Read idoma AÍJĒ KÚ Ɛ̄GBĀ 115 Bible Online

AÍJĒ KÚ Ɛ̄GBĀ 115 - idoma bible

AÍJĒ KÚ Ɛ̄GBĀ 115

¹Óndú, alɔ cíkā ō cɛ̄tra uwɔ klla wóofu uwɔ, ohígbū kaa gē yíihɔtū tá alɔ eko dóódu, ɔ̄cɛ lɛ ɔtūce uwɔ glá.

²Ɔdíyá nɛ̄ aéwɔhá bá gē da alɔ ɔ̄kā kahíníī, “Iní nɛ̄ Ɔwɔicō kú aá yɔ̄ āa?”

³Ɔwɔicō kú alɔ yɔ̄ ɔkpáncō, yɔ̄ ī yá ɔdā dúúmā nōo he ɔ́ ɔtū ā.

⁴Oje nɛ̄hɛ́ mɛ́mla ugóolu (oje ɔdɔ) nēé le yá aójibó kú aɔ́wɔ kú uwā á. Úklɔ́ kú abɔ̄ kú ɔ̄cɛ ɔlamu nēé wɛ á.

⁵É lɛ okónu, amáŋ é kɛlā glá ŋ́, é lɛ īkpēyí, amáŋ é mɛ́ɛbɛ glá ŋ́.

⁶É lɛ ahɔ̄, amáŋ é pó ɛlā glá ŋ́, é lɛ ɛnwū amáŋ é píípī glá ŋ́.

⁷É le abɔ̄, amáŋ é bī ɔ̄ le yá ɔdā dúúmā glá ŋ́, é lɛ ikpó, amáŋ é yāwu glá ŋ́, ɛ́ɛ́ nēé kē ka ɔdā dúúmā glá ŋ́.

⁸Ká ācɛ nēe yá uwā ā, mɛ́mla odúúdú ācɛ ɔhá nēe gē lɛ ɔtūce uwá ā, kéē kwú pīya bɛ̄ɛka uwá ā.

⁹Ācɛ Ísrɛ̄lu, aá lɛ ɔtūce Óndú ā. Anú gē tá aá abɔ̄ klla ī gbō aá á.

¹⁰Ācogwɛ́ɛya kú Ɔwɔicō, aá lɛ ɔtūce Óndú ā. Anú gē tá aá abɔ̄ klla ī gbō aá á.

¹¹Aá nēe gē gbā Óndú ɛ̄gbā ā, aá lɛ ɔtūce ɔ́. Anú gē tá aá abɔ̄ klla gē gbō aá á.

¹²Óndú ā í blakwu alɔ, ó géē hɔ́hā ce alɔ. Ó géē hɔ́hā ce ācɛ kú Ísrɛ̄lu, mɛ́mla ācogwɛ́ɛya kú Ɔwɔicō ā.

¹³Ó géē hɔ́hā ce ācɛ nēe gē gbā ɔ̄ ɛ̄gbā ā, kwu ācɛ nɛ̄ŋcɛ́ kwu ācɛ nɛ̄hi.

¹⁴Óndú ā kóō je ayí lɛ aá mɛ́mla ayí aá nwuné nwuné.

¹⁵Ká Ɔwɔicō nōo yá ɔkpáncō mɛ́mla ɛcɛ ā, kóō lɛ ɔhā hɛ́ ce aá.

¹⁶Ɔkpáncō ā wɛ ákú Óndú ōfōōfūnū nɛ̄, amáŋ ó kwu ɛcɛ ā ú lɛ alɛɛcɛ.

¹⁷Odúúdú ācɛ nēe le pɛ́ gekwú ɛɛ́ mā, mɛ́mla ācɛ nēe bá ɔlékwū ā, í gē cɛ̄tra Óndú ā gɛ ŋ́.

¹⁸Amáŋ, alɔ nēe yēeyī ā, géē tá Óndú ahínyá, o ŋmá eko nyā jāā gbéeko nɛ̄ ó ī mɛ ŋ́ mā. Aá cɛ̄tra Óndú ā.