Read idoma AÍJĒ KÚ Ɛ̄GBĀ 119 Bible Online

AÍJĒ KÚ Ɛ̄GBĀ 119 - idoma bible

AÍJĒ KÚ Ɛ̄GBĀ 119

¹Ɔhā yɔ̄ lɛ ācɛ dúúmā nɛ̄ oyēeyī kú uwā le yēŋēē nōo ī lā oyēeyī ɛ́gɛ́nɛ̄ íne kú Óndú ā ka lɛ ā.

²Ɔhā yɔ̄ lɛ ācɛ nēe gē yá ɔdā nɛ̄ íne ka ā, nēe klla gē tíne Óndú ā mla odúúdú ɔtū kú uwā.

³Ācɛ nēé kē yá ɔdōbɔ̄bí dúúmā ŋ́, amáŋ nēe gē lā oyēeyī kú uwā ɛ́gɛ́nɛ̄ Óndú ā tíne ā, kéē gwéeyē.

⁴Óndú, a le aíne kú uwɔ je lɛ alɔ ɛɛ́, a kē tíne ká ālɔ̄ lɛyítáajɛ lɛ uwá kpaakpa.

⁵N gē gbɔ̄ɔkɔ cɛ́ɛ́ ká ɔwɛ kú um kóō le kpaakpa ipú íne kú uwɔ ō le tū.

⁶Ohígbū ka ɔ́dāŋ nɛ̄ n lɛ ɔtū tá odúúdú aíne kú uwɔ, uwēyī í gáā kwú um ŋ́.

⁷Abɔ̄ a géē yɔ̄ ī nwū um ɔwɛ nāa ī hɛ́pɔ̄ kpaakpaā, n géē cɛ̄tra uwɔ ŋmá ɔtū oyéŋēē.

⁸N géē lɛyītáajɛ lɛ íne kú uwɔ, ā híī cīgbīhi kwu um ŋ́ dúúdú.

⁹Ɛ́gɛ́nyā nɛ̄ ɔyípōklóbīya géē lɛ oyēeyī kú nū tū yēŋēē glá ā? Oŋmá lɛ ɛyí ō táajɛ lɛ íne kú uwɔ.

¹⁰N gē bī odúúdú ɔtū kú um gē lɔfú tīyē kú n̄ gbā uwɔ ɛ̄gbā. Ā cɛ̄ gā um nyīleyī ŋmá íne kú uwɔ ŋ́.

¹¹N kwú ɛlā kú uwɔ ú tá ipú ɔtū kú um cɛ́ɛ́ kú n̄ híī bīya íne kú uwɔ ŋ́.

¹²N cɛ̄tra awɔ Óndú, nwū um íne kú uwɔ.

¹³N bī okónu kú um yɔ̄ ī jé odúúdú íne nāa je lɛ ācɛ ɔlɛ́ uwɔ ā tɛ́ɛcɛ éyééye gbōmgbōm.

¹⁴Ó he um ɔtū ká n̄ lɛ aíne kú uwɔ ā tū fíyɛ́ ō lɛ agbénú nɛ̄hi.

¹⁵N gē gbɛlá kwu aíne kú uwɔ, klla ī leyī yɛ ɔdā nāa yɔ̄ ī nwū ā.

¹⁶Íne kú uwɔ ā he um ɔtū, ń gaá je odúúmā kú nū mlanyī ŋ́.

¹⁷Óndú, yá olɔhi lɛ ami nōo wɛ ɔ̄cocɛ̄hɔ̄ kú uwɔ ā, ká n̄ géē lɛyítáajɛ lɛ íne kú uwɔ.

¹⁸Lɛ īkpēyí kú um nwūla cɛ́ɛ́ kú n̄ má ɔdā idáagó kú uwɔ ŋmá ipú ɔkpá íne kú uwɔ.

¹⁹N wɛ ugbɔga ipú ɛcɛ nɛ, ā híī je íne kú uwɔ tayínū ŋmá ɛgiyí um ŋ́.

²⁰Unwū kú íne kú uwɔ yɔ̄ ī ŋmó odo kú um eko dóódu.

²¹A gē dɛ̄gba tū ācɛ oyɔ́bɔ́ɔ̄cɛ gē pi uwá ahɔ̄, lɛ okónu tá lɛ ācɛ nēé lɛyítáajɛ lɛ íne kú uwɔ ŋ́ mā.

²²Óndú, ā cɛ̄ lɛ uwá cá um ɛcá klla yá um okónu ŋ́, ohígbū ka n gē le íne kú uwɔ tū.

²³Aɔ́cɛ́ kōō le jīla le ujɔ̄ tū tū um náaná, n géē yɔ̄ ī gbɛlá kwu íne kú uwɔ kpɔ́.

²⁴Aíne kú uwɔ wɛ ɔdā nōo he um ɔtū á. Aíne ā gē nwū um ɛlā klla í ma ɔwɛ fú gā um.

²⁵N le bá ō kwú ɛɛ́, kwú um ú cāŋjɛ ɛ́gɛ́nɛ̄ ɛlā kú uwɔ ka lɛ ā.

²⁶Eko nɛ̄ n lɛ ɔdā dóódu nɛ̄ n yá ā ka tɛ́ɛcɛ gā uwɔ ā, a kē le ohi tū um. Óndú nwū um íne kú uwɔ.

²⁷Yá ká n̄ lɛ ɔwɛ kú íne kú uwɔ jé, cɛ́ɛ́ ká n̄ gbɛlá kwu úklɔ́ idáagó kú uwɔ.

²⁸Ɔtūnōbí le fíyɛ́ um abɔ̄ ɛɛ́. Lɛ ɔfú tū um iyē ɛ́gɛ́nɛ̄ a ka lɛ ā.

²⁹Ā cɛ̄ gā um gwō tū ipú ucē obɔ̄bí ipú ŋ́, ɛ́ɛ́ nāa kóō ī cɛ̄ gā um kɛ̄mgbɛ̄ ŋ́. Ményīnyi kú um ká ā nwū um íne kú uwɔ.

³⁰Cɛ́ɛ́ kú n̄ géē lɛyítáajɛ gā uwɔ. N géē lɛ ɛlá kwu íne kú uwɔ eko dóódu.

³¹N yɔ̄ ī yɛce íne kú uwɔ ɛɛ́, Óndú, ā yá kú uwēyī kóō kwú um gɛ ŋ́.

³²N géē cēyītīkwū ká n̄ yɔ̄ ī lɛyítáajɛ lɛ íne kú uwɔ, ohígbū ka awɔ ī yá ká n̄ jɛ́ɛyí íne kú uwɔ fíyɛ́ á.

³³Óndú, nwū um ɛyí kú íne kú uwɔ, cɛ́ɛ́ ká n lɛyítáajɛ lɛ íne kú uwɔ ā jāā gaajɛ.

³⁴Yá ká n̄ jɛ́ɛyí íne kú uwɔ, cɛ́ɛ́ ká n̄ lɛyítáajɛ lɛ íne kú uwɔ. Cɛ́ɛ́ ká n̄ yɔ̄ ī lɛ ɔ́ tū mla odúúdú ɔtū kú um.

³⁵Bī um tá ipú ɔwɛ nāa ka n̄ yɛ ipú íne kú uwɔn ā, ohígbū ka ó he um ɔtū.

³⁶Kwú unwū kú íne kú uwɔ ō le tū ú tá um ɔtū, fíyɛ́ unwū kú ije mla agbénú ō lɛ.

³⁷Ā cɛ̄ gā um lɛ ɛlá wu aɔ́dā icííci kú ɛcɛ nyā ŋ́. Cɛ́ɛ́ ká ā yá olɔhi gā um ɛ́gɛ́nɛ̄ a ka lɛ ā.

³⁸Lɛ okónu nāa ce lɛ odúúdú ācɛ nēe ī gbā uwɔ ɛ̄gbā ā, yá lɛ ami nōo wɛ ɔ̄cocɛ̄hɔ̄ kú uwɔ ā.

³⁹Lɛ um nyatá ŋmá ɛcá nɛ̄ n yúufi nū ā, ohígbū ka ɛpɔ̄ ō hɛ́ kú uwɔ lɔhi.

⁴⁰N tíne ká n̄ lɛyítáajɛ lɛ íne kú uwɔ, o ŋmá lɛ okpaakpa kú uwɔ ā, lɛ oyēeyī ɛ̄yīpɛ̄ je gā um.

⁴¹Óndú, lɛ ɛ́gɛ́nɛ̄ n he uwɔ ɔtū lɛ ā mafú gā um. Lɛ um nyatá ɛ́gɛ́nɛ̄ a cokónu gā um lɛ ā.

⁴²Cɛ́ɛ́ n̄ géē má ohi tá ācɛ nēe gē cá um ɛcá ā, ohígbū ka n lɔtūce ɛlā kú uwɔ.

⁴³Yá ká n̄ lɔfú kɛlā ɔ̄kwɛ̄yi kú uwɔ eko dóódu, ohígbū ka n lɔtūce ɛ́gɛ́nɛ̄ a ī kɛpɔ̄ kú uwɔ lɛ ā.

⁴⁴N géē lɛ íne kú uwɔ tū eko dóódu piyóó.

⁴⁵Aólɛlā kú um í kē gáā gbō um ɔwɛ dóódu glá ŋ́, ohígbū ka n lɛyítáajɛ lɛ íne kú uwɔ.

⁴⁶N géē ka íne kú uwɔ ā tɛ́ɛcɛ lɛ aɔ́cɛ́, nɛ̄ ń kē gáā yá uwēyī ŋ́.

⁴⁷Ó he um ɔtū ō lɛyítáajɛ lɛ íne kú uwɔ, ohígbū ka íne kú uwɔ he um ɔtū.

⁴⁸Íne kú uwɔ he um ɔtū, n kē lɛ ojīlīma ce ɔ́, n géē gbɛlá tū íne kú uwɔ.

⁴⁹Lɛ ɛlá kwu okónu nāa ce lɛ ami nōo wɛ ɔ̄cocɛ̄hɔ̄ kú uwɔ ā, nɛ̄ n lɛ ɔtūce ɔ́ ā.

⁵⁰Eko nɛ̄ um yɔ̄ ipú unwalu, n gē tá iyī um ɔtūlé, ohígbū ka okónu nāa ce gā um ā je oyēeyī gā um á.

⁵¹Ācɛ oyɔ́bɔ́ɔ̄cɛ nēé jé awɔ nōo wɛ Ɔwɔicō ŋ́ mā, bá ī yá um ɛbɛ́ piyóó, amáŋ, n gáā má ō lɛyítáajɛ lɛ íne kú uwɔ ŋ́.

⁵²Óndú, eko dúúmā nɛ̄ n gbɛlá kwu íne kú uwɔ nāa je ŋmá eko íkée ā, ó gē tú um ɔtūlé.

⁵³Ɔtū gē wú um nɛ̄hi eko dúú nɛ̄ n gbɛlá kwu ācobɔ̄bíipú, nēe bá ī bīya íne kú uwɔ ā.

⁵⁴Ipú oyéeyī kú um kpií ipú ɛcɛ nyā, nɛ̄ n wɛ ugbɔga ā, íne kú uwɔ wɛ ɔdā nɛ̄ um gē gwíijē lɛyíkwu ɔ́ á.

⁵⁵Óndú, otú dóódu, n gē gbɛlá kwu uwɔ, n klla ī gbɛlá kwu íne kú uwɔ.

⁵⁶Ɛyí ōtáajɛ lɛ íne kú uwɔ wɛ ɔhā mɛ́mla olɔhi nɛ̄ um lɛ á.

⁵⁷Óndú, awɔ wɛ ɔdā dúúmā nɛ̄ n tíne á, n cokónu ká n̄ lɛyítáajɛ lɛ íne kú uwɔ.

⁵⁸N gbɔ̄ɔkɔ gā uwɔ mla odúúdú ɔtū kú um, ményinyi kú um ɛ́gɛ́nɛ̄ okónu nāa ce ā lɛ āa.

⁵⁹N gbɔɔ́ ō gbɛlá kwu ucē nɛ̄ n yɔ̄ ī yá ā, n le pīyabɔ̄, ká n̄ géē gbɔɔ́ ō lɛ íne kú uwɔ tū.

⁶⁰Ń kpó eko bónū ɛ́ɛ́ nɛ̄ n gbɔɔ́ ō lɛyítáajɛ lɛ íne kú uwɔ ā ŋ́.

⁶¹Nááná nɛ̄ ācobɔ̄bíipú ā le ukpa kpla gbēyī um ā, ń gwɛ̄lá hī íne kú uwɔ tá ŋ́.

⁶²Ahāpotú, n gē cāŋjɛ ī cɛ̄tra uwɔ, ohígbū ɛpɔ̄ okpaakpa kú uwɔ ā.

⁶³N wɛ oklóbīya kú odúúdú ācɛ nēe gē gbā uwɔ ɛ̄gbā ā, mla odúúdú ācɛ nēe gē lɛ íne kú uwɔ tū ā.

⁶⁴Óndú, a gē yíihɔtū tá odúúdú ācɛ kú ipú ɛcɛ ā eko dóódu. Nwū um íne kú uwɔ, Óndú.

⁶⁵Óndú, lɛ ami nōo wɛ ɔ̄cocɛ̄hɔ̄ kú uwɔ ā yá lɔhi, ɛ́gɛ́nɛ̄ a ka lɛ ā.

⁶⁶Nwū um íjééyī, ká n̄ jɛ́yí ɛlā, ohígbū ka n kpɔ́tūce íne kú uwɔ.

⁶⁷Gbɔbū ɛ́ɛ́ ká ā yá um italā ā, n gē yá ɔdōbɔ̄bí ŋmá íne kú uwɔ á le tū ŋ́, amáŋ, abālɔbányā ā, n kwú ɛyí ú táajɛ lɛ ɛlā kú uwɔ ɛɛ́.

⁶⁸Abɔ̄ a lɔhi klla ī yá ɔdā olɔhi ā, nwū um íne kú uwɔ.

⁶⁹Ācɛ oyɔ́bɔ́ɔ̄cɛ le um iyē bīya mla ɛ̄kɛ̄mgbɛ̄ nēé kā bá um ā. Amáŋ n gē lɛ íne kú uwɔ tū mla odúúdú ɔtū kú um.

⁷⁰Ācɛ nēe bá nyā í jé ɔdā dúúmā lɛyíkwu íne kú uwɔ ŋ́, Amáŋ íne kú uwɔ kē he um ɔtū.

⁷¹Italā nāa yá um ā lɔhi gā um, ohígbū ka ó cɛ̄ gā um lɛ íne kú uwɔ jé.

⁷²Íne kú uwɔ nāa je gā um ā, jɛ̄ um eyī fíyɛ́ odúúdú agbénú kú ɛcɛ nyā á.

⁷³Awɔ bī abɔ̄ kú uwɔ yá um klla bī um háyi á. Je ɛyí kú ɔdā ōjé gā um. cɛ́ɛ́ ká n̄ kllɔcɛ́ íne kú uwɔ.

⁷⁴Ācɛ nēe gē gbā uwɔ ɛ̄gbā ā, géē má um klla í gwéeyē, ohígbū ka n lɔtūce ɛlā kú uwɔ.

⁷⁵Óndú, ɔwɛ nāa ī kɛpɔ̄ ā, le kpaakpa, a yá um italā, ohígbū ka ɔdā dóódu nāa gē yá ā le kpaakpa.

⁷⁶Lɛ ihɔtū nāa lɛ gā um eko dóódu ā mafú gā um ká ā lɛ um ɔtū túlé, ɛ́gɛ́nɛ̄ a cokónu lɛ ami nōo wɛ ɔ̄cocɛ̄hɔ̄ kú uwɔ lɛ ā.

⁷⁷Ményinyi um, cɛ́ɛ́ ká n̄ yéeyī, ohígbū ka íne kú uwɔ ā, wɛ ɔdā nōo he um ɔtū á.

⁷⁸Lɛ uwēyī je lɛ ācɛ nōo ī yɔ́bɔ́ɔ̄cɛ ā, ohígbū ka ije nēé cē bá um ā. Amáŋ n kē í yɔ̄ ī gbɛlá kwu íne kú uwɔ piyóó.

⁷⁹Ká ācɛ nēe gē gbā uwɔ ɛ̄gbā ā, kéē wā ɛgiyí um, cɛ́ɛ́ kéē géē kllɔcɛ́ íne kú uwɔ.

⁸⁰Óndú, yá ká n̄ lɛyítáajɛ lɛ íne kú uwɔ, ŋmá ipú ɔtū kú um dúúdú, cɛ́ɛ́ ká uwēyī kóō kwú um ŋ́.

⁸¹Abɔ̄ le hɛ́ um iyē ŋmá lɛ ɛ́gɛ́nɛ̄ n húmáyī gbēyī ká ā nya um tá ā. N kē lɔtūce ɛlā kú uwɔ.

⁸²Eyī le gbɛnú gā um ŋmá lɛ ɛ́gɛ́nɛ̄ n húmáyī gbēyī ɔdā nāa cokónu nū ā. N dɔɔ̄kā kahíníī, “Eko nyá nāa gáā tá um ɔtū lé ā?”

⁸³Ohígbū ka ń tīile dóódu gɛ ŋ́ bɛ̄ɛka ɔjá kú ejé nōo le gbokwū ā. Nááná ń kē je mlanyī íne kú uwɔ ŋ́.

⁸⁴Eko nyá nɛ̄ ami nōo wɛ ɔ̄cocɛ̄hɔ̄ kú uwɔ ā, gáā gbēyī í kwu ā? Eko nyá nāa géē hɛ́pɔ̄ ká ācɛ nēe bá ī yá um ŋmó ā?

⁸⁵Ācɛ nēe ī yɔ́bɔ́ɔ̄cɛ, nēé gē lɛyítáajɛ lɛ íne kú uwɔ ŋ́ mā, lɛ ɔ̄gɔ̄ bū tá ajɛ gbēyī um ɛɛ́.

⁸⁶Ɔ̄cɛ lɔtūce odúúdú íne kú uwɔ ā glá. Aólɛlā kú um bá ī yá um ŋmó mla ɛ̄kɛ̄mgbɛ̄ ō kā bá um.

⁸⁷Ó hile lígíi, kéē lɛ um ŋmó mɛ́ɛnɛ, amáŋ, ń kē cīgbīhi ŋmá íne kú uwɔ ō le tū ŋ́.

⁸⁸O ŋmá ihɔtū nāa lɛ gā um eko dóódu ā, le oyéeyī kú um tū, cɛ́ɛ́ ká n̄ géē lɛ íne nāa je gā um ā tū.

⁸⁹Óndú, ɛlā kú uwɔ wɛ ɔkwɛ̄yi piyóó ɔkpáncō.

⁹⁰Okpaakpa kú uwɔ yɔ̄ lɛ odúúdú aípɔ́ɔma ā, ŋmá eko tá eko, a kwú ɛcɛ ú kwu ajɛ, ó kē kwu ɛga nāa le ɔ́ kwu ā kli.

⁹¹Ɔdā dóódu bá ícɛ nyā ɛ́gɛ́nɛ̄ ɛlā kú uwɔ ka lɛ ā. Ohígbū ka ɔdā dúúmā nēe bá ā gē ce uwɔ ɛhɔ̄.

⁹²Ɔ́dāŋ ka íne kú uwɔ í wɛ ɔdā nōo he um ɔtū ŋ́ nɛɛ, ń géē yɛ í kwú yíífi ipú ōwē kú um ā.

⁹³Ń gáā gwɛ̄ɛlá hī íne kú uwɔ tá gbóógbóō ŋ́, ohígbū ka anú nāa bī le yá um nɛ̄ um yéeyī kpɔ́ ɛ́ɛ́ má.

⁹⁴N wɛ ákú uwɔ nɛ, lɛ um nyatá. N kē húmáyī cēyītīkwū kú n̄ lɛyítáajɛ lɛ íne kú uwɔ.

⁹⁵Ācobɔ̄bíipú ā tayínū kéē kwú um ú yíífi, amáŋ n gē gbɛlá kwu íne kú uwɔ.

⁹⁶N le jé ka ɔdā dóódu lɛ ɛjī klla lɛ ɛnyá, amáŋ, íne kú uwɔ í lɛ ɛjī, ɛ́ɛ́ nɛ̄ ó gē lɛ ɛnyá ŋ́.

⁹⁷Íne kú uwɔ he um ɔtū nɛ̄hi. Anú nɛ̄ n gē gbɛlá nū eko dóódu ɛ̄cī dóódu á.

⁹⁸Íne kú uwɔ ā yɔ̄ mla um piyóo, ó cɛ̄ gā um le jéeyī fíyɛ́ aólɛlā kú um.

⁹⁹N klla jɛ́yí ɔdā fíyɛ́ odúúdú ācɛ nēe ī nwū um odée ā, ohígbū ka n gē gbɛlá kwu íne kú uwɔ.

¹⁰⁰Ami jééyī fíyɛ́ aókplícī á, ohígbū ka n gē lɛyítáajɛ lɛ íne kú uwɔ.

¹⁰¹N le iyī um kwú cíí ŋmá ucē obɔ̄bí dóódu, cɛ́ɛ́ ká n̄ lɛyítáajɛ lɛ íne kú uwɔ.

¹⁰²N húmáyi lɛyítáajɛ lɛ íne kú uwɔ ā, ohígbū ka awɔ ī nwū um á.

¹⁰³Ɛlā kú uwɔ lɛ ɔnyɛ tū um nɛ̄hi, anú lɛ ɔnyɛ tū um fíyɛ́ ɛnwú á.

¹⁰⁴Íne kú uwɔ nɛ̄ n gē jé ā, ī je íjééyī gā um, ohígbū ɔ́ɔmā, ucē kú ɛ̄kɛ̄mgbɛ̄ dóódu í he um ɔtū ŋ́.

¹⁰⁵Ɛlā kú uwɔ ā lɛbɛ̄ɛka agege nōo ī fíyajɛ iyɔ̄bū um kóō bī n jé ɔwɛ ā. Ó klla lɛbɛ̄ɛka ɔlá ofíyajɛ nōo ī cɛ̄ gā um má ɔwɛ nɛ̄ n gē yɛ ā.

¹⁰⁶N le okónu ce nɛ̄ n géē yá ɔ̄ píī, ka n géē lɛ íne okpaakpa kú uwɔ tū.

¹⁰⁷Ōwē kú um nwuné nɛ̄hi, Óndú, lɛ ɔfú tū um iyē ɛ́gɛ́nɛ̄ a ka lɛ ā.

¹⁰⁸Óndú, kócōō, mīyɛ ɛya nɛ̄ n bī wā gaá le tá uwɔ ahínyá ā, cɛ́ɛ́ ká ā nwū um íne kú uwɔ.

¹⁰⁹N bī oyēeyī kú um ipú abɔ̄ kú um klla lɛyí cīkwū eko dóódu, nááná ā, ń kē gwɛ̄lá hī íne kú uwɔ tá ŋ́.

¹¹⁰Ācobɔ̄bíipú ā le ukpa kpla tá ajɛ gā um, Amáŋ, ó ci um ō lɛyítáajɛ lɛ íne kú uwɔ ŋ́.

¹¹¹Aíne kú uwɔ ā, nwū um aɔ́dā nēe tīile gā um piyóó ipú oyēeyī kú um. É gē cɛ̄ lɛ ɔtū he um ká n̄ gwéeyē.

¹¹²N kwú ɔtū kú um ú yékpónú ká n̄ géē lɛyítáajɛ lɛ aíne kú uwɔ eko dóódu, jāā gbēeko nɛ̄ n kwú.

¹¹³N gē wɔ́tū ācɛ nēe lɔtū bɛ́ɛpɛɛpa, nēé lɛyítáajɛ gā awɔ ŋ́ mā. Amáŋ ami ā, íne kú uwɔ ā kē he um ɔtū.

¹¹⁴Ɔ̄cɛ gē yɔ̄ ɛbɔ́ mɛ́ɛlɛ́ ɛgiyí uwɔ glá, n kē kpɔ́tūce odée ŋmá ipú ɛlā kú uwɔ.

¹¹⁵Ācɛ o yá ɔdōbɔ̄bí, aá nyɛ̄ɛ̄ ŋmá ɛgiyí um, cɛ́ɛ́ ká n̄ géē lɛ íne kú Ɔwɔicō kú um tū.

¹¹⁶Óndú lɛ abɔ̄ bī um háyi icō ɛ́gɛ́nɛ̄ a ka ā, cɛ́ɛ́ ká n̄ yēeyī. Ā cɛ̄ lɛ uwēyī kwú um ŋ́ ohígbū ka n leyīce ka, a í nya um tá.

¹¹⁷Lɛ abɔ̄ bī um háyicō, cɛ́ɛ́ ká n̄ yɔ̄ ɛbɔ́, cɛ́ɛ́ n géē lɛ ojīlīmā ce aíne kú uwɔ.

¹¹⁸A tá odúúdú ācɛ nēe tá kéē lɛyítáajɛ lɛ aíne kú uwɔ ā. Ɛ́gɛ́nɛ̄ aá jé lɛ ā, ula kú uwā dóódu ā wɛ áncā nɛ̄.

¹¹⁹A je odúúdú ācobɔ̄bíipú kú ɛcɛ ā, bɛ̄ɛka īmū ā, ohígbū ɔ́ɔmā, íne kú uwɔ ā he um ɔtū nɛ̄hi.

¹²⁰Iyē kú um yɔ̄ ī fīyégbúlú ŋmá lɛ ufi uwɔ nɛ̄ um yɔ̄ ī yá ā. Ufi le mu um ipú ohígbū ɛpɔ̄ nāa gē hɛ́ ā.

¹²¹N le ɔdā nōo lɔhi klla le kpaakpa ā yá ɛɛ́, á híī habɔ̄ um tá lɛ ācɛ nēe gē yá um ŋmó ā ŋ́.

¹²²Leyīkwu ami nōo wɛ ɔ̄cocɛ̄hɔ̄ kú uwɔ ā lɔhi, ā cɛ̄ lɛ ācɛ oyóbɔ́ɔ̄cɛ ā lɛ abɔ̄ da um ɛyí tāajɛ ŋ́.

¹²³Eyī le gbɛnú gā um ŋmá lɛ ɛ́gɛ́nɛ̄ n húmáyī leyītáajɛ yɔ̄ ī gbēyī okónu nāa ce gā um ka, anúɔ í wā gaá hɛ́ um tá ā.

¹²⁴Yá mla um nōo wɛ ɔ̄cocɛ̄hɔ̄ kú uwɔ ā, ɛ́gɛ́nɛ̄ ihɔtū nāa lɛ gā um eko dóódu ā lɛ ā, cɛ́ɛ́ ká ā nwū um íne kú uwɔ.

¹²⁵N wɛ ɔ̄cocɛ̄hɔ̄ kú uwɔ nɛ, je íjééyī gā um, ká n̄ jɛ́yí aɔ́dā nāa gē nwū ā.

¹²⁶Óndú, eko le yá nāa géē yá odée ɛɛ́, ohígbū ka ācɛ le íne kú uwɔ ā tányílá ɛɛ́.

¹²⁷Ɔkwɔ̄ɔ̄kwɛ̄yi, íne kú uwɔ ā he um ɔtū fíyɛ́ ɛdɔ ugóolu (oje ɔdɔ) dóódu á.

¹²⁸Abɔ̄ n gē lɛ odúúdú aíne kú uwɔ tū ā, ucē obɔ̄bí dóódu ō yá, gē wú um ɔtū.

¹²⁹Íne kú uwɔ ā lɔhi nɛ̄hi, ohígbū ɔ́ɔmā, n géē bī uwā yúklɔ́ mla odúúdú ɔtū kú um.

¹³⁰O nwula ɛlā kú uwɔ nāa gē nwū um ā kóō tú um eyī péee. Ó klla gē cɛ̄ lɛ ɔ̄cɛ ī jɛ́yí odée péee ɛ́gɛ́nɛ̄ ɔlá ī fíyajɛ ī cɛ̄ lɛ ɔ̄cɛ ī mɛ́ɛbɛ péee ā. Ó klla gē je ogwuda pīya ojééyī.

¹³¹N lɛ okónu tɔ́ɔtɛ́ yɔ̄ ī yíjēnyi kú ɛlā kú uwɔ ā, ɛ́gɛ́nɛ̄ ɔ̄cɛ ī yíjēnyi kú éŋkpɔ̄ ā.

¹³²Pīyeyī má um, cɛ́ɛ́ ká ā ményinyi um, ɛ́gɛ́nɛ̄ a gē yá lɛyíkwu ācɛ nāa he uwá ɔtū ā.

¹³³Ɛ́gɛ́nɛ̄ a cokónu gā um lɛ ā, ā cɛ̄ gā um gwōnū ŋ́. Ā cɛ̄ lɛ ucē ɔ́bíipú je jé um iyē ŋ́.

¹³⁴Lɛ um hɛ́tá ŋ́má abɔ̄ ācɛ nōo gē pīya um tū, cɛ́ɛ́ ká n̄ géē lɛyítáajɛ lɛ íne kú uwɔ.

¹³⁵Gbonɛnɛ lɛ ami nōo wɛ ɔ̄cocɛ̄hɔ̄ kú uwɔ ā, cɛ́ɛ́ ká ā nwū um íne kú uwɔ.

¹³⁶Agīje yɔ̄ ī pɛ́ ŋmá um eyī ɛ́gɛ́nɛ̄ ɔkpá ī pɛ́ ā, ohígbū ka ācɛ í lɛ íne kú uwɔ tū ŋ́.

¹³⁷Óndú, a le kpaakpa, ɛpɔ̄ kú uwɔ klla le kpaakpa.

¹³⁸Odúúdú íne kú uwɔ nāa le kwu ajɛ ā le kpaakpa klla tōō lɔtūce ɔ́.

¹³⁹Ɔtū kú um wɛ ɔlá, ohígbū ka aólɛlā kú um í lɛ ɛlá wu íne kú uwɔ ā ŋ́.

¹⁴⁰Ɔ̄cɛ lɔfú lɔtūce okónu nāa ce ā glá, ó kē he um ɔtū nɛ̄hi.

¹⁴¹N le nyɛ́, ń klla wɛ ɔdā dúúmā nɛ̄ ɔ̄cɛ kōō ī lɛ ɛlá wu um ŋ́, náaná ń leyī gwō íne kú uwɔ ā bónū ŋ́.

¹⁴²Ucē okpaakpa kú uwɔ yɔ̄ piyóó. Íne kú uwɔ ā kē wɛ ɔkwɛ̄yi eko dóódu.

¹⁴³Oyéeyī kú um le mu mla unwalu mla ɔtū ōplicō, amáŋ, íne kú uwɔ ā wɛ ɔdā nōo gē cɛ̄ gā um jééyī á.

¹⁴⁴Aíne kú uwɔ le kpaakpa piyóó, yá ká n̄ jɛ́yí ɔdā nɛ̄ aíne kú uwɔ gē nwū ā, cɛ́ɛ́ ká n̄ yēeyī.

¹⁴⁵Óndú, n yɔ̄ ī dɛ̄gba hī uwɔ igwú mla odúúdú ɔtū kú um. Lɛ ohi tá um Óndú, n géē lɛ íne kú uwɔ tū.

¹⁴⁶N yɔ̄ ī hī uwɔ igwú, lɛ um nyatá. Cɛ́ɛ́ kú n̄ lɛ íne kú uwɔ tū.

¹⁴⁷N cāŋjɛ ofúlɔ̄cī gē jikwū klá uwɔ ká ā tá um abɔ̄, eyīyōce kú um yɔ̄ ipú ɛlā nāa í ka ā.

¹⁴⁸Eyī kú um kwɛcɛ otú gbó ɔ̄cī, cɛ́ɛ́ ká n̄ leyī yɛ ɛlā kú uwɔ.

¹⁴⁹Óndú pó ɔkɔ nɛ̄ n gbā ā, ohígbū ihɔtū kú uwɔ nōo yɔ̄ eko dóódu ā. Óndú lɛ ɛpɔ̄ ka kpaakpa ká ā lɛ oyēeyī kú um tū.

¹⁵⁰Ācobɔ́bíipū nēe gē yá um ŋmó ā, gē túblá um ajaajɛ, é ī lɛ ɛlá wu íne kú uwɔ fúlufúlu ŋ́.

¹⁵¹Amáŋ Óndú ā, kē kwu um ajaajɛ, ɔ̄cɛ lɔtūce odúúdú íne kú nū ā glá.

¹⁵²N jé gbojī ɛɛ́ ka, a tū aíne kú uwɔ ā, kéē yɔ̄ piyóó.

¹⁵³Óndú, má ōwē nɛ̄ n gē má ā, ká ā lɛ um nyatá, ohígbū ka ń gwɛ́lā hī íne kú uwɔ tá ŋ́.

¹⁵⁴Lɛ ɛpɔ̄ um cɛ̄, ká ā lɛ um hɛ́tá, lɛ um nyatá ɛ́gɛ́nɛ̄ a cokónu lɛ ā.

¹⁵⁵Á gáā nyā ācobɔ̄bíipú ā tá ŋ́, ohígbū keé lɛyítáajɛ lɛ íne kú uwɔ ŋ́.

¹⁵⁶Eyīnyinyi kú uwɔ nwuné nɛ̄hi Óndú, lɛ ɛpɔ̄ okpaakpa kú uwɔ ā ka, ká ā lɛ oyēeyī kú um tū.

¹⁵⁷Aólɛlā mla ācɛ nēe gē yá um ŋmó ā lɛwa nɛ̄hi, amáŋ, ń nyīleyī ŋmá íne kú uwɔ ā ŋ́.

¹⁵⁸Eko dúúmā nɛ̄ n gē má ācɛ nēé tōō lɔtūce ŋ́ ɔ́ɔmā, é gē tū um íwɔ́tū, ohígbū keé lɛyítáajɛ lɛ íne kú uwɔ ā ŋ́.

¹⁵⁹Óndú, má ɛ́gɛ́nɛ̄ n yíihɔtū kú íne kú uwɔ ā mɛ́ɛnɛ, lɛ oyēeyī kú um tū, ŋmá lɛ ɛ́gɛ́nɛ̄ a ī yíihɔtū eko dóódu ā.

¹⁶⁰Ɛlā kú uwɔ ā, wɛ ɔkwɛ̄yi, okpótɔ̄há kú íne kú uwɔ ā, wɛ ɔ̄kwɛ̄yi, odúúdú ɛpɔ̄ okpaakpa kú uwɔ ā yɔ̄ piyóó.

¹⁶¹Aótrɛ̄yí gē nuunu tá um áncā, amáŋ íne kú uwɔ nɛ̄ n gē yúufi nū ōfōōfūnū á.

¹⁶²N gē gwéeyē nɛ̄hi ohígbū ɛlā kú uwɔ, bɛ̄ɛka ɔ̄cɛ nōo lɛ ije nɛ̄hi pīyɛ ā.

¹⁶³Ɛ̄kɛ̄mgbɛ̄ gē wú um ɔtū, amáŋ íne kú uwɔ kē he um ɔtū.

¹⁶⁴N gē cɛ̄tra uwɔ igbo ahāapa ɛ̄cī ékpónú, ohígbū ɛpɔ̄ okpaakpa nāa gē hɛ́ ā.

¹⁶⁵Ācɛ nɛ̄ íne kú uwɔ he uwá ɔtū ā lɛ ɛbɔ́ nɛ̄hi, ɔdā dúúmā í gáā yá uwá kéē gwōnū ŋ́.

¹⁶⁶N lɛ eyī ce uwɔ ká ā nya um tá Óndú, n kē ī yá ɔdā nāa ka ipú íne kú uwɔ ā jīla.

¹⁶⁷N géē lɛyítáajɛ lɛ íne mla ɛlā nāa gē nwū ā, ó kē í he um ɔtū nɛ̄hi.

¹⁶⁸N géē lɛyítáajɛ lɛ odúúdú íne kú uwɔ mɛ́mla ukɔ́ nāa ī tū ā, ohígbū ka a kē jé ucē kú um dóódu.

¹⁶⁹Ikwū nɛ̄ n yɔ̄ ī je ká ā tá um abɔ̄ ā, kóō gā ɛgiyí uwɔ, Óndú, ɛ́gɛ́nɛ̄ a cokónu lɛ ā.

¹⁷⁰Jāhɔ̄ lɛ ɔkɔ nɛ̄ n gbā ā, ká ā lɛ um nyatá ɛ́gɛ́nɛ̄ a cokónu lɛ ā.

¹⁷¹N géē yɔ̄ ī cɛ̄tra uwɔ eko dóódu, ohígbū ká ā lɛ íne kú uwɔ ā nwū um.

¹⁷²N géē gwíijē lɛyíkwu íne kú uwɔ, ohígbū kóō le kpaakpa.

¹⁷³Óndú, le tútū ká ā tá um abɔ̄ eko dóódu, ohígbū ka n le tútū ō lɛyítáajɛ lɛ íne kú uwɔ.

¹⁷⁴N yɔ̄ ī gbēyī ká ā nya um tá, Óndú, íne kú uwɔ wɛ ɔdā nōo he um ɔtū á.

¹⁷⁵Lɛ oyēeyī je ga m, cɛ́ɛ́ ká n̄ cɛ̄tra uwɔ, yá ka íne kú uwɔ kóō tá um abɔ̄.

¹⁷⁶N gebí bɛ̄ɛka álá nōo gebí ā ɛɛ́, wā gaá tíne ami, nōo wɛ ɔ̄cocɛ̄hɔ̄ kú uwɔ ā, Óndú, ohígbū ka ń gwɛ̄lá hī íne kú uwɔ tá ŋ́.