Read idoma AÍJĒ KÚ Ɛ̄GBĀ 118 Bible Online

AÍJĒ KÚ Ɛ̄GBĀ 118 - idoma bible

AÍJĒ KÚ Ɛ̄GBĀ 118

¹Aá tá Óndú ahínyá, ohígbū ka Óndú ā lɔhi. Ihɔtū nɛ̄ ó lɛ lɛ ācɛ ā yɔ̄ piyóó.

²Ācɛ Ísrɛ̄lu kóō kahíníī, “Ihɔtū nɛ̄ ó lɛ lɛ ācɛ ā yɔ̄ piyóó.”

³Ācogwɛ́ɛya kú Ɔwɔicō, aá kahíníī, “Ihɔtū nɛ̄ ó lɛ lɛ ācɛ ā yɔ̄ piyóó.”

⁴Ācɛ nēe gē gbā Óndú ɛ̄gbā, kéē kahíníī, “Ihɔtū nōo lɛ lɛ ācɛ ā yɔ̄ piyóó.”

⁵Eko nɛ̄ n lɛ unwalu ā, n le ikwū je klá Óndú, ó le ɔkɔ kú um pó, Ó kē wā í le um hɛ́tá.

⁶Abɔ̄ Óndú ā yɔ̄ pī um ā, ń gáā yúufi ŋ́. Ɔ̄cɛ dóódu í yá um ɔdā dúúmā glá ŋ́.

⁷Óndú ā yɔ̄ pī um, kē ī tá um abɔ̄, n kē í yá aólɛlā nēe ī wɔ́tū um ā lé pií.

⁸Ó lɔhi kú ɔ̄cɛ kóō lɛ ɔtūce Óndú, fíyɛ́ o lɛ ɔtūce ɔ̄cɛ ɔlamu.

⁹Olɔhi kú ɔ̄cɛ kóō lɛ ɔtūce Óndú, fíyɛ́ ō lɛ ɔtūce aótrɛ̄yí kú ācɛ ɔlamu.

¹⁰Odúúdú aéwɔhá ā, le yɛ um jīla tá, amáŋ o ŋmá lɛ ɔfú kú Óndú ā, n le odúúdú uwá kpó yíífi.

¹¹É le yɛ um jīla tá ābɔ̄ dóódu, amáŋ oŋmá lɛ ɔfú kú Óndú ā, n le uwá kpó yíífi.

¹²É le um yɛ jīla tá bɛ̄ɛka ɛ́gɛ́nɛ̄ ɛnwú gē kɔ̄ tū ɔ̄cɛ í yɛjīla ɔ́ tá ā, é kwú yɔlá bɛ̄ɛka ácí ugba ā. N le uwá kpó yíífi o ŋmá ɔfú kú Óndú ā.

¹³É nuunu tá um lɔfúlɔfú bɛ̄ɛka ɔdā nēé gáā yá um lé ā, amáŋ, Óndú ā wā í le abɔ̄ tá um.

¹⁴Óndú ā gē je ɔfú gā um, ó klla ī lɛ ɔfú tū um iyē. Ó kē lɛ um nyatá ɛɛ́.

¹⁵Aá pó ijē kú éeyē kú oyálé ŋmá ipú aádá kú ācɛ okpaakpa kú Ɔwɔicō kahíníī, “Ɔfú nɛ̄hi kú Óndú ā le ɔdā nɛ̄hi yá ɛɛ́.

¹⁶Abɔ̄lɔ́ná kú Óndú ā cɛ̄ lɛ alɔ le yálé ɛɛ́. Ɔfú nɛ̄hi kú nū ā cɛ̄ lɛ alɔ lɛ yálé ɛɛ́.”

¹⁷Ń gáā kwú ŋ́, amáŋ n géē yēeyī, cɛ́ɛ́ ká n̄ ka odúúdú ɔdā nɛ̄ Óndú yá ā tɛ́ɛcɛ.

¹⁸Óndú ā yá um ōwē nɛ̄hi, amáŋ ó mā um tá kú n̄ kwú ŋ́.

¹⁹Lɛ okónu ɔwɛ Agblīihɔ-nɛ̄hi ā nwūla gā um, cɛ́ɛ́ ká n̄ bēé wā í tá Óndú ā ahínyá.

²⁰Ɛ̄nyā wɛ okónu ɔwɛ kú Óndú á, ācɛ o yá ucē okpaakpa kú Ɔwɔicō ā, gáā bēé nú á.

²¹Óndú, n tá uwɔ ahínyá, ɛ́gɛ́nɛ̄ a le ɔkɔ nɛ̄ n gbā ā pó ā, nāa klla cɛ̄ gā um le yálé ā.

²² Ɛcɔ̄ nɛ̄ ācɛ o gwíinu tá koó tīile dúúmā gɛ ŋ́ mā, klla kwú pīya ɛcɔ̄ nōo cɛgbá fíyɛ́ dúú kú inu ō gwó mɛ́ɛ̄ á.

²³Óndú yá ɔdā nōo yɔ̄ nyā á. Ó kē le hɛ́ alɔ idáagó, ó klla yá alɔ eyījii nɛ̄hi.

²⁴Ícɛ wɛ ɛ̄cī nɛ̄ Óndú ā yá aólɛlā kú lé á, ālɔ̄ lé ucɛ, kú ālɔ̄ gwéeyē ícɛ nyā.

²⁵ Óndú, alɔ ī gbɔ̄ɔkɔ gā uwɔ ká ā lɛ alɔ nyatá.

²⁶ Óndú ā, kóō hɔ́hā ce ɔ̄cɛ dóódu nōo ī wā iyē kú nū ā. Alɔ géē hɔ́hā cɛ aá ŋmá ipú Agblīihɔ-nɛ̄hi kú Óndú ā.

²⁷Óndú ā wɛ Ɔwɔicō á. Ó le ɔdā olɔhi yá lɛ alɔ. Aá bī ābɔ̄ ɔcí kú aá gwéeyē yɛjīla ede kú nū tá.

²⁸Awɔ, wɛ Ɔwɔicō kú um á, n géē tá uwɔ ahínyá, Awɔ wɛ Ɔwɔicō kú um á, n géē da ɔ̄cɛ dóódu ka a lɔfú nɛ̄hi.

²⁹Aá tá Óndú ahínyá, ohígbū ka Óndú ā lɔhi, ihɔtū nɛ̄ ó lɛ lɛ ācɛ ā yɔ̄ piyóó.