Read idoma AÍJĒ KÚ Ɛ̄GBĀ 112 Bible Online

AÍJĒ KÚ Ɛ̄GBĀ 112 - idoma bible

AÍJĒ KÚ Ɛ̄GBĀ 112

¹Aá cɛ̄tra Óndú. É gē hɔ́hā ce ɔ̄cɛ dúúmā nōo gē gbā Óndú ā ɛ̄gbā nōo klla gē lɛyítáajɛ lɛ aɔ́da nōó je ā.

²Ayí kú ɔ̄cɛ ɛ́gɔ́ɔ́mā lɔfú ipú ajɛ ā, é klla kē í hɔ́hā ce ayááyí kú ācɛ olɔhi mɛ́mla ācɛ okpaakpa ā piyóó.

³Ipíinu ɔlɛ́ uwā géē lɛ agbénú, klla í lɛ ije. Ó klla í yɔ̄ ī yá lɔhi klla í yɔ̄ ī lɛ agbénú tōōtɔ̄ɔ piyóó.

⁴Ó lɛbɛ̄ɛka ɔlá nōo gē fíyaajɛ ipú obū lɛ ācɛ olɔhi ā. Ó ī ményinyi ɔ̄cɛ, ó gbonɛnɛ, ó klla ī hɛ́pɔ̄ okpaakpa.

⁵Ɔ̄cɛ dúúmā nōo gē nwūla abɔ̄ lɛ ācɛ gē lɛ odée kplá uwá, nɛ̄ ó ī yúklɔ́ ije kú nū ɔwɛ okpaakpa ā, ákú nū kwú lɔhi ɛɛ́.

⁶Ɔ̄cɛ nōo ī lɛyítáajɛ lɛ íne kú Ɔwɔicō ā, ɔdā dúúmā í gáā jíla ɔ́ iyē gbóógbóō ŋ́. É géē blakwu ɔ́ eko dóódu.

⁷Ufi kú ɔ̄kā obɔ̄bí nɛ̄ ācɛ ī pó ā í gáā yá ɔ̄ ŋ́, ohígbū ka ɔtū kú nū kē yɔ̄ ɛga ékpónú. Ó klla lɛ ɔtūce Óndú ā.

⁸Ó le ɔtū kú nū yékpónú. Ó gáā yúufi ŋ́, Ó géē yéeyī kéē má eko nɛ̄ ó í yá aólɛlā kú nū lé.

⁹ Ó ī jɛ́lā lɛ aógbɛhá nɛ̄hi. Ogbonɛnɛ kú nū í gē mɛ ŋ́. Ó géē lɔfú nɛ̄hi klla í lɛ ojīlīmā.

¹⁰Ācobɔ̄bíipú ā géē má ɛ̄nyā, é géē cɔ̄nū, í hīlayīnu, ɔtū í wú uwā, cɛ́ɛ́ é klla gekwú. Ɔdā nɛ̄ ācobɔ̄bíipú ā gē leyīce í gē yá gbóógbóō ŋ́.