Read idoma AÍJĒ KÚ Ɛ̄GBĀ 109 Bible Online

AÍJĒ KÚ Ɛ̄GBĀ 109 - idoma bible

AÍJĒ KÚ Ɛ̄GBĀ 109

¹N cɛ̄tra uwɔ Ɔwɔicō, ā híī yɔ̄ cíí gɛ ŋ́, amáŋ lɛ odée yá mɛ́ɛ.

²Ohígbū ka ācobɔ̄bíipú mɛ́mla ācokɛ̄mgbɛ̄ ā cāŋjɛ lɛyīkwu um ɛɛ́, é klla bá ī kɛ̄mgbɛ̄ bá um.

³É bá ī kɛlā obɔ̄bí lɛyíkwu um áncā, é klla bá ī nuunu tá um áncā.

⁴Nááná nɛ̄ n yíihɔtū tú uwā, nɛ̄ n klla ī gbɔ̄ɔkɔ ohígbū uwā ā. Nááná, é lɛyí bū kwu um kpɔ́.

⁵N gē yá olɔhi lɛ uwá, amáŋ obɔ̄bí nēé bī le cíla um ulé á. N gē yíihɔtū tá uwā, amáŋ é ī wɔ́tū um.

⁶Óndú, lɛ ɔcɛ́ ō hɛ́pɔ̄ újí fu, kóō hɛ́pɔ̄ kú olɛlā kú um, cɛ́ɛ́ ká olɛlā kú anú abɔ̄yīnū éyi kóō lɛ ɛlā kpó ce ɔ́.

⁷Eko dúúmā nēé ī hɛ́pɔ̄ kú nū, kóō lɛ ɛpɔ̄bí lé. Kwú ɔkɔ nɛ̄ ó géē gbā ú pīya ínoōbīya ce ɔ́ ɛyí.

⁸ Lɛ ɛ̄cī kú nū yá kpií ipú ɛcɛ nya, cɛ́ɛ́ ka ɔ̄cɛ ɔhá kóō mīyɛ ɔkwu nū ɛga úklɔ́ kú nū.

⁹Ayí nū kéē kwú pīya ayókwū ká ɔnyā nū kóō kwú pīya ɔnyōkwū.

¹⁰Ayí nū kéē kwú pīya ayí ōbɔdā bɔ́lɔ́lɛ́. Cɛ́ɛ́ kéē lɛ uwá nū bɛ̄cɛ ŋmá ipú alácɛ̄ kú ádā uwā nēé lā anú ā.

¹¹Ɔ̄cɛ nōo lɛ odée kplá anú ā, kóō mīyɛ odúúdú agbénú kú nū, cɛ́ɛ́ ka aúgbɔga kéē lɛ ɔdā nōó móōwē nū ā kpó wu.

¹²Ɔ̄cɛ dúúmā kóō híī gbonɛnɛ lɛ anú abɔ̄yī nū ŋ́, ɛ́ɛ́ nɛ̄ ɔ̄cɛ dúúmā gē ményinyi kú ayókwū kú ɔlɛ́ nū ā ŋ́.

¹³Ká odúúdú ayááyí nū kéē le pɛ́ gekwú ŋmá ipú ɛcɛ, ká iyē kú nū kóō gebí tāajɛ dúúdú ipú aɛ́gɔ́ ɔ́mpa nēe gbocē ɔ́ ā.

¹⁴Ká Óndú kóō je ínoōbīya kú aádáádā nū mlanyī ŋ́ Ɛ́ɛ́ nōó ī je ínoōbīya kú ɛ́nɛ́nū yɛ́ ɛhi ŋ́.

¹⁵Ká Óndú ā kóō blakwu ínoōbīya kú uwā eko dóódu, ámāŋ kéē kwú uwā abɔ̄yī uwā ú mlanyī dúúdú.

¹⁶Ohígbū ka anú, abɔ̄yī nū ā í blakwu kóō gbonɛnɛ lɛ ācɛ ŋ́, amáŋ ó gē yá aógbɛhá, ayókwū, mɛ́mla ācɛ nēe yɔ̄ ipú ɔtūnōbí ŋmó. Ó klla ī kpó uwā ŋmó.

¹⁷Abɔ̄ okónu ō tá lɛ ācɛ ɔhá he ɔ́ ɔtū ā, kéē lɛ okónu tá lɛ ɔ́ dúú. Ó tíne ō hɔ́ɔhā cɛ ācɛ ɔhá ŋ́, ohígbū ɔ́ɔmā, ɔ̄cɛ dóódu kóō híī hɔ́hā ce ɔ́ ŋ́ dúú.

¹⁸Ókónu ō tá tɔ́ɔtɛ́ lɛ ɔ́ bɛ̄ɛka ɛ́gɛ́nɛ̄ úwé gē tɔ́ɔtɛ́ lɛ ɔ̄cɛ ō je wiyē ā, okónu nɛ̄ ó tá pií ā kóō kwú pīya klá anú bɛ̄ɛka éŋkpɔ̄ ā. Kóō le pɛ́ mu ipú ikpokwú kú nū bɛ̄ɛka anɔ̄ ā.

¹⁹Okónu ō tá ɔ́ɔmā, kóō klá anú iyē bɛ̄ɛka átu nɛ̄ ó le klá iyē ā, mla ɔkpá nɛ̄ ó le kwú ɛ́nyɔ́ ā.

²⁰Ɛ̄nyā kóō kwú pīya ulé nɛ̄ Óndú ā gē cílá ācɛ nēe gē kpó ɛlā ce um ā, mɛ́mla ācɛ nēe gē ka obɔ̄bí kú um ā.

²¹Amáŋ, awɔ, Óndú wɛ Ɔwɔicō kú um á, cɛ̄pɔ̄ um ohígbū ɛ́gɛ́nɛ̄ a ka lɛ ā. Lɛ um hɛ́tá, ohígbū ihɔtū nāa ī mafú eko dóódu ā mla olɔhi kú uwɔ ā.

²²Ohígbū ka n gbɛhá, ɛgbá ce um nɛ̄hi, ɔtū klla le bīya gā um nɛ̄hi.

²³N yɔ̄ ī bítāajɛ bɛ̄ɛka ojiji kú ɔ̄nɔ̄ɔ̄nɛ̄ ā. N lɛbɛ̄ɛka ɛfūma nēé gwō bónū ŋmá ɔdɛ̄hɔ̄ ā.

²⁴Okwúukwu kú um le gbogwú ohígbū ɔkɔ ō gbā mla okónu nɛ̄ n gē gwū ā ɛɛ́. N le nyinyi gányá gaá hile ikpokwú ōfōōfūnū.

²⁵Eko nɛ̄ ācɛ le um má, é ī yɛhɛ tū um, klla ī mī ɛyí jigijigi.

²⁶Óndú, Ɔwɔicō kú um, tá um abɔ̄, lɛ um nyatá ohígbū ka a gē yíihɔtū um eko dóódu.

²⁷Cɛ́ɛ́ kú aólɛlā kú um kéē le jé, ka awɔ ɔ́ɔ nya um tá á.

²⁸É lɔfú tá okónu gā um glá, amáŋ a gē hɔ́hā ce um, Óndú. Óndú, lɛ ācɛ nēe gē yá um ŋmó ā yálé, cɛ́ɛ́ kú ɔtū kóō le he ami, nōo wɛ ɔ̄cocɛ̄hɔ̄ kú uwɔ ā.

²⁹Unóji kóō lɛ aólɛlā kú um kwú bɛ̄ɛka ɛ́gɛ́nɛ̄ īlī gē klá ɔ̄cɛ iyē ā. Cɛ́ɛ́ kéē le uwēyī kú uwā wiyē bɛ̄ɛka úwé ā.

³⁰N géē bī okónu kú um tá Óndú ā ahínyá nɛ̄hi, n klla í cɛ̄tra anú ipéyī ācɛ kú nū.

³¹Ohígbū ka Óndú ā gē cɛ̄pɔ̄ kú aógbɛhá. Ó klla ī nya uwá tá ŋmá abɔ̄ kú ācɛ nēe lɛ ɛpɔ̄bí ŋmó uwā gáā kpó uwā ŋmó ā.