛ́mla owu nɛ̄hi nōó cɛ̄ lɛ ɔ́ tá ipú ísu ā.

²⁵Óndú ā je ɔ́da lɛ owu nɛ̄hi ā kóō tá cɛ́ɛ́, kú éŋkpɔ̄ ā kóō tá úgbagwú nɛ̄hi á.

²⁶Owu le úgbéenyi tá gicō licō licō, ó klla le ɔ́ tá wāajɛ ga ɛga olipú kú ísu kwuu. Ɔtū kú ācɛ o yúklɔ́ kú úgbényi kwú gbenyi ipú ufi.

²⁷É yɛ ga ɔwɛ ga ácí, bá ī túgagá bɛ̄ɛka ɔ̄cɛ nɛ̄ ejé lɛ ɔ́ kwú ā. Nááná nēé jé ō pɛ́ úgbéenyi nɛ̄hi ā. Ɔdā nɛ̄ ācoyúklɔ́ úgbéenyi ā jé ā í tá uwā abɔ̄ glá gɛ ŋ́.

²⁸É le ikwū je klá Óndú, ipú unwalu kú uwá, anɔ́ɔ ó le uwá hɛ́tá ŋmá ipú ákanya kú uwā á.

²⁹Óndú ā le owu nōo yɔ̄ ī tá nɛ̄hi ā trá, kóō yɔ̄ cíí. Anɔ́ɔ úgbagwú kú ísu ā má yɔ̄ cíí á.

³⁰É gbɔɔ́ ō gwéeyē nɛ̄hi, ohígbū ka ísu ā má yɔ̄ cíí. Anɔ́ɔ Óndú ā lɛ uwá kpó wɛ̄ɛcɛ, okónu ɔkpá ɛga nēé tíne ō wɛ̄ɛcɛ ā á.

³¹É cíkā ō tá Óndú ahínyá ohígbū ihɔtū nɛ̄ ó lɛ lɛ alɛɛcɛ, mɛ́mla ohígbū úklɔ́ idáagó nɛ̄ ó yá lɛ uwá ā.

³²É cíkā ō cɛ̄tra ɛ́gɛ́nɛ̄ Óndú ā jājīlīmā lɛ ipú ójīla kú ācɛ ɔlɛ́ nū ā. Kéē cɛ̄tra anú ipéeyī ójila kú anyākwɔ́cɛ.

³³Óndú ā gē je ísu ŋmó ŋmáajɛ péee, klla ī je njɔlɔ ā ŋmó ŋmáajɛ, cɛ́ɛ́ ajɛ ā kwú pīya ígbíli icííci.

³⁴Ó gē je ajɛ nōo ī yá ɔdɛ̄hɔ̄ lɔɔlɔhi ā pīya ajɛ, nɛ̄ ó yá ɔdɛ̄hɔ̄ glá ŋ́, ohígbū ɔ́bíipú mɛ́mla ɔdōbɔ̄bī nɛ̄ ācɛ nēe lā abɔ́ɔ ā gē yá ā.

³⁵Ó gē je ígbíli pīya ɔkpá nɛ̄hi, ó klla í je ajɛ íkpākplā pīya njɔlɔ.

³⁶Ó kwu abɔ́ɔ ā ú pīya ɛga nɛ̄ ācɛ nɛ̄ ɛmiyɛ gē ŋmó uwā gē lā, é klla le igelī nɛ̄hi gwó abɔ́ɔ nēé lā anú.

³⁷Abɔ́ɔ ā, é le ɔdɛ̄hɔ̄ nyi, klla le ɔcí Ufáyin tū. Anɔ́ɔ ɔdɛ̄hɔ̄ kú uwā ā kē le yá nɛ̄hi.

³⁸Óŋmá lɛ ɔhā nɛ̄ ó hɛ́ ce ācɛ ɔlɛ́ nū, é le nyīla nɛ̄hi. Ó cɛ̄ lɛ aɛ́na kú uwā mɛ tāajɛ ŋ́.

³⁹Eko dúúmā nēé le ācɛ ɔlɛ́ Ɔwɔicō yálé le uwēyī je lɛ uwá ŋmá lɛ abɔ̄ ō le da uwá ɛyí tāajɛ,

⁴⁰ó gē je uwēyī lɛ ācɛ nēe gē yá uwā ōwē klla gē yá kéē móōwē ipú ígbíli icííci ā.

⁴¹Amáŋ ó géē nya aógbɛhá tá ŋmá ipú ákanya kú uwā. Ó klla í nyīla aípɔ́ɔnū kú uwā bɛ̄ɛka aálá ā.

⁴²Ācɛ okpaakpa ā má ɔ̄, ɔtū kē he uwá, amáŋ é kwú odúúdú ācobɔ̄bíipú ā okónu ú klá.

⁴³Ɔ̄cɛ dúúmā nōo jéeyī, kóō gbɛlá tū ɛlā nyā, cɛ́ɛ́ kéē lɛ eyī yɛ ihɔtū nɛ̄ Óndú ī mafú eko dóódu ā.