Read idoma AÍJĒ KÚ Ɛ̄GBĀ 108 Bible Online

AÍJĒ KÚ Ɛ̄GBĀ 108 - idoma bible

AÍJĒ KÚ Ɛ̄GBĀ 108

¹Ɔwɔicō, n lɛ ɔtūce uwɔ, n géē gwíijē klla í cɛ̄tra awɔ, mla odúúdú odo kú um.

²Le hɛ́ eyī ɛ̄ngwū mɛ́mla úmōlō kú um. N kē í héyī gbɔbū kú eyī kóō nyā.

³N géē tá uwɔ ahínyá Óndú, ipéyī aéwo ā. N géē cɛ̄tra uwɔ ipéyī odúúdú ācɛ ā.

⁴Ohígbū ka ihɔtū nɛ̄ a ī mafú gā um eko dóódu ā nwuné bɛ̄ɛka ɔdā nɛ̄ ó yɛ jāā gaá kwu ojuja ā.

⁵Óndú, lɛ ɛ́gɛ́nɛ̄ a jājīlīmā lɛ ā mafú ɔkpáncō. Cɛ́ɛ́, a klla lɛ ɛgahi kú uwɔ mafú odúúdú ɛcɛ.

⁶Bī ɔfú kú uwɔ cɛ́ɛ́ ká ā lɛ alɔ nyatá. Lɛ ɔkɔ nɛ̄ alɔ ī gbā ā pó, cɛ́ɛ́ ká ācɛ nāa yíihɔtū tá uwā ā kéē le hɛ́tá.

⁷Ɔwɔicō le ɛlā ka ŋmá ipú Agblīihɔ-nɛ̄hi kú nū kahíníī, “Abɔ̄ n le yálé ā, n géē je Usɛ́kɛm kɔ̄ klla í je ɔpɛ́ kú Usɔ́kɔ̄tu kɔ̄ tū ɔ̄ lɛ ācɛ ɔlɛ́ um.

⁸Ugílɛ̄di wɛ ákú um, Umanásɛ wɛ ákú um. Ɛfrēm lɛbɛ̄ɛka ɔkpú ō kwɛyí kpɛ́fú kú um ā. Ujúda lɛbɛ̄ɛka ukwutɛ kú ɔcɛ́ kú um á.

⁹Amáŋ n géē je Umówābu pīya bɛ̄ɛka ocíbú ō bī le na abɔ̄ kú um. N klla ī tá áblákpá kú um ce Ɛ́dɔm cɛ́ɛ́ kóō jé ka ami ɔ́ɔ wɛ Óndú nū á. N géē dɛ̄ɛgba ōgwú tū ācɛ kú Ufilístīya, kóō mafú ka n lɛ uwá yálé ɛɛ́.

¹⁰Ɔwɔicō, ɔ̄nyɛ géē bī um wā ɔlɛ́ nēé ce igá tū ɔ̄ ā? Ɔ̄nyɛ géē bī um tá ga Ɛ́dɔm ā?

¹¹Ɔwɔicō, a tá alɔ nɛɛ? Á gáā nyɔ̄ ɔgbɛ́fú mla aícɔ́ɔja kú alɔ gɛ ŋ́ nɛɛ?

¹²Tá alɔ abɔ̄ lɛyíkwu aólɛlā kú alɔ ohígbū ka odúúdú otábɔ̄ kú ɔlɛɛcɛ wɛ áncā nɛ.

¹³Abɔ̄ Ɔwɔicō yɔ̄ mla alɔ ā, alɔ géē yálé piíí. Ó géē cɛ̄ lɛ alɔ yá aólɛlā kú alɔ lé.